JMAT PWANI WAPIGA NDEGE WATATU KWA JIWE MOJA

·        Wafanya kikao cha mwaka

·        Wapigwa msasa katika mashauri ya utekelezaji, mirathi

·        Wafanya hafla ya kuwaaga wenzao 

Na Eunice Lugiana-Mahakama, Kibaha 

Chama cha Majaji na Mahakimu Tanzania (JMAT) katika Mkoa wa Pwani jana tarehe 4 Agosti, 2023 kimefanya mkutano wa mwaka, kujadili mambo mbalimbali ya kiutendaji baada ya kupata mafunzo katika maeneo muhimu yanayohusu ukazaji na utekelezaji wa hukumu na masuala ya mirathi.

Kadhalika, kulifanyika hafla fupi katika ukumbi wa VIP lounge Ruvu -JKT Mlandizi Kibaha kwa ajili ya kuwaanga wenzao ambao wamehamia sehemu mbalimbali katika utumishi wa Mahakama.  

Kabla ya kuzama katika Mkutano huo wa mwaka, wajumbe walipata mafunzo kutoka kwa mwezeshaji ambaye ni Naibu Msajili wa Mahakama Kuu ya Tanzania, Kanda ya Dar es salaam, Mhe. Elimo Masawe.

Mhe. Masawe aliwaeleza wajumbe hao kuwa kila maamuzi yanayofanyika ni lazima Hakimu ahakikishe amesoma sheria na kuielewa inataka afanye nini na aamue nini na mwisho atoe maamuzi sahihi kwa mujibu wa sheria na sio matakwa yake.

Alieleza Hakimu sio Refarii au Kamisaa anayesubiri kupuliza filimbi pale makosa yanapotokea na kusema nani kashinda na nani kashindwa, bali yeye ni mtu anayetakiwa kuongoza ili kufika mahali ambapo ataona nani amethibitisha madai yake na sio nani ameshinda au ameshindwa.

Naibu Msajili aliwataka wafawidhi wote kabla ya kuanza usikilizaji wa shauri kujiridhisha kama madai yaliyoletwa mbele yao yako kisheria na yamekidhi matakwa yote ya sheria.

Baada ya mafunzo hayo, Mwenyekiti ya JMAT Pwani, ambaye pia ni Hakimu Mkazi Mkuu Mfawidhi wa Mahakama ya Hakimu Mkazi Kibaha Pwani, Mhe. Joyce Mkhoi alimshukuru Mhe. Masawe kwa kuwafundisha na kuwakumbusha wajibu wao katika kazi.

Alimuomba Naibu Msajili Masawe asichoke pindi watakapomhitaji tena kutoa elimu katika maeneo mbalimbali yanayohusu utoaji haki.

Baada ya mafunzo hayo, Kikao cha Mwaka kiliendelea ambapo wajumbe waliongelea masuala ya ushirikiano na kusaidia katika hali zote na kuimarisha ufanisi katika utendaji kazi wa kila siku. Akiongelea jambo hilo, Katibu wa Chama hicho Mkoa wa Pwani, ambaye pia ni Hakimu Mkazi Mwandamizi Mfawidhi Mahakama ya Wilaya Mkuranga, Mhe. Herieth Mwailolo alisema.

“....kuna baadhi yetu ambao wametutangulia wanaweza kuwa msaada mkubwa sana, tuwatumie hao na wao wakati mwingine wakikutana na kitu ambacho sio sahihi watuite na kutushauri, hii itasaidia sana kuleta ufanisi wa kazi zetu.”  

Baada ya Mkutano huo, kulifanyika hafla fupi ya kuwaanga watumishi saba waliohamishwa vituo vya kazi. Katika halfa hiyo, waaga watatu wameenda kuwa wasaidizi wa Majaji na wengine kwenda katika Kituo Jumuishi Temeke.

Naibu Msajili wa Mahakama Kuu ya Tanzania, Kanda ya Dar es salaam, Mhe. Elimo Masawe akifafanua jambo.

Baadhi ya washiriki wa mafunzo yahusuyo mashauri ya utekeleaji na mirathi wakiwa katika Club ya JKT Ruvu Malandizi Kibaha.

Naibu Msajili wa Mahakama Kuu ya Tanzania, Kanda ya Dar es salaam, Mhe. Elimo Masawe (katikati) akiwa katika picha ya pamoja na Mwenyekiti wa JMAT, ambaye pia ni Hakimu Mkazi Mkuu Mfawidhi wa Mahakama ya Hakimu Mkazi Kibaha Pwani, Mhe. Joyce Mkhoi (Kulia)na Katibu wa JMAT, ambaye pia ni Hakimu Mkazi Mwandamizi Mahakama ya Wilaya Mkuranga, Mhe. Herieth Mwailolo (kushoto) na wanachama wengine.

Keki ya upendo kwa ajili aa waagwa.

Waagwaa wakiwa katika picha ya pamoja na Mwenyekiti wa JMAT Pwani, Mhe. Mhoi

(Habari hii imehaririwa na FAUSTINE KAPAMA-Mahakama)