JAJI MFAWIDHI KIGOMA AHIMIZA MAZOEZI KWA WATUMISHI

Na Aidan Robert-Mahakama, Kigoma

Jaji Mfawidhi wa Mahakama Kuu ya Tanzania, Kanda ya Kigoma, Mhe. Lameck Mlacha ametoa wito kwa watumishi wote wa Mahakama mkoani Kigoma kuweka utaratibu wa kufanya mazoezi ili kuimarisha afya na kujiepusha na magonjwa yasiyoambukiza.

Mhe. Mlacha alitoa wito huo hivi karibuni kwenye Bonanza lililokutanisha pamoja timu ya watumishi wa Mahakama mkoani Kigoma na timu ya mpira wa miguu kwa watumishi wa Halmashauri ya Wilaya Buhigwe.

“Niwaombe Waratibu wa vikao vijavyo mtuandalia michezo tukikutana ili kuimarisha afya na mahusiano baina ya taasisi” alisema.

Naye Jaji wa Mahakama Kuu Kigoma, Mhe. Stephen Magoiga, aliwajulisha washiriki wa Bonanza hilo kujenga utamaduni wa kufanya mazoezi mara kwa mara.

Alibainisha kuwa yeye pamoja na Jaji Mfawidhi kila siku alfajiri wanafanya mazoezi kwa kutembea wastani wa kilomita tano kwenye vilima, hivyo ni vizuri kuiga mfano huo.

Kwa upande wake, Naibu Msajili wa Mahakama Kuu Kanda ya Kigoma, Mhe Gadiel Mariki, ambaye alikuwa sehemu ya wachezaji wa timu ya Mahakama hiyo alijizolea umaarufu baada ya mashabiki kumpachika jina la mchezaji maarufu wa timu ya Yanga ‘Skudu’ kutokana na aina ya uchezaji wake.

Mtanange huo uliokuwa wa vuta ni kuvute uliisha kwa Mahakama Kigoma kupoteza mchezo huo kwa idadi ya magoli mawili kwa nunge.  Wachezaji wamemuahidi Jaji Mfawidhi kuwa watasahihisha makosa madogo yaliyotokea ili kuchagiza ushindi katika mechi zijazo, kwani mchezo huo umekuwa funzo kwao.

Hakimu Mkazi Mfawidhi wa Mahakama ya Wilaya Buhigwe, Mhe. Katoki Mwakitalu, aliishukulu timu pinzani kwa kukubali kushiriki kwenye mchezo huo ambao ni sehemu ya kukuza mahusiano mema na wadau katika Wilaya hiyo.

Jaji Mfawidhi Mahakama Kuu ya Tanzania, Kanda ya Kigoma, Mhe. Lameck Mlacha akisalimiana na Golikipa wa Timu ya Mahakama, Hakimu Mkazi Mfawidhi Mahakama ya Wilaya Kibondo, Mhe. Maila Makonya.

Jaji Mfawidhi Mahakama Kuu ya Tanzania, Kanda ya Kigoma, Mhe. Lameck Mlacha akitambulishwa mchezaji namba nane wa Timu ya Mahakama, Afisa Utumishi wa Mahakama Kuu Kigoma Festo Sanga.

Kikosi cha Timu ya Mahakama.

Timu ya Halmashauri ya Wilaya ya Buhigwe.

Jaji Mfawidhi Mahakama Kuu ya Tanzania, Kanda ya Kigoma, Mhe. Lameck Mlacha akifuatilia pamoja na Jaji Stephen Magoiga na Hakimu Mkazi Mfawidhi wa Mahakama ya Hakimu Mkazi Kigoma, Mhe Rose Kangwa, mchezo wa kirafiki wa mpira wa miguu kati ya Timu ya Mahakama na Timu ya Halmashauri ya Wilaya ya Buhigwe katika uwanja wa Shule ya Msingi Buhigwe.

(Habari hii imehaririwa na FAUSTINE KAPAMA-Mahakama)