MAHAKAMA YA TANZANIA KUENDELEA KUKAZA UZI MATUMIZI YA TEHAMA

Na Faustine Kapama-Mahakama, Morogoro

Mkutano wa Mwaka wa Mahakama ya Rufani Tanzania uliokuwa unafanyika mjini hapa katika Hoteli ya Nashera kutathmini na kujadili utendaji wa Mahakama hiyo katika maeneo mbalimbali kimehitimishwa leo tarehe 28 Julai, 2023.

Akizungumza wakati anafunga Mkutano huo, Jaji Mkuu wa Tanzania, Mhe. Prof. Ibrahim Hamis Juma amesisitiza kuendelea kufanyia kazi suala la matumizi ya Teknolojia ya Habari na Mawasiliano (TEHAMA) katika Mahakama ya Rufani ili kuimarisha utendaji katika utoaji wa haki kwa wananchi.

“Taarifa ya Msajili wa Mahakama inaonyesha kuwa bado mashauri katika Mahakama ya Rufani yanafunguliwa kwa njia ya kawaida, Masjala Kuu na Masjala ndogo hazisomani. Hili ni eneo ambalo tunatakiwa kulifanyia kazi,” Mhe. Prof. Juma amesema.

Jaji Mkuu ameeleza kuwa katika karne ya 21 utoaji wa huduma, zikiwemo haki zinahamia kwenye mifumo ya kidigitali, hivyo kuanzia sasa itakuwa kawaida kutumia mifumo hiyo kama njia muhimu ya kuleta ufanisi, kuongeza uwazi na umahiri katika utoaji wa huduma.

“Hili ni eneo ambalo kila mmoja wetu ajielekeze. Mahakama ilikofikia sasa na baada ya taarifa ya Tume ya Haki Jinai kupendekeza mfumo jumuishi wa haki jinai haina budi kuhakikisha kwamba tunaendelea kuwa mstari wa mbele katika hili eneo ambalo wenzetu wanatusifu tumepiga hatua kubwa sana,” amesema.

Jaji Mkuu amewataka wajumbe wa Mkutano huo kuwasilisha mawazo yao ya kimaboresho kwenye kamati ya TEHAMA ambayo inasaidia kuangalia katika eneo hilo kila siku.

Kadhalika, Mhe. Prof. Juma amewahimiza wajumbe hao kuyafanyia kazi yale yote yaliyojitokeza katika Mkutano huo, ikiwemo maoni na mapendekezo ambayo yatasaidia katika kuimarisha utendaji mahakamani.

“Mada zote na mawasilisho yote yaliyotolewa yametuongezea uelewa na kutusaidia sana katika kufunga mkanda vyema ili kukabiliana na mlundikano wa mashauri katika Mahakama ya Rufani,” amesema.

Mhe. Prof. Juma amebainisha kuwa ataendelea kufuatilia maazimio yote yaliyofikiwa ili kujua namna yanavyotekelezwa kabla ya Mkutano ujao wa Mahakama ya Rufani.

Awali, akimkaribisha Jaji Mkuu kufunga Mkutano huo, Mwenyekiti Mwenza, Mhe. Augustine Mwarija alieleza kuwa baada ya kutathmini na kutokana na mada zilizotolewa wameona utendaji wa Mahakama ya Rufani umekuwa mzuri.

Mhe. Mwarija, kwa niaba ya Majaji wengine wa Mahakama ya Rufani, amemshukuru Jaji Mkuu kwa uongozi wake mahiri ambao umepelekea uwepo wa mafanikio makubwa katika utendaji kazi.

“Mafanikio haya yametokana na uongozi wako mzuri. Nitoe shukrani pia kwa kamati ya maandalizi kwa ufanisi mkubwa,” amesema.

Katika Mkutano huo wa siku mbili ulioanza jana tarehe 27 Julai, 2023, taarifa na mada mbalimbali ziliwasilishwa, ikiwemo inayohusu mashauri kwa kipindi cha Januari hadi Disemba, 2022.

Taarifa nyingine ilihusu hali ya mifumo ya TEHAMA, maboresho yanayoendelea na safari ya kuelekea Mahakama mtandao.

Pia kulikuwepo na uwasilishaji wa mada mbalimbali kutoka kwa wawezeshaji wabobezi, wakiwemo Majaji wa Mahakama ya Rufani wastaafu, Mhe. Edward Rutakangwa na Mhe January Msoffe.

Viongozi mbalimbali wa Mahakama walialikwa kwenye Mkutano huo, akiwemo Jaji Kiongozi wa Mahakama Kuu ya Tanzania, Mhe. Mustapher Mohamed Siyani, Mtendaji Mkuu wa Mahakama ya Tanzania, Prof. Elisante Ole Gabriel, Msajili Mkuu wa Mahakama ya Tanzania, Mhe. Wilbert Chuma na Msajili wa Mahakama Kuu ya Tanzania, Mhe. Sharmillah Sarwatt.

Jaji Mkuu wa Tanzania, Mhe. Prof. Ibrahim Hamis Juma akizungumza wakati anafunga Mkutano wa Mwaka wa Mahakama ya Rufani leo tarehe 28 Julai, 2023 uliokuwa unafanyika katika Hoteli ya Nashera mjini Morogoro.

Mwenyekiti Mwenza na Jaji wa Mahakama ya Rufani ya Tanzania, Mhe. Augustine Mwarija akieleza jambo kabla ya kumkaribisha Jaji Mkuu wa Tanzania, Mhe. Prof. Ibrahim Hamis Juma kufunga Mkutano huo. 

Sehemu ya Majaji wa Mahakama ya Rufani ya Tanzania (juu na picha mbili chini) ikifuatilia mambo mbalimbali siku ya pili ya Mkutano huo. 

Sehemu nyingine ya Majaji wa Mahakama ya Rufani ya Tanzania (juu na chini) ikifuatilia hotuba ya Jaji Mkuu wa Tanzania, Mhe. Prof. Ibrahim Hamis Juma alipokuwa anafunga Mkutano huo. 

Sehemu nyingine ya Majaji wa Mahakama ya Rufani ya Tanzania (juu na chini) ikifuatilia hafla hiyo. 

Sehemu ya Viongozi wa Mahakama ya Tanzania (juu na chini) ikifuatilia hafla hiyo. 

Msajili wa Mahakama ya Rufani ya Tanzania, Mhe. Sylvester Kainda (wa kwanza kulia na Naibu Wasajili wa Mahakama hiyo (juu na chini) wakifuatilia kilichokuwa kinaendelea kwenye Mkutanmo huo.