JAJI MAKUNGU AAPISHWA KUWA JAJI MAHAKAMA YA HAKI AFRIKA MASHARIKI

Na FAUSTINE KAPAMA-Mahakama

Jaji wa Mahakama ya Rufani ya Tanzania, Mhe. Omar Makungu ameapishwa kuwa Jaji wa Mahakama ya Haki ya Afrika Mashariki, Divisheni ya Rufani.

Rais wa Burundi, ambaye ni Mwenyekiti wa Mkutano wa Wakuu wa Jumuiya ya Afrika Mashariki (EAC), Mhe. Évariste Ndayishimiye aliongoza hafla ya uapisho huo tarehe 22 Agosti, 2023 katika sherehe iliyofanyika Ikulu ya Ntare, Bujumbura, nchini Burundi.

Kwa mujibu wa tovuti ya Mahakama ya Haki ya Afrika Mashariki, kiapo cha Jaji huyo mpya kilitolewa na Naibu Msajili wa Mahakama hiyo, Mhe. Christine Mutimura, akisaidiwa na Wakili wa Jumuiya hiyo, Dkt. Anthony Kafumbe.

Jaji Makungu, ambaye kwa sasa ni Jaji wa Mahakama ya Rufani ya Tanzania, anachukua nafasi ya aliyekuwa Jaji katika Mahakama hiyo, Mhe. Sauda Mjasiri, ambaye amefikisha umri wake wa kustaafu.

Baada ya uapisho huo, Mwenyekiti wa Mkutano wa Wakuu wa Jumuiya ya Afrika Mashariki alimpongeza Jaji Makungu na kumtakia kheri katika kazi zake za kimahakama.

Hafla ya uapisho huo ilihudhuriwa na viongozi mbalimbali, akiwemo Ofisa Mkuu Ubalozi wa Tanzania nchini Burundi, Salvator Mbilinyi.

Wengine ni Waziri wa Sheria na Mwanasheria Mkuu wa Jamhuri ya Burundi, Domine Banyankimbona, Rais wa Mahakama ya Haki ya Afrika Mashariki, Jaji Nestor Kayobera na Katibu Mkuu wa Wizara ya Masuala ya Jumuiya ya Afrika Mashariki, Severin Mbarubukeye.

Mhe. Makungu aliteuliwa kushika wadhifa huo katika Mkutano wa Marais wa Nchi Wanachama wa Afrika Mashariki uliofanyika Bujumbura, Burundi tarehe 31 Mei, 2023.

Mkutano huo ulifanyika kujadili mambo mbalimbali, ikiwemo suala la usalama Mashariki wa Jamhuri ya Kidemokrasia ya Kongo (DRC).

Katika mkutano huo, kulifanyika pia uteuzi wa Majaji wengine, Mhe. Anita Mugeni kutoka Rwanda anayekuwa Makamu Rais wa Mahakama hiyo na Mhe. Kayembe Rene kutoka DRC ambaye anakuwa Jaji wa Mahakama katika Divisheni ya Awali.

Mhe. Makungu amewahi kuwa Jaji Mkuu wa Zanzibar kabla ya kuteliwa kuwa Jaji wa Mahakama ya Rufani ya Tanzania.

Jaji wa Mahakama ya Rufani ya Tanzania, Mhe. Omar Makungu ambaye ameapishwa kuwa Jaji wa Mahakama ya Haki ya Afrika Mashariki, Divisheni ya Rufani.

Jaji wa Mahakama ya Rufani ya Tanzania, Mhe. Omar Makungu (kushoto) akiwa katika picha ya pamoja na Rais wa Burundi, ambaye ni Mwenyekiti wa Mkutano wa Wakuu wa Jumuiya ya Afrika Mashariki (EAC), Mhe. Évariste Ndayishimiye.

Jaji wa Mahakama ya Rufani ya Tanzania, Mhe. Omar Makungu (kushoto) akiwa katika picha ya pamoja na Rais wa Burundi, ambaye ni Mwenyekiti wa Mkutano wa Wakuu wa Jumuiya ya Afrika Mashariki (EAC), Mhe. Évariste Ndayishimiye (katikati) na Rais wa Mahakama ya Haki ya Afrika Mashariki, Jaji Nestor Kayobera.

Naibu Msajili wa Mahakama Haki ya Afrika Mashariki, Mhe. Christine Mutimura.

Jengo la Jumuisha ya Afrika Mashariki.