ELIMU YA USALAMA BARABARANI YATOLEWA KWA WATUMISHI MAHAKAMA YA KAZI

Na Mwanaidi Msekwa-Mahakama ya Kazi

Jaji Mfawidhi Mahakama Kuu ya Tanzania, Divisheni ya Kazi, Mhe. Dkt. Yose Mlyambina hivi karibuni aliwaongoza Viongozi na watumishi wa Mahakama hiyo kupata elimu ya uraia na usalama barabarani iliyotolewa na Mkaguzi Msaidizi wa Polisi Faustina Ndunguru.

Afande Ndunguru kutoka Kituo cha Polisi cha Usalama Barabarani Makao Makuu Dar es Salaam aliwaasa madereva na watumiaji wa barabara kutoka Mahakama hiyo kufuata sheria za barabarani na kupunguza makosa ya kibinadamu kwa kuacha kutumia vyombo vya moto vilivyo chakavu.

Alihimiza abilia wanapokuwa safarini kufunga mikanda na kuwaomba Viongozi kuwaanda madereva wao kabla ya kuanza safari za mbali kwa kuwapa muda wa kutosha kupumzika.

“Madereva wanatakiwa kuwa makini na vyombo vya moto wanavyovitumia kwa kuhakikisha kila kifaa kipo katika mfumo wake wa kawaida,” alisisitiza. Afande Ndunguru alibainisha madhara ya ajali kuwa ni vifo, ulemavu, kupoteza ajira, kuharibika kwa chombo na kupoteza familia.

Alieleza njia za kukabiliana na ajali za barabarani kama kuacha ulevi na uzembe, kuzingatia alama za usalama barabarani zilizowekwa, kupunguza msongo wa mawazo na dereva kupumzika pale anapokuwa amechoka.

Akizungumza baada ya kipindi hicho, Jaji Mfawidhi alishauri wasimamizi wa barabara wanapotoa mafunzo kwa madereva washirikishe na wenza wao ili kupunguza tatizo la msongo wa mawazo kwa dereva anapokuwa kazini.

Akiahirisha mafunzo hayo, Jaji na Mwenyekiti mpya wa Kamati ya Elimu katika Mahakama Kuu Divisheni ya Kazi, Mhe. Dkt. Modesta Opiyo alimshukuru Afande Ndunguru kwa elimu nzuri aliyoitoa na kufafanua jinsi gani makosa ya kibinadamu yanavyoweza kusababisha ajali nyingi barabarani.

Mafunzo hayo yalihudhuriwa na Jaji wa Mahakama Kuu ya Tanzania katika Divisheni hiyo, Mhe. Biswalo Mganga, Naibu Msajili Mfawidhi, Mhe. Said Ding’ohi, Naibu Msajili, Mhe. Enock Matembele na Kaimu Mtendaji wa Mahakama hiyo, Bw. Jumanne Muna.

Divisheni hiyo imekuwa na utaratibu wa kutoa elimu kwa wadau wake kwa siku ya Jumatatu na Jumatano asubuhi na vile vile kuwezesha watumishi wake kupata elimu kwa mada mbalimbali siku ya Ijumaa.

Mkaguzi Msaidizi wa Polisi Faustina Ndunguru kutoka Kituo cha Polisi cha Usalama Barabarani Makao Makuu Dar es Salaam (juu na picha mbili chini) akitoa elimu ya usalama barabarani kwa Viongozi na watumishi wa Mahakama Kuu ya Tanzania, Divisheni ya Kazi.

Viongozi wa Mahakama Kuu ya Tanzania, Divisheni ya Kazi waliwa katika picha na pamoja na Mkaguzi Msaidizi wa Polisi Faustina Ndunguru kutoka Kituo cha Polisi cha Usalama Barabarani Makao Makuu Dar es Salaam.

Picha ya Meza Kuu na baadhi ya Madereva wa Mahakama Kuu Divisheni ya Kazi.

Picha ya Meza Kuu na baadhi ya watumishi wa Mahakama Kuu Divisheni ya Kazi.

(Habari hii imehaririwa na FAUSTINE KAPAMA-Mahakama)