MAJAJI KIGOMA WAMTEMBELEA MKUU WA WILAYA BUHIGWE

Na Aidan Robert-Mahakama, Kigoma

Majaji wa Mahakama Kuu ya Tanzania, Kanda ya Kigoma hivi karibuni walitembelea Mkuu wa Wilaya ya Buhigwe, Mhe. Col. Michael Ngayalina, ikiwa ni sehemu ya utekelezaji wa nguzo ya tatu ya Mpango Mkakati wa Mahakama (2020/2021–2024/2025) inayosisitiza kuimarisha ushirikiano na wadau.

Ujumbe huo wa Mahakama uliongozwa na Jaji Mfawidhi Mahakama Kuu ya Tanzania, Kanda ya Kigoma, Mhe. Lameck Mlacha akiwa ameambatana na Jaji mwenzake wa Mahakama Kuu, Mhe. Stephen Magoiga na wenyeji wao, Hakimu Mkazi Mfawidhi wa Mahakama ya Wilaya Buhigwe, Mhe. Katoki Mwakitalu na Katibu Tawala wa Wilaya, Bi. Utefta Mahega.

Baada ya kupokea ugeni huo, Mkuu wa Wilaya alifurahishwa kwa ujio wa Majaji hao kwenda kumtembelea ofisini kwake kwa nia ya kukuza mahusiano ya kitaasisi katika Mkoa wa Kigoma.

Aliwaeleza viongozi hao kuwa Wilaya yake ni salama na hali ya hewa ni nzuri, ina chakula cha kutosha. Mhe. Col. Ngayalina aliwaomba, kama wakipata muda mwingine, watembelee maeneo mbalimbali ya Wilaya hiyo ili kujionea uzuri na mandhari yake.

Majaji walifurahishwa na Uongozi huo wa Wilaya kwa mapokezi na kuwapongeza kwa jengo zuri na la kisasa ambalo limechukua idara mbalimbali zinazotoa huduma kwa wananchi katika Wilaya hiyo.

Majaji hao walikuwa katika ziara ya kimahakama kwenye Wilaya hiyo kwa lengo la kuwakutanisha pamoja watumishi katika michezo.

 

Jaji Mfawidhi Mahakama Kuu ya Tanzania, Kanda ya Kigoma, Mhe. Lameck Mlacha (wa pili kulia) akiwa kwenye picha ya pamoja  na Mkuu wa Wilaya ya Buhigwe, Mhe. Col. Michael Ngayalina (wa pili kushoto), Jaji wa Mahakama Kuu Kigoma, Mhe. Stephen Magoiga ( wa kwanza kulia) na Hakimu Mkazi Mfawidhi wa Mahakama ya Wilaya Buhigwe, Mhe. Venance Mwakitalu (wa kwanza kushoto).

Mkuu wa Wilaya ya Buhigwe, Mhe. Col. Michael Ngayalina (katikati) akifurahia jambo baada ya kuwapokea wageni wake, Majaji wa Mahakama Kuu ya Tanzania, Kanda ya Kigoma.

(Habari hii imehaririwa na FAUSTINE KAPAMA-Mahakama)