MAHAKAMA KIGOMA YAFANYA TATHIMINI YA UTENDAJI

Na Aidan Robert-Mahakama, Kigoma

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha hivi karibuni aliongoza kikao cha Kamati ya Uongozi Kanda ya Kigoma kutathimini utendaji kazi na kuweka mikakati ya utekelezaji wa shughuli za Mahakama.

Kikao hicho kilichohudhuriwa na Jaji wa Mahakama Kuu ya Tanzania, Kanda ya Kigoma, Mhe. Stephen Magoiga na wajumbe wengine kutoka Mahakama ya Hakimu Mkazi Kigoma, Mahakama za Wilaya Kigoma, Kibondo, Kasulu, Uvinza, Kakonko na Buhigwe kilifanyika katika ukumbi wa Mahakama ya Wilaya Buhigwe.

Akizungumza wakati anafungua kikao hicho, Jaji Mfawidhi aliwataka wajumbe kuendelea kusimamia na kutekeleza kikamilifu maelekezo yaliyotolewa na Viongozi wa Mahakama kupitia waraka wa Jaji Mkuu 1/2023 na Waraka wa Jaji Kiongozi Na. 3/2019.

Nyaraka hizo zinahusu utoaji wa nakalau za hukumu na kuchapa mienendo ya mashauri ndani ya siku 14 na utumaji wa majalada yanayoitishwa na Mahakama za juu ndani ya siku 21.

Katika kikao hicho, Mhe. Mlacha aliushukuru Uongozi wa Mahakama ya Tanzania kwa namna ulivyoutafsiri kwa vitendo Mpango Mkakati wa Mahakama (2020/2021–2024/2025) Kanda ya Kigoma kwa kuongeza na kujenga majengo mapya matatu, kununua magari manne na kuleta watumishi wapya 11 wa kada mbalimbali, hatua itakayowezesha utekelezaji wa dira ya Mahakama ya Utoaji wa Haki kwa wakati.

“Tumepata majengo mapya, vyombo vya usafiri na waajiriwa wapya. Tunapaswa kuyatunza majengo haya na vyombo vya usafiri na kuwalea vyema waajiriwa hawa wapya,” alisema.

Wajumbe wa kikao walipata fursa pia ya kupata mafunzo jinsi ya kushughulikia malalamiko kimtandao (e-Complaints) yaliyotolewa na Afisa TEHAMA, Bw. Prosper Mahalala.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha akisisitiza jambo wakati wa kikao kazi cha Viongozi wa Mahakama Kanda ya Kigoma.

Jaji wa Mahakama Kuu Kigoma, Mhe. Stephen Magoiga akitia saini katika kitabu cha wageni katika ofisi ya Hakimu Mkazi Mfawidhi Mahakama ya Wilaya Buhigwe.

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha akisalimiana na Mahakimu Wakazi Wafawidhi wa Mahakama za Wilaya Mkoa wa Kigoma.

Jaji wa Mahakama Kuu Kigoma, Mhe. Stephen Magoiga akisalimiana na Mahakimu Wakazi Wafawidhi wa Mahakama za Wilaya Mkoa wa Kigoma.

 (Habari hii imehaririwa na FAUSTINE KAPAMA-Mahakama)