JAJI KIONGOZI ATETA NA WAJUMBE KUTOKA SHULE YA SHERIA

Na. Innocent Kansha, Sade Soka - Mahakama

Jaji Kiongozi wa Mahakama Kuu ya Tanzania, Mhe. Mustapher Mohamed Siyani ameuhakikishia Uongozi wa Shule ya Sheria nchini kwamba, Mahakama ya Tanzania na Baraza la Elimu ya Sheria “Council for Legal Education” kuendelea kutoa ushirikiano katika jitihada za Taasisi hiyo ya kuboresha na kuandaa mtaala mpya utakao kidhi matamanio ya wadau ili kuendana na mahitaji halisi ya taaluma ya sheria katika karne ya 21.

Akizungumza na Ujumbe wa Viongozi kutoka Shule ya Sheria nchini waliomtembelea Ofisini kwake Mahakama Kuu ya Tanzania jijini Dar es Salaam leo tarehe 21 Agosti, 2023, Jaji Kiongozi Mhe. Siyani amesema, shule ya sheria ndiyo chungu pekee cha kuwapikia wataalamu wa sheria kwenye hatua ya mwisho kabisa katika sheria. Wahitimu wa shule ya sheria ndiyo ambao wanaokuja kufanya kazi mahakamani wakiwa kama Mawakili ama Mahakimu.

“Kwa sasa jinsi sheria ilivyo hakuna hakimu ambaye tutamuajiri bila kupita na kuhitimu shule ya sheria kwa vitendo kwani ni takwa la kisheria, kwa hiyo basi sisi kama Mahakama tunashauku au matarajio makubwa na shule ya sheria kuona kwamba wahitimu wanaozalishwa pale si tu kwamba wanakuwa na faida na jamii yetu pekee lakini pia wanakuwa wako tayari kuja kuisaidia Mahakama kutimiza jukumu lake la msingi la utoaji haki”, alisisitiza Mhe. Jaji Siyani.

Jaji Kiongozi akaongeza kuwa, ndiyo maana mtaona na kutambua kuwa ukiondoa wajibu ambao Mhe. Jaji Mkuu anao na akaukaimisha kwa Jaji Kiongozi wa kusimamia Baraza la Elimu ya Sheria “CLE”. Kila wakati utaona Mahakama inavyojaribu kuwa karibu na Shule ya Sheria, ziko taasisi na vyombo vingi vya Serikali vyenye wajibu na Shule ya Sheria.

“Shule ya Sheria naamini ipo chini ya Wizara ya Katiba na Sheria hivyo basi Mahakama ni wadau ambao tunajiweka karibu zaidi na Shule ya Sheria lakini mzazi wa kwanza pale anapaswa kuwa wizara”.

Mhe. Siyani akaongeza kuwa, “kwa kutambua nafasi yetu kwanza Kama Mahakama na pia kama Baraza la Elimu ya Sheria ndiyo maana mnaona tunazidi kujiweka karibu zaidi. Nafahamu kuhusiana na michakato mbalimbali inayoendelea ndani ya shule ya sheria”.

Mahakama itajaribu kujibu changamoto mbalimbali ambazo zimekuwepo kwa kipindi sasahivi, kumekuwa na minong’ono kwamba watu wanasema kwa nini chakula kinachopikwa na shule ya sheria hakiivi, wahitimu wengi wanaondoka wakiwa na manunguniko, wengine wanafungua mashauri mahakamani lakini na wananchi kwa ujumla mpaka ikapelekea mijadala mbalimbali.

“Sasa nimefurahi kuona kwamba mtaala unaoandaliwa unaenda ungalau kujibu sehemu kubwa ya changamoto ambazo zimekuwepo, hii ni hatua, naamini chuo kitaendelea kutafakari na kuona namna gani ya kuboresha taaluma ili wahitimu wawe wenye ubora na ufanisi katika utendaji kwa kutimiza ndoto na sababu za kuanzishwa kwake ziwepo”, aliongeza Jaji Kiongozi

Mhe. Siyani amesema, Kuanzishwa kwa Baraza la Shule ya Sheria katika miaka kadhaa iliyopita sasa imekuwa ikifanya majukumu mengi zaidi ya kusimamia mitihani ya kutainiwa kuwa mawakili wa kujitegemea, mitihani hiyo bado ipo ila ni kwa uchache sana tofauti na ilivyokuwa miaka ya nyuma mathalani mwaka jana tulisimamia watu watatu (3). Kwa hiyo sehemu kubwa ya shughuli za Baraza ni kushughulikia wanafunzi waliohitimu wanaotaka kuwa mawakili lazima watapita kwenye Baraza

Aidha, Baraza hilo linatembelea kwenye Vyuo mbalimbali vinavyofundisha sheria na kujadiliana kuona namna bora ya kuandaa wataalamu na kubadilishana mawazo kwa lengo la kuboresha elimu ya sheria kuwa bora zaidi katika nchi yetu.

Jaji Kiongozi aliongeza kuwa, Baraza linapokea mitaala na kuipitisha, tumeshughulikia mitaala mingi ya vyuo mbalimbali ukiondoa Shule ya Sheria. Baraza litaendelea na ziara ya kutembelea vyuo katika mikoa ya Kilimanjaro na Arusha ifikapo mwezi wa Oktoba mwaka huu.

Jaji Kiongozi akatolea ufafanuzi baadhi ya maombi yaliyotolewa na shule ya sheria ya nafasi ya Baraza la Elimu ya Sheria kushughulikia kwa haraka mtaala huo mpya utakapofika wa shule ya sheria. Baraza limewahakikishia shule ya sheria kuwa linausubiri mtaala huo, watakapo umaliza na kuwasilishwa kwa Baraza. Baraza halitakuwa kikwazo katika kuhakikisha kwamba shule ya sheria inatimiza kile walichokidhamiria kwa kuwa na mtaala mpya utakaojibu changamoto nyingi zilizokuwepo.

“Sisi tutakaa mara moja baada ya kupokea kutoka kwenu, kwa hiyo mkituletea mwezi wa tisa tutatafuta nafasi yetu na Baraza kama nilivyosema halina Sekretarieti ya kudumu tunategemea wataalamu wetu walewale ambao ni wajumbe kwa kuunda kamati ndani yake ili wapewa andiko wasome baadae wanawasilisha mapendekezo mbele ya Baraza tunajadiliana hatimaye tunapitisha,” alisema Jaji Kiongozi.

Akiwasilisha ujumbe kutoka Baraza la Shule ya Sheria kwa Jaji Kiongozi kwa niaba ya Mwenyekiti wa Bodi ya shule hiyo, Mhe. Clement Mashamba ambaye ni Kaimu Mkuu wa Shule Idara ya Mafunzo alitoa pongezi na shukrani nyingi kwa Mahakama kuwawezesha kupata huduma za maeneo ya kufanyia mikutano ya kukusanyia maoni ya kuboresha mtaala huo mpya katika maeneo mbalimbali nchini takribani katika Masjala zote za Mahakama nchini walikotembelea.

“Kamati iliketi pale Mahakama Kuu Dodoma kwa takribani wiki mbili chini ya Mwenyekeiti wetu Mhe. Dkt. Jaji Masabo tuliwezeshwa kutumia vifaa vya kisasa katika ukumbi ule na tulifanya majukumu yet huku mahakama inaendelea bila mwingiliano wowote na kwa utulivu wa kutosha naipongeza Mahakama kwa kuwa na miundombinu bora,” aliongeza Mhe. Dkt. Mashamba

Mhe. Dkt. Mashamba akasema jambo kubwa lililowafikisha Ofisini kwa Jaji Kiongozi ni kukuomba kama Mwenyekiti wa Baraza la Shule ya Sheria na Mahakama inayoendelea kutupa ushirikianao mkubwa, kwa mujibu wa sheria ya Mawakili na ya Shule ya Sheria shughuli zote zinaendeshwa chini ya Baraza la Shule ya Sheria.

Kutokana na mapendekezo ya Tume ya Mhe.Dkt. Mwakyembe ilihoji kwamba mtaala unaotumika wa 2011 kama ulipelekwa katika Baraza la shule ya sheria ili upitishwe lakini kutokana na hadidu rejea zilizopo hazikuonyesha nafasi ya Baraza la Shule ya Sheria kushiriki kikamilifu katika mtaala uliopo.

“Tume ikapendekeza kwamba katika mtaala unaoandaliwa ni sharti kamati ifanye kazi bega kwa bega na Baraza la Shule ya Sheria, tunashukuru kwamba katika hatua zote tumekuwa tukishirikiana na pia kamati iliundwa na mjumbe mmoja kutoka Baraza la Shule ya Sheria na mwakilishi wa sekretarieti”, aliongeza Dkt. Mashamba

Mhe. Mashamba amesema mtaala huo mpya umeshakamilika kwa kupitia hatua zote ispokuwa moja ambayo ni kuwaalika wadau wote wa nje kwa ajili ya kuupitia na kutoa mapendekezo hatua itakayofanyika wiki hii na wakiridhia ndipo tutauwasilisha rasmi katika Baraza la Shule ya Sheria kwa ajili ya baraka na kama kuna maelekezo zaidi ya kitalamu. Kwa muongozo wa sheria ya shule ya sheria mtaala huo unapaswa kupewa ithibati na Bodi ya shule ya sheria ambayo inatarajiwa kuketi tarehe 13 mwezi Oktoba, 2023.

Hivyo dhamira ya Bodi inakuomba kusaidia mchakato huu ukamilike mwaka huu ili wanafunzi watakao dahiliwa mwakani waanze masomo yao kwa kutumia mtaala huo mpya. Mtaala huo umeandaliwa kwa kuzingatia maeneo ya umahiri katika taaluma. Pia mtaala huo unatolea ufumbuzi wa matatizo yaliyokuwepo kwa zaidi ya asilimia 70.

Mhe.Dkt. Mashamba akaiomba Mahakama kuendeleza ushirikiano wa kutoa wakufunzi wa kufundisha kwani takribani asilimia 50 ya wakufunzi bado wanatoka Mahakama ya Tanzania katika mafunzo ya hatua mbalimbali kwa wanafunzi wa shule ya sheria, kwani mtaala mpya utategemea vitendo zaidi kuliko nadharia.

Pia ujumbe huo ukaiomba Mahakama kuwapa kipaumbele wanafunzi wa shule ya sheria wigo mpana wa kufanya mazoezi kwa vitendo ‘Field Attachment’ katika Mahakama mbalimbali hapa nchini kwani mtaala mpya utamtaka mwanafunzi walau kufanya nusu ya mazoezi yake yawe mahakamani ili kuwajengea uwezo mzuri na umahiri wa kufanya kazi za kitaaluma na kuimarisha maadili ya kiwakili ambayo kwa sasa yanamomonyoka sana, alisema Mhe. Dkt. Mashamba.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani akitolea ufafanuzi hoja mbalimbali wakati wa mkutano mfupi wakati alipotembelewa Ofisini kwake jijini Dar es Salaam na Ujumbe wa Viongozi kutoka Shule ya Sheria (hawapo pichana) mapema leo tarehe 21 Agosti, 2023 na kuuhakikishia Ujumbe huo kuendelea kushirikiana katika masuala mbalimbali yanayohusu Shule ya Sheria nchini.

Msajili wa Mahakama Kuu ya Tanzania na Katibu wa Baraza la Shule ya Sheria Mhe. Sharmillah Said Sarwatt (aliyesimama) akitoa utambulisho mfupi kwa Wajumbe kutoka Shule ya Sheria mara walipo mtembelea Jaji Kiongozi wa Mahakama Kuu ya Tanzania, Mhe. Mustapher Siyani Ofisini kwake  Mahakama Kuu jijini Dar es salaam.

Jaji Mstaafu wa Mahakama Kuu ya Tanzania na Mjumbe mwelekezi na Mtaalamu wa kuuisha Mtaala Mpya wa Shule ya Sheria nchini, Mhe. Dkt. Fauz Twaib akifafanua jambo wakati wa mkutano huo.

 Mhe. Dkt. Clement Mashamba ambaye ni Kaimu Mkuu wa Shule ya sheria, Idara ya Mafunzo kwa niaba ya Mwenyekiti wa Bodi ya shule hiyo akiwasilisha hoja mbalimbali kwa Mwenyekiti wa Baraza la sheria nchini na Jaji Kiongozi wa Mahakama Kuu ya Tanzania, Mhe. Mustapher Mohamed Siyani (hayupo pichani) walipomtemebelea Ofisini kwake.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (mbele) akitolea ufafanuzi hoja mbalimbali wakati wa mkutano mfupi alipotembelewa Ofisini kwake jijini Dar es Salaam na Ujumbe wa Viongozi kutoka Shule ya Sheria.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (watatu kutoka kulia) akiwa kwenye picha ya pamoja na Ujumbe wa Viongozi Waandamizi kutoka Shule ya Sheria nchini mara baada ya kuhitimisha mkutano mfupi wakati alipotembelewa Ofisini kwake jijini Dar es Salaam.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (watano kutoka kushoto) akiwa kwenye picha ya pamoja na Ujumbe wa Viongozi Waandamizi kutoka Shule ya Sheria nchini pamoja na Wajumbe wa Baraza la Shule ya Sheria mara baada ya kuhitimisha mkutano mfupi wakati alipotembelewa Ofisini kwake jijini Dar es Salaam.

Jaji Kiongozi wa Mahakama Kuu ya Tanzania, Mhe. Mustapher Mohamed Siyani (kushoto) akisalimiana na  Jaji Mstaafu wa Mahakama Kuu ya Tanzania na Mjumbe mwelekezi na Mtaalamu wa kuuisha Mtaala Mpya wa Shule ya Sheria nchini, Mhe. Dkt. Fauz Twaib (kulia) mara walipokutana ofisini kwa Jaji Kiongozi jijini Dar es salaam mapema leo, wengine ni Wajumbe na Viongozi waandamizi wa Shule ya Sheria.

                               Picha na Innocent Kansha - Mahakama