JUDICIARY OF TANZANIA: WASAIDIZI WA KUMBUKUMBU WATAKIWA KUJIFUNZA MIFUMO YA MAHAKAMA

Na Eunice Lugiana-Mahakama, Kibaha

Hakimu Mkazi Mfawidhi wa Mahakama ya Hakimu Mkazi Kibaha Pwani, Mhe. Joyce Mkhoi amewataka Wasaidizi wa Kumbukumbu wa Mahakama ya Hakimu Mkazi na Mahakama za Wilaya Mkoa wa Pwani kutumia muda wao kujifunza zaidi mifumo yote ya kimahakama ili kuendana na Mpango Mkakati wa Mahakama.

Mhe. Mkhoi alitoa wito huo mwishoni mwa wiki alipokua akifungua mafunzo kwa Wasaidizi wa Kumbukumbu wa Mahakama za Wilaya na Mkoa huo katika ukumbi namba mbili wa Mahakama ya Wazi.

Alieleza kuwa kwa sasa Mahakama ya Tanzania inatekeleza mpango mkakati wake wa 2020/2021-2024/25 ambapo moja ya malengo yake makuu ni kuhakikisha na kurahisisha huduma za kimahakama ziwe karibu zaidi na wananchi.

Akiongea kuhusu malipo ya mirathi, Mhe. Mkhoi alisema ni muhimu pia Wahasibu kuzingatia viambatanisho muhimu katika kuhakikisha fedha za warithi zinatoka kwa wakati na kuingia kwenye akaunti zao kama zilivyoorodheshwa bila makosa yoyote ili kuwaepusha kukosa haki zao, hatua ambayo itapunguza malalamiko.

Naye Mkufunzi wa mafunzo hayo, Hakimu Mkazi Manfred Sanga kutoka Kituo Jumuishi Temeke amewataka wasaidizi wa kumbukumbu kukagua nyaraka za kufungua mirathi na kujiridhisha kkama ziko sahihi kabla ya kufungua ili kuepuka usumbufu utakaojitokeza baada ya kumalizika kwa shauri.

Amewataka hasa Wasaidizi wa Kumbukumbu wa Mahakama za Mwanzo kufanya kazi hizo kwa weledi maana wao ni kama Mawakili wa waombaji na kuwataka kujaza fomu kwa ufasaha zaidi.

“Fomu zotekatika Mahakama za Mwanzo zinajazwa na Wasaidizi wa Kumbukumbu, hivyo kuwezi makini katika ujazaji wa fomu hizo maana nyie ni kama mawakili wa waombaji,” alisema.

Naye mratibu wa mafunzo hayo, Afisa Tawala wa Mahakama ya Hakimu Mkazi, Bi, Stumai Hozza alisema mafunzo hayo ni mwanzo wa mafunzo zaidi yatakayotolewa na mahakama Pwani katika kuboresha utendaji kazi na utoaji huduma katika mahakama hiyo.

Mafunzo hayo ya siku mbili yalilenga kuwajengea uwezo Wasaidizi wa Kumbukumbu 25 kuhusu mfumo wa usajili wa mshauri (JSDS) na mfumo wa E-office pamoja na ufunguaji wa kesi za mirathi.

Hakimu Mkazi Mfawidhi wa Mahakama ya Hakimu Mkazi Pwani, Mhe. Joyce Mkhoi akiongea wakati wa ufunguzi wa mafunzo kwa Wasaidizi wa Kumbukumbu Mahakama Mkoa wa Pwani.

Hakimu Mkazi Mfawidhi wa Mahakama ya Hakimu Mkazi Pwani, Mhe. Joyce Mkhoi (katikati) akiwa katika picha ya pamona na Mtendaji wa Mahakama Mkoa wa Pwani, Bw. Moses Minga (wa pili kushoto), Mkufunzi, Bi. Emmanuela Safari ambaye ni Msaidizi wa Kumbukumbu Mahakama ya Hakimu Mkazi Kisutu. Kutoka kushoto ni mwezeshaji wa mafunzo hayo, Bi Elicia Meena, Afisa Tehama Mahakama na Afisa Tawala Mahakama ya Hakimu Mkazi Kibaha Pwani.