USIKILIZAJI KESI ZA MAUAJI MAHAKAMA KUU MOROGORO WAIVA

Na Evelina Odemba – Mahakama Morogoro

Jaji wa Mahakama Kuu ya Tanzania, Kanda ya Morogoro, Mhe. Messeka Chaba leo tarehe 24 Agosti, 2023 ameendesha kikao cha maandalizi ya awali ya vikao vya kusikiliza mashauri ya mauaji.

Kikao hicho kilichofanyika katika Ukumbi wa Mkutano ulipo katika Jengo la Kituo Jumuishi cha Utoaji Haki Morogoro kiliwajumuisha wadau mbalimbali wa wa haki jinai ambao ni wahusika katika kesi zitakazosikilizwa. Walikuwepo pia viongozi upande wa utawala, akiwemo Mtendaji wa Mahakama Seleman Ng’eni.

Akizungumza wakati wa ufunguzi wa kikao hicho, Mhe. Chaba alisema wamekutana kuweka mikakati ya pamoja ya kufanikisha usikilizwaji wa mashauri, ikiwemo kujua kama kuna mapungufu yeyote ili yaweze kurekebishwa mapema.

Aliwaomba wadau wote kutoa ushirikiano na mchango wao wa mawazo kuwezesha mashauri yote kusikilizwa ndani ya muda uliopangwa. Alisisitiza kuwa ikitokea changamoto yeyote wakati vikao vinaendelea wasisite kuitolea taarifa ili iweze kutatuliwa mapema.

“Natambua kuwa sisi wote ni binadamu, wakati mwingine kuna dharura zinajitokeza, hivyo msisite kutoa taarifa mapema na haitachukuliwa kama mwanya wa kukwamisha vikao hivi,” Mhe. Chaba alisisitiza na kutoa shukurani kwa ushirikiano anaoupata toka kwa wadau hao.

Awali, wakati akisoma taarifa ya kikao hicho, Naibu Msajili wa Mahakama Kuu katika Kanda hiyo, Mhe. Augustina Mmbando alisema kuwa jumla ya mashauri 12 yamepangwa kusikilizwa kwenye kikao kitakachoanza tarehe 28 Agosti hadi tarehe 29 Septemba, 2023 mbele ya Mhe. Chaba.

Alisema kuwa kati ya mashauri hayo, 11 yanahusu mauaji ya kukusudia na shauri moja ni la mauaji ya kutokukusudia. “Ni matarajio yetu kupitia kikao hiki sote tutashiriki kuhakikisha mashauri yote 12 yaliyopangwa yanasikilizwa na kumalizika kwa wakati. Niwaombe wote tufike mahakamani kwa wakati,’’ alisema.

Kikao kingine kitakuwa chini ya Jaji Mfawidhi wa Mahakama Kuu ya Tanzania, Mhe. Paul Ngwembe ambaye anatarajia kusikiliza mashauri 11 huko wilayani Kilombero.

Naye Mkuu wa Ofisi ya Mashtaka Kanda ya Morogoro, Bi. Neema Haule alisema kuwa ofisi yake imejipanga vizuri, wameyasoma majalada ya mashauri hayo vizuri na wamejiandaa kuleta mashahidi.

Jaji wa Mahakama Kuu ya Tanzania, Kanda ya Morogoro, Mhe. Messeka Chaba akiendesha kikao cha maandalizi ya vikao vya kesi za mauaji.

Naibu Msajili wa Mahakama Kuu ya Tanzania, Kanda ya Morogoro, Mhe. Augustina Mbando akieleza jambo wakati wa kikao hicho.

Sehemu ya wadau watakaoshiriki katika vikao vya kesi za mauaji wakifuatilia kikao cha maandalizi.

Mkuu wa Ofisi ya Taifa ya Mashtaka Kanda ya Morogoro, Bi. Neema Haule (wa kwanza kushoto) na kulia kwake ni Mtendaji wa Mahakama Kuu ya Tanzania Kanda ya Morogoro Selemani Ng’eni wakifuatilia kikao vya maandalizi ya vikao vya kesi za mauaji.

Makarani watakaoingia mahakamani katika vikao vya kesi za mauaji, Bi. Juster Tibendelana (kulia) na Bw. Boniphace Masubo (kushoto)wakiwa katika kikao hicho.

Washiriki wa kikao cha maandalizi (juu na chini) wakifuatilia hoja mbalimbali zilizokuwa zinaendelea kutolea.

(Habari hii imehaririwa na FAUSTINE KAPAMA-Mahakama).