MAHAKAMA KUU KANDA YA TABORA YATUMA SALAMU BUKOBA

Na Amani Mtinangi Mahakama Kuu Tabora

Mahakama Kuu ya Tanzania, Kanda ya Tabora, jana tarehe 30 Julai, 2023 ilishiriki kikalilifu katika Bonanza la Michezo lililoandaliwa na Chama cha Riadha mkoani hapa na kuibuka mshindi wa kwanza katika mbio za mita 100 na mita 200 kwa wanawake.

Bonanza hilo lililofanyika katika Uwanja wa Ally Hassan Mwinyi lilihudhuriwa na Taasisi za Umma, Vyuo na Sekondari mbalimbali za Mkoa wa Tabora. Pamoja na riadha, mashindano mengine yaliyofanyika ni kurusha Tufe na Mkuki.

Ushindi huo wa Mahakama Kuu Tabora ni salamu kwa timu zitakazishiriki katika Bonanza la Michezo litakalofanyika katika Mkoa wa Bukoba hivi haribuni.

Akizungumza wakati anafungua Bonanza hilo, Afisa Elimu wa Mkoa, Mwl. Juma Kaponda, kwa niaba ya Katibu Tawala, aliwapongeza washiriki na kueleza jinsi michezo inavyoboresha afya.

Alieleza jitihada mbalimbali za Serikali katika kukuza na kuendeleza michezo mkoani Tabora, ikiwemo uwekezaji wa takribani milioni 800 za Kitanzania katika sekta ya michezo kama ukarabati wa viwanja vya shule yalipofanyikia mashindano ya UMITASHUMTA na UMISETA kwa miaka miwili mfululizo.

“Michezo ni Afya, michezo ni udugu na mshikamano, kwa kulitambua hilo, Serikali imedhamiria kukuza michezo na kuwekeza fedha na nguvu ili kila mwananchi na watumishi na Umma kwa ujumla wapate fursa ya kushiriki kikamilifu,” alisema.

Katibu wa Riadha Mkoa wa Tabora, Zuberi Kalugutu aliwapongeza watumishi wa Mahakama kwa jinsi walivyoitikia wito wa kushiriki katika Bonanza hilo na kuwaasa watumishi wa taasisi zingine kuiga mfano huo.

“Leo tumeshirikiana vyema na watumishi wa taasisi mbalimbali, lakini kipekee ninayofuraha kuwapongeza wenzetu wa Mahakama kufika na kushiriki kikamilifu katika shughuli hii, kwa kweli ni jambo la kuigwa,” alisema.

Akizungumzia mashindano hayo, Hakimu wa Mahakama ya Mwanzo Tabora Mjini, Bumi Mwakatobe aliwashukuru waandaaji wa Bonanza hilo na kuwaomba hilo lisiwe la mwisho. Aliwaasa wanawake kushiriki katika michezo.

“Mimi binafsi niwashukuru waandaaji na waliotoa wazo la kuandaa Bonanza hili. Tumefurahi kushiriki ninaomba mabonanza kama haya yaendelee kufanyika, hili lisiwe la mwisho. Lakini pia wanawake wenzangu wajitahidi sana kushiriki michezo ili wasipitwe na fursa za kimichezo,” alisema.

Mgeni Rasmi wa Bonanza la Riadha lililofanyika mkoani Tabora, Afisa Elimu wa Mkoa, Mwl. Juma Kaponda akitoa neno la ufunguzi wa Bonanza hilo katika Uwanja wa Ally Hassan Mwinyi. Kushoto ni Katibu wa Riadha Mkoa wa Tabora, Zuberi Kalugutu.

Hakimu wa Mahakama ya Mwanzo Tabora, Bumi Mwakatobe  akihitimisha mbio za mita 200 akiwa mshindi. Wengine pichani ni watumishi wa Mahakama walioshiriki michezo hiyo.

Msaidizi wa Kumbukumbu, Mwanaenzi Chuma akirusha tufe.

Hakimu Mkazi Mwandamizi Christopher Mdoe akishiriki katika mashindano ya kuruka umbali.

Afisa Utumishi wa Mahakama Kuu Kabora Amani Mtinangi akishiriki mashindano ya kurusha mkuki.

Watumishi wa Mahakama (wenye tisheti za bluu bahari) wakimsikiliza Mgeni Rasmi (hayupo pichani) wakati wa ufunguzi wa Bonanza hilo.

(Habari hii imehaririwa na FAUSTINE KAPAMA-Mahakama)