JAJI KIONGOZI UGANDA AJIONEA HIFADHI MAKUMBUSHO YA TAIFA, KIJIJI CHA MAKUMBUSHO

·Atembelea pia Chuo Kikuu cha Dar es Salaam

Na. Faustine Kapama-Mahakama

Ziara ya Jaji Kiongozi wa Mahakama Kuu ya Uganda, Mhe. Dkt. Flavian Zeija na ujumbe wake imeingia siku ya nne leo tarehe 18 Agosti, 2023 ambapo ametembelea maeneo mbalimbali ya jiji la Dar es Salaam, ikiwemo Chuo Kikuu cha Dar es Salaam, sehemu ambayo alipatia Shahada ya Udakitari wa Sheria.

Maeneo mengine aliyotembelea ni Posta kwenye mzunguko wa Askali Monament, Makumbusho ya Taifa pamoja na Kijiji cha Makumbusho kilichopo Kijitonyama, Wilaya ya Kinondoni.

Ziara yake ilianza kwa kutembelea kwenye mzunguko wa Askali Monament na kupata  maelezo mafupi kutoka kwa wenyenji wake, akiwemo Msajili wa Mahakama Kuu ya Tanzania, Mhe. Sharmillah Sarwatt na Mtendaji wa Mahakama Kuu-Divisheni, Bi. Mary Shirima, kabla ya kuelekea Makumbusho ya Taifa.

Akiwa katika Makumbusho hayo, Mhe. Dkt. Zaija ambaye aliambatana na Katibu Mkuu wa Mahakama ya Uganda, Dk. Pius Biligimana alijionea historia mbalimbali zilizohifadhiwa katika eneo hilo, ikiwemo magari aliyowahi kuyatumia Baba wa Taifa na Rais wa Kwanza wa Jamhuri ya Muungano wa Tanzania, Mwalimu Julius Kambalage Nyerere wakati wa uongozi wake.

Baadaye Jaji Kiongozi wa Uganda alielekea katika Kijiji cha Makumbusho Kijitonyana na kujionea nyumba za makabila mbalimbali kabla ya kupata burudani kutoka kwenye Kikundi cha Ngoma cha Mpolo Dancing Troupe.

Akiwa katika Kijiji hicho, Mhe. Dkt. Zeija alielezea kufurahishwa na hifadhi hiyo ambayo ni kumbukumbu muhimu kwa vizazi vya sasa na vijavyo. Amesema kumbukumbu iliyohifadhiwa katika Kijiji hicho inatoa fundisho kubwa kuwa Afrika ni moja na jinsi mababu zetu walivyokuwa na welevu wa kutosha katika kuimarisha ustawi katika jamii.

“Kwa kuangalia Kijiji hiki inaonyesha tu kwamba sisi ni wamoja. Lakini pia kinaonyesha umuhimu wa kuhifadhi utamaduni. Hii ni kwa sababu watoto wetu wanaweza kuwa hawakuishi kuishi katika nyumba hizi na wasingejua. Lakini tunapokuwa na hifadhi kama hizi watoto wetu watajua jinsi mababu zao walivyokuwa wanaishi,” amesema.

Baadaye, Jaji Kiongozi wa Uganda na jumbe wake alielekea katika Chuo Kikuu cha Dar es Salaam na kupokelewa na Kaimu Mkuu wa Chuo ambaye pia ni Mkurugenzi wa Masomo ya Uzamili, Prof. Donatha Tibuhwa na baadaye kukutana na Mwalimu wake, Mkuu wa Kitivo cha Sheria katika Chuo hicho, Dkt. Sosithenes Materu.

Jaji Kiongozi wa Mahakama Kuu ya Uganda, Mhe. Dkt. Flavian Zeija (anayenyoosha mikono) akiwa katika maeneo ya Posta kwenye mzunguko wa Askali Monament. Katikati ni Katibu Mkuu wa Mahakama ya Uganda, Dk. Pius Biligimana.

Jaji Kiongozi wa Mahakama Kuu ya Uganda, Mhe. Dkt. Flavian Zeija akipata maelezo mafupi alipokuwa katika Kijiji cha Makumbusho Kijitonyama. Chini akiwa katika picha ya pamoja na ujumbe wake na sehemu ya watumishi wa Kijiji hicho.

Jaji Kiongozi wa Mahakama Kuu ya Uganda, Mhe. Dkt. Flavian Zeija pamoja na ujumbe wake (juu na chini) akiwa katika Makumbusho ya Taifa.

Jaji Kiongozi wa Mahakama Kuu ya Uganda, Mhe. Dkt. Flavian Zeija akipokelewa katika Chuo Kikuu cha Dar es Salaam na Mwalimu wake, Mkuu wa Kitivo cha Sheria katika Chuo hicho, Dkt. Sosithenes Materu (mwenye shati la rangi ya bluu).

Jaji Kiongozi wa Mahakama Kuu ya Uganda, Mhe. Dkt. Flavian Zeija akifurahia jambo na Kaimu Mkuu wa Chuo ambaye pia ni Mkurugenzi wa Masomo ya Uzamili, Prof. Donatha Tibuhwa. Picha chini akiteta jambo na Mwalimu wake, Mkuu wa Kitivo cha Sheria katika Chuo hicho, Dkt. Sosithenes Materu.