JAJI MUGASHA AHIMIZA MAHAKIMU KUSOMA SHERIA KWA MAKINI

Na Stephen Kapiga-Mahakama, Mwanza

Jaji wa Mahakama ya Rufani ya Tanzania, Mhe. Stella Mugasha amewataka Mahakimu kusoma sheria kwa makini wanapotekeleza majukumu yao ya utoaji haki kwa wananchi, ikiwemo kusikiliza mashauri na kutoa maamuzi.

Mhe. Mugasha ametoa wito huo jana tarehe 12 Julai, 2023 alipokuwa anazungumza na Mahakimu wa Mahakama zilizopo Mwanza Mjini wakati wakijadili changamoto mbalimbali wanazokutananazo wakati wa uendashaji wa mashauri.

Majadiliano hayo yalifanyika katika ukumbi wa mikutano uliopo kwenye Kituo Jumuishi cha Utoaji Haki (IJC) Mwanza.

“Nawasihi sana msiogope kuzisoma sheria zote kwa umakini mnapofanya maamuzi katika mashauri mnayoendesha, kwani mliapa kufanya kazi kwa kufuata sheria pasipo huba wala upendeleo. Mkiwa kama kisima kikubwa cha Majaji wajao muwe na kawaida ya kusoma sheria na kuitafsiri ipasavyo,” alisema.

Naye Naibu Msajili wa Mahakama Kuu ya Tanzania, Kanda ya Mwanza, Mhe. Chiganga Tengwa aliongelea maeneo yenye utata ambayo Mahakimu wamekuwa wakikutananayo wakati wa kufanya maamuzi.

Alitoa mfano pale panapokuwa na mgongano wa sheria mbalimbali, hivyo kupelekea upande mmoja kuonekana kama hautendewi haki.

“Ukisoma kifungu cha 25 cha Sheria ya Mabadiliko ya Sheria Na. 1 ya 2020 na pia ukisoma kifungu cha 97 cha Sheria ya Serikali za Mitaa (mamlaka ya mijini) utaona kuna huo mgongano juu ya nani anapaswa kuwa served na muda wa notice hiyo,” alisema.

Majadiliano hayo yalilenga kuwajengea uelewa Mahakimu hao namna bora ya kufikia maamuzi katika mashauri wanayoendesha, hatua itakayowawezesha kufanya kazi kwa kujiamini na usahihi, hivyo kuongeza Imani ya jamii kwa Mahakama.

Maeneo waliyogusia katika majadiliano hayo yalihusu namna ya kuchukua ushahidi kwa mtu mwenye matatizo ya akili, namna ya kufanya utekelezaji wa tuzo mbalimbali za Mahakama, kushughulikia mashauri ya mirathi na yale yanayoihusisha Serikali kwa kuzingatia Sheria za Serikali za Mitaa na Sheria ya Mabadiliko ya Sheria Na.1 ya mwaka 2020.

Jaji wa Mahakama ya Rufani ya Tanzania, Mhe. Stella Mugasha (juu na chini kushoto) akielezea jambo kwa Mahakimu (hawapo pichani) wakati wa majadiliano juu ya sheria mbalimbali na changamoto wanazokutananazo wakati wa kufanya maamuzi. Picha chini kulia ni Hakimu Mkazi Mfawidhi wa Mahakama ya Wilaya Ilemela, Mhe. Stella Kiama.

Naibu Msajili Mahakama Kuu ya Tanzania, Kanda ya Mwanza, Mhe. Chiganga Tengwa akieleza jambo wakati wa majadiano hayo.

Baadhi ya Mahakimu (juu na picha mbili chini) walioshiriki katika majadiliano hayo yaliyofanyika jana tarehe 12 Julai, 2023 katika ukumbi wa mikutano wa Kituo Jumuishi cha Utoaji Haki Mwanza.

(Habari hii imehaririwa na FAUSTINE KAPAMA-Mahakama)