MAJAJI SITA MAHAKAMA YA RUFANI KUSIKILIZA MASHAURI 65 MOSHI

Na. Paul Pascal-Mahakama, Moshi.

Majaji sita wa Mahakama ya Rufani wameanza kusikiliza jumla ya mashauri 65 kwenye vikao maalumu vinavyofanyika katika Mahakama Kanda ya Moshi.

Akizungumza wakati wa kuanza vikao hivyo, Naibu Msajili Mwandamizi wa Mahakama hiyo, Mhe. Emmanuel Mrangu amesema kutakuwepo na Majopo mawili ya Majaji hao yanayoongozwa na Mhe. Mwanaisha Kwariko na Mhe. Winfrida Korosso.

"Katika jopo la kwanza, Mhe. Kwariko atakuwa pamoja na Mhe. Dkt. Mary Levira na Mhe. Gerson Mdemu ambalo litasikiliza mashauri 32, huku katika jopo la pili, Mhe.  Korosso atakuwa pamoja na Mhe. Dkt. Paul Kihwelo na Mhe. Sam Rumanyika ambalo litasikiliza mashauri 33," amesema Mhe. Mrangu.

Alisema vikao hivyo vitakaa katika Mahakama ya Hakimu Mkazi Moshi kwenye kumbi za wazi namba moja na namba mbili kusikiliza mashauri hayo 65 ambayo kati ya hayo 49 ni rufaa za madai na 16 ni rufaa za jinai. Vikao hivyo vitakaa kwa muda wa wiki tatu kuanzia July 3, 2023.

Mhe. Mrangu amesema lengo la kuleta vikao hivyo katika Mahakama Kanda ya Moshi ni utekeleza wa Mpango Mkakati wa Mahakama ya Tanzania (2020/21-24/25) nguzo ya pili ya upatikanaji wa haki kwa wakati.

"Hii itawasaidia wananchi kupata haki zao kwa wakati badala ya kusubiri muda mrefu kama ilivyokuwa awali ambapo mashauri yalikuwa yanapelekwa Mahakama Kanda ya Arusha na Dar es Salama,” alisema.

Mhe. Mwanaisha Kwariko.

Mhe. Winfrida Korosso.

Mhe. Dkt. Mary Levira.

Mhe. Dkt. Paul Kihwelo.

Mhe. Sam Rumanyika.

Mhe. Gerson Mdemu.

(Habari hii imehaririwa na FAUSTINE KAPAMA-Mahakama).