JAJI KIONGOZI MAHAKAMA UGANDA AWASILI NCHINI KWA ZIARA YA KIKAZI

·Kuteta na mwenyeji wake Mustapher Siyani

·Kujionea jengo jipya Makao Makuu ya Mahakama Tanzania

Na. Faustine Kapama-Mahakama

Jaji Kiongozi wa Mahakama Kuu Uganda, Mhe. Dkt.Flavian Zeija leo tarehe 15 Agosti, 2023 amewasili nchini kwa ziara ya siku tano ya kikazi kuitembelea Mahakama ya Tanzania kwa malengo mbalimbali.

Akiwa katika Uwanja wa Ndege wa Kimataifa wa Mwalimu Nyerere, Mhe Zeija alipokelewa na Jaji wa Mahakama Kuu ya Tanzania, Masjala Kuu, Mhe. Latifa Mansoor pamoja na viongozi wengine wa Mahakama, akiwemo Naibu Msajili Mwandamizi wa Mahakama Kuu, Masjala Kuu, Mhe. Arnold Kerikeano.

Taarifa iliyotolewa inaonyessha katika siku ya pili ya ziara yake, Mhe Dkt. Zeija atakutana na mwenyeji wake, Jaji Kiongozi wa Mahakama Kuu ya Tanzania, Mhe. Mustapher Mohamed Siyani na kufanya naye mazungumzo mafupi katika ofisi yake katika jengo la Mahakama Kuu jijini Dar es Salaam.

Akiwa katika ofisi hiyo, Jaji Kiongozi wa Mahakama Kuu Uganda ambaye ameambatana na Katibu Mkuu wa Mahakama Uganda, Dkt. Pius Bigilimana atapokea taarifa ya maboresho ya Mahakama kutoka Kitengo cha Maboresho (JDU) na taarifa ya usimamizi wa mashauri na utendaji wa Mahakama itakayotolewa na Kurugenzi ya Usimamizi wa Mashauri.

Mhe. Dkt. Zeija pia atatembelea Kituo cha Uendeshaji wa Mtandao cha Mahakama ya Tanzania kabla ya kuelekea katika Kituo Jumuishi cha Utoaji Haki cha Masuala ya Familia Temeke na kupata maelezo mafupi kuhusu Kituo hicho na baadaye kujionea namna Mahakamaa Inayotembea inavyofanya kazi.

Katika siku ya tatu ya ziara yake, Mhe. Zeija ataelekea jijini Dodoma kutembelea Kituo Jumuishi cha Utoaji Haki Dodoma na pia kujionea jengo jipya la Makao Makuu ya Mahakama ya Tanzania ambalo lipo katika maeneo ya Tambuka Reli.

Siku ya nne ya ziara yake, Jaji Kiongozi Uganda atarudi jijini Dar es Salaam kwa shughuli zingine za kimahakama na siku ya tano atarudi Uganda. Ziara hii ni sehemu ya ushirikiano kati ya Mahakama ya Tanzania na Mahakama ya Uganda na ujirani mwema kati ya nchi hizi mbili. 

Hii ni mara ya pili kwa viongozi wakuu wa Mahakama Uganda kuitembelea Mahakama ya Tanzania. Ziara ya kwanza ilifanywa na Jaji Mkuu wa Uganda, Mhe. Alfonse Chigamoy Owiny-Dollo tarehe 24 Mei 2022 kwa lengo la kubadilishana uzoefu wa mambo mbalimbali.

Mhe Owiny-Dollo alikutana na mwenyeji wake, Jaji Mkuu wa Tanzania, Mhe. Prof. Ibrahim Hamis Juma ofisini kwake jijini Dar es Salaam na baada ya maongezi mafupi yenye lengo la kujenga ushirikiano katika masuala mbalimbali ya kimahakama alielekea Tanga kutembelea Chuo cha Uongozi wa Mahakama Lushoto.

Akiwa Lushoto, Jaji Mkuu Uganda na ujumbe wake alitapata fursa ya kubadilishana uzoefu na viongozi wa Chuo hicho, ikiwemo namna kinavyofanya kazi.

Jaji wa Mahakama Kuu ya Tanzania, Masjala Kuu, Mhe. Latifa Mansoor (juu na chini) akisalimiana na Jaji Kiongozi wa Mahakama Kuu Uganda, Mhe. Dkt.Flavian Zeija (kushoto) baada ya kuwasili katika Uwanja wa Ndege wa Kimataifa wa Mwalimu Nyerere leo tarehe 15 Agosti, 2023 kwa ziara ya kikazi.

Naibu Msajili Mwandamizi wa Mahakama Kuu, Masjala Kuu, Mhe. Arnold Kerikeano (juu na chini) akimwongoza Jaji Kiongozi wa Mahakama Kuu Uganda, Mhe. Dkt.Flavian Zeija kuelekea kwenye chumba maalum cha kupumzikia baada ya kuwasili.

Jaji wa Mahakama Kuu ya Tanzania, Masjala Kuu, Mhe. Latifa Mansoor (juu na chini) akiteta jambo na mgeni wake, Jaji Kiongozi wa Mahakama Kuu Uganda, Mhe. Dkt.Flavian Zeija (kulia) 

Jaji Kiongozi wa Mahakama Kuu Uganda, Mhe. Dkt.Flavian Zeija (katikati) akibadilishana mawazo na Jaji wa Mahakama Kuu ya Tanzania, Masjala Kuu, Mhe. Latifa Mansoor (kushoto) pamoja na Katibu Mkuu wa Mahakama Uganda, Dkt. Pius Bigilimana (kulia).

Jaji wa Mahakama Kuu ya Tanzania, Masjala Kuu, Mhe. Latifa Mansoor (kushoto) na Jaji Kiongozi wa Mahakama Kuu Uganda, Mhe. Dkt.Flavian Zeija wakiondoka katika Uwanja wa Ndege wa Kimataifa wa Mwalimu Nyerere. Katikati ni Katibu Mkuu wa Mahakama Uganda, Dkt. Pius Bigilimana.