KASI UMALIZAJI MASHAURI MAHAKAMA YA RUFANI SONGEA YASHANGAZA WANANCHI

Na Hasani haufi – Mahakama, Songea.

Jopo la Majaji wa Mahakama ya Rufani, likiongozwa na Jaji Mkuu wa Tanzania, Mhe. Prof. Ibrahim Hamis Juma, limekamilisha kusikiliza mashauri 33 kati ya 34 yaliyokuwa yamepangwa kwenye kikao kilichokuwa kinafanyika katika Masjala ndogo ya Mahakama hiyo Songea, Mkoa wa Ruvuma.

Majaji hao wamekamilisha kusikiliza mashauri hayo ya rufaa yanayohusu ubakaji, mauaji. matumizi mabaya ya madaraka na mengine kwa muda wa wiki mbili kuanzia tarehe 14 Agosti, 2023 hadi tarehe 25 Agosti, 2023, badala ya wiki tatu zilizokuwa zimeratibiwa hapo awali.

Kasi hiyo imeshangaza na kuibua hisia kubwa kutoka kwa wakazi wa Mkoa wa Ruvuma na kuamini kwamba jitihada za kuboresha majengo ya Mahakama kweli zinaendana na huduma bora na utoaji wa haki kwa wakati kwa wananchi.

Uchapakazi na weledi mkubwa wa Majaji hao wa Mahakama ya Rufani pia umechochea kumaliza kwa muda mfupi rundo la mashauri hayo ambayo yanahitaji umakini mkubwa wakati wa kuyasikiliza.

Aidha, ushirikiano wa watumishi wa Mahakama ya Rufani ya Tanzania pamoja na Mahakama Kuu ya Tanzania, Kanda ya Songea umechagiza kwa kiasi kikubwa kufanikisha zoezi hilo, ukiachilia mbali ugeni wa kikao hicho Songea.

Majaji wengine walioungana na Jaji Mkuu kusikiliza mashauri hayo ni Mhe. Dkt. Gerald Ndika, Mhe. Rehema Kerefu na Mhe. Sam Rumanyika. Katika kikao hicho ni shauri moja tu ambalo liliahirishwa hadi kikao kijacho kutokana na sababu kadhaa.

Tarehe 14 Agosti, 2023, Jaji Mkuu wa Tanzania alizindua kikao cha kwanza cha Mahakama ya Rufani na kufungua Masjala ndogo ya Mahakama hiyo Songea, hatua ambayo inatanua wigo wa upatikanaji wa haki karibu na wananchi.

Akizungumza wakati wa ufunguzi huo, Mhe. Prof. Juma alisema tukio hilo ni sehemu ya utekelezaji wa Mpango Mkakati wa Mahakama 2020/2021-2024/2025 katika kusogeza huduma ya utoaji haki karibu zaidi na wananchi.

Aliwaeleza wananchi waliofurika kushuhudia tukio hilo kuwa Mahakama ya Tanzania imejipanga kuikabili changamoto ya umbali unaowalazimu wananchi kutumia gharama na muda mwingi kufuata huduma ya haki.

Jaji Mkuu wa Tanzania, Mhe. Prof. Ibrahim Hamis Juma.

Mhe. Dkt. Gerald Ndika.

Mhe. Rehema Kerefu. 

Mhe. Sam Rumanyika. 

Jengo la Mahakama Songea linalotumika kama Masjala ndogo ya Mahakama ya Rufani. 

(Habari hii imehaririwa na FAUSTINE KAPAMA-Mahakama)