MTAZAMO HASI RUSHWA MAHAKAMANI WAPOROMOKA

·Kati ya watu 100 watatu ndiyo wenye mtazamo hasi

·Mtandao kuunganisha Mahakama wasambaa nchi nzima

Na Faustine Kapama-Mahakama, Morogoro

Mahakama ya Tanzania imepata mafanikio makubwa katika utoaji haki nchini kiasi cha kuongeza kwa kiasi kikubwa imani ya Wananchi kuwa wanaweza kupata huduma za kimahakama bila kutoa rushwa.

Hayo yamebainishwa na Mkuu wa Kitengo cha Maboresho cha Mahakama ya Tanzania, Mhe. Dkt. Angelo Rumisha alipokuwa akiwasilisha taarifa ya Mkakati wa Maboresho siku ya pili ya Mkutano wa Mwaka wa Mahakama ya Rufani unaofanyika mjini hapa.

Mhe. Dkt. Rumisha amewaambia Wajumbe wa Mkutano huo kuwa tafiti ambazo zimezifanyika mwaka 2015, 2019 na 2023 zinaonyesha maendeleo chanya kwa kila eneo, ikiwemo suala la rushwa ambalo mwaka 2015 ilikuwa asilimia tisa, mwaka 2019 ikashuka hadi asilimia sita na mwaka 2023 imefika asilimia tatu.

“Hii ina maanisha kuwa kati ya watu 100 wanaoulizwa kwa sasa ni watatu tu wanaosema hawawezi kupata haki mpaka watoe rushwa, kitu ambacho ni tofauti kwa mwaka 2015 ambao walikuwa watu tisa,” Mkuu wa Kitengo cha Maboresho amesema.

Mhe. Dkt. Rumisha ameeleza kuwa kwa ujumla idadi ya watu wanaoridhika na huduma za Mahakama imeongezeka. Amesema mwaka 2015 ilikuwa asilimia 61 ya watu waliokuwa wanaamini wakienda mahakamani watapata haki.

“Tumefanya utafiti tena mwaka 2019, watu asilimia 78 wakasema wakienda mahakamani wanaweza kupata haki, sasa hivi mwaka huu wa 2023 ni asilimia 88 wanasema wakienda mahakamani watapata haki. Haya ni mafanikio makubwa sana,” amesema.

Amebainisha kuwa Mahakama ya Tanzania ilikuwa imejiwekea lengo la kufikia asilimia 82 kwa mwaka 2023 kutoka asilimia 78 kwa mwaka 2019, lakini kiwango kimepanda hadi asilimia 88 kuliko matarajio, hali inayoonyesha wananchi wanaiamini zaidi Mahakama kuliko yenyewe ilivyotarajia.

Kuhusu mlundikano, Mhe. Dkt. Rumisha ameeleza kuwa takwimu zimekuwa zikishuka kila mwaka na mpaka mwezi Juni, 2023 imefikia asilimia tatu ya mashauri yote ambayo hakuna nchi nyingine katika Ukanda wa Afrika Mashariki imefikia.

Amewaambia wajumbe wa Mkutano huo kuwa idadi hiyo imeendelea kushuka mfululizo, mfano mwaka 2022 ilikuwa asilimia sita na kufikia mwezi Juni 2023 imekuwa asilimia tatu na itaendelea kushuka kufikia mwezi wa 12, 2023.

“Ukilinganisha na miaka ya nyuma, mwaka 2015 ilikuwa asilimia 15, mwaka 2021 ikaja asilimia 10, mwaka 2022 ikawa asilimia sita na sasa Juni 2023 imekuwa asilimia tatu ya mashauri yote,” Mkuu wa Kitengo cha Maboresho amesema.

Mhe. Dkt. Rumisha amefafanua kuwa mlundikano huo haupo kwenye Mahakama za Mwanzo ambazo zinasikiliza mashauri kwa asilimia kubwa. Amebainisha kuwa asilimia 68 ya mashauri au mashauri asilimia 68 ya wananchi wanaoenda mahakamani yanaisha kabla hayajawa mlundikano.

Naye Mkurugenzi wa Idara ya Teknolojia ya Habari na Mawasiliano (TEHAMA), Bw. Kalege Enock, akiwasilisha mada katika Mkutano huo, amesema Mahakama ya Tanzania imefanikiwa kujenga mtandao mpana na kuwezesha Mahakama karibu zote kuunganishwa.

“Mtandao huu umeunganisha Mahakama ya Rufani, Mahakama Kuu na Mahakama za Hakimu Mkazi kwa asilimia 100,” Bw. Kalege amewaambia wajumbe wa Mkutano alipokuwa anawasilisha mada kuhusu Hali ya Mifumo na Matumizi ya TEHAMA kuelekea Mahakama Mtandao.

Amebainisha kuwa Mahakama za Wilaya zimeungwa kwa asilimia 97 na zilizobakia zitaunganishwa mpaka ifikapo mwezi Oktoba, 2023, huku uunganishwaji wa Mahakama za Mwanzo ukiendana na uboreshaji wa hali ya majengo.

Amependekeza Mahakama ya Rufani kuendelea kujitathimi na kuboresha mtiririko wa kazi zake (workflow) ili kuendelea kunufaika na matumizi ya TEHAMA na pia kuendelea kuonesha mfano kwa vitendo katika matumizi ya TEHAMA mahakamani.

Mkuu wa Kitengo cha Maboresho cha Mahakama ya Tanzania, Mhe. Dkt. Angelo Rumisha (juu na chini) akisisitiza jambo alipokuwa akiwasilisha taarifa ya Mkakati wa Maboresho siku ya pili ya Mkutano wa Mwaka wa Mahakama ya Rufani.

Mkurugenzi wa Idara ya Teknolojia ya Habari na Mawasiliano (TEHAMA), Bw. Kalege Enock (juu na chini) akifafanua jambo kwenye Mkutano huo.

Jaji wa Mahakama ya Rufani, Mhe. Stella Mugasha akisisitiza jambo alipokuwa  akichangia kwenye taarifa zilizowasilishwa kwenye Mkutano huo.

Jaji wa Mahakama ya Rufani, Mhe. Jacobs Mwambegele akichangia hoja.

Jaji wa Mahakama ya Rufani, Mhe. Dkt. Paul Kihwelo akichangia kwenye taarifa mbili zilizowasilishwa.

Jaji wa Mahakama ya Rufani, Mhe. Ignas Kitusi akichangia kwenye taarifa mbili zilizowasilishwa.

Jaji wa Mahakama ya Rufani, Mhe. Lucia Kairo akichangia taarifa hizo mbili zilizowasilishwa.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani naye hakuwa nyuma kuchangia kwenye taarifa hizo mbili zilizowasilishwa kwenye Mkutano huo.