MAHAKAMA YA KAZI YANG’ARA UMALIZAJI MASHAURI

Na Faustine Kapama-Mahakama

Mahakama Kuu ya Tanzania, Divisheni ya Kazi imetekeleza kwa ukamilifu jukumu la kikatiba la utoaji haki kwa wananchi kwa kumaliza jumla ya mashauri takribani 2,000 yaliyopokelewa kwa kipindi cha mwaka mmoja.

Hayo yamebainishwa na Naibu Msajili wa Mahakama Kuu ya Tanzania katika Divisheni hiyo, Mhe. Kassian Enock alipokuwa anawasilisha taarifa ya utekelezaji kazi katika Mahakama hiyo kwenye Mkutano wa Saba wa Kamati ya Utatu yenye jukumu la kuweka mikakati kusaidia kumaliza mashauri kwa wakati.

“Mashauri yaliyobaki Julai 2022 yalikuwa 847. Mashauri yaliyosajiliwa kuanzia Julai, 2022 mpaka Juni, 2023 ni 1,455. Mashauri yaliyoamuliwa Julai 2022 mpaka Juni, 2023 yalikuwa 1,999, sawa na asilimia 137 ya mashauri yote 1,455 yaliyopokelewa katika kipindi hicho cha mwaka mmoja. Mashauri yaliyobaki hadi Juni, 2023 yalikuwa 303,” amesema.

Naibu Msajili amebainisha kuwa kati ya mashauri hayo 303 yaliyobaki, ni mashauri matatu (3) tu yenye umri wa miaka miwili (backlog) ambayo hayajaamuliwa. Amefafanua kuwa mashauri hayo ni ya ukaziaji deni tuzo (execution) na yameshindwa kuendelea kwa sababu kuna amri ya kusimamisha utekelezaji kusubiri maamuzi ya Mahakama ya Rufani.

Mhe. Enock aliyekuwa anawasilisha taarifa hiyo kwa niaba ya Naibu Msajili Mfawidhi wa Mahakama hiyo, Mhe. Rashid Ding’ohi, amefafanua zaidi kuwa Mahakama Kuu Divisheni ya Kazi katika kusikiliza mashauri imekuwa inatumia njia mbili, yaani usikilizaji wa kawaida na ule wa vikao maalum.

Amesema kuwa kuanzia kipindi cha mwezi Julai, 2022 hadi Juni, 2023 vimefanyika jumla ya vikao (Session na Crash Programme) 23, ambapo Majaji wamefanya vikao 17 na Naibu Wasajili wamefanya vikao sita (6).

“Katika vikao hivyo, jumla ya mashauri 653 yalipangwa. Mashauri yaliyosikilizwa na kumalizika kwa njia hiyo ya vikao ni 472. Mashauri 181 yaliyobaki yapo kwenye hatua mbalimbali ya usikilizwaji, hukumu na uamuzi,” Mhe. Enock amesema.

Amebainisha pia kuwa Mahakama Kuu Divisheni ya Kazi imekuwa ikitumia mfumo wa Audio Visual Recording System na Mkutano Mtandao (Video Conferencing) katika kusikiliza mashauri yaliyoko mbele ya Majaji na kuwapunguzia waadawa gharama za kuhudhuria mahakamani hata kama wako mbali na Mahakama.

Naibu Msajili amewaambia wajumbe wa Mkutano huo kuwa matumizi ya mfumo huo pamoja na mifumo mingine ya Teknolojia ya Habari na Mawasiliano (TEHAMA) yamewezesha upatikanaji wa haki kwa wakati na kutimiza matakwa ya nguzo ya pili ya Mpango Mkakati wa Mahakama.

Mpango Mkakati wa Mahakama ya Tanzania wa Miaka Mitano (2020/21- 2024/25) umejengwa chini ya nguzo tatu imara zinazotegemeana. Nguzo ya kwanza inahusu utawala bora, uwajibikaji na usimamizi wa rasilimali; nguzo ya pili inahusu upatikanaji wa haki kwa wakati na nguzo ya tatu inayohusu imani kwa wananchi na ushirikishwaji wa wadau.

Mkutano huo wa siku moja ambao umehudhuriwa na viongozi na wadau mbalimbali wa Mahakama umefunguliwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani ambaye amehimiza ushirikiano baina ya Serikali, Mahakama na wadau wote katika utatuzi wa migogoro, ikiwemo ya kazi, ili kujenga jamii yenye amani na utulivu na kuimarisha mazingira ya kukua kwa uchumi nchini.

Jaji Mfawidhi wa Mahakama Kuu ya Tanzania, Divisheni ya Kazi, Mhe. Dkt. Yose Mlyambina.

Jaji wa Mahakama Kuu ya Tanzania, Divisheni ya Kazi, Mhe. Dkt. Modesta Opiyo.

Jaji wa Mahakama Kuu ya Tanzania, Divisheni ya Kazi, Mhe. Biswalo Mganga.

Aliyekuwa Jaji wa Mahakama Kuu ya Tanzania, Divisheni ya Kazi, Mhe. Revocat Mteule ambaye sasa ni Jaji Mfawidhi wa Mahakama Kuu, Kanda ya Tanga.

Naibu Msajili Mfawidhi wa Mahakama  Kuu ya Tanzania, Divisheni ya Kazi, Mhe. Rashid Ding’ohi.

Naibu Msajili wa Mahakama Kuu ya Tanzania katika Divisheni hiyo, Mhe. Kassian Enock akiwasilisha taarifa ya kazi katika Mahakama hiyo.

Kaimu Mtendaji wa Mahakama Kuu ya Tanzania katika Divisheni hiyo, Bw. Jumanne Muna.

Sehemu ya watumishi wa Mahakama Kuu ya Tanzania Divisheni ya Kazi wakiwa katika picha ya pamoja na Meza Kuu ikiongozwa na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (katikati waliokaa).

Jengo la Mahakama Kuu ya Tanzania Divisheni ya Kazi, kazi inaendelea.