TIMU YA MAHAKAMA SHINYANGA YAPIMANA UBAVU NA WATUMISHI USHETU

Na Emmanuel Oguda-Mahakama, Shinyanga

Timu ya mpira wa miguu wanaume ya Mahakama Kuu Kanda ya Shinyanga (Mahakama FC) imejipima ubavu na timu ya mpira wa miguu wanaume ya Halmashauri ya Ushetu (Watumishi FC) kwenye mchezo wa kirafiki uliochezwa mwishoni mwa juma.

Katika mchezo huo uliofanyika katika viwanja vya Shule ya Sekondari Kom iliyopo katika Manispaa ya Shinyanga, Watumishi FC kutoka Ofisi ya Mkurugenzi Mtendaji Ushetu iliibuka washindi baada ya kuwabamiza Mahakama FC bao 1-0.

Bao hilo lilipachikwa kimyani katika  dakika ya 28 ya kipindi cha kwanza kupitia kwa mshambuliaji wao, Mwl. Rashid Kilingamoyo.

Katika kipindi cha kwanza, timu ya watumishi FC ilionekana kuchungulia mara kwa mara lango la Mahakama FC. Hata hivyo, golikipa wa Mahakama FC, John Japhet aliokoa mikwaju kadhaa iliyokuwa ikielekezwa langoni kwake.

Mashambulizi zaidi yalielekezwa kwenye lango la Mahakama FC ambapo katika dakika ya 43 ya mchezo, mchezaji wa Watumishi FC, Bazil Bazil aliachia shuti kali lililogongwa mwamba na kutoka nje ya uwanja. Hadi timu hizo zinakwenda mapumziko, Watumishi FC walikuwa wanaongoza kwa bao moja kwa nunge.

Kipindi cha pili kilianza kwa kasi ambapo Mahakama FC ilionekana kujipanga vyema baada ya kufanya mabadiliko katika safi ya ushambiliaji ambapo Hamza Mrutu alichukua nafasi ya Gustafu na kuongeza kasi ya mashambulizi kwenye lango la Watumishi FC.

Timu zote zilionekana kushambuliana kwa zamu kwani kila mmoja tayari alikuwa amewasoma wapinzani wake na mashambulizi yalielekezwa katika pande zote. Hadi dakika tisini za mchezo zinakamilika, Watumishi FC waliibuka washindi baada ya kuwafunga kwa mbinde Mahakama FC kwa bao 1 – 0.

Akiongea baada ya mchezo huo wa kirafiki kukamilika, Hakimu Mkazi wa Mahakama ya Mwanzo Lunguya Kahama, ambaye pia ni mchezaji wa Mahakama FC, aliipongeza timu ya Watumishi FC kwa kukubali kusafiri hadi mjini Shinyanga kushiriki katika mechi hiyo ya kirafiki.

Alisema mchezo huo ni hatua mojawapo waliyoichukua kuandaa timu ya Mahakama FC  ambayo itashiriki Bonanza kubwa la Michezo mwezi Novemba, 2023 linalotarajiwa kufanyika mjini Bukoba.

“Kupitia mechi hii, tayari sisi Mahakama FC tumejipima na tumeona ni wapi ambapo tunahitaji jitihada zaidi ili tuendelee kuimarika, niwapongeze sana Watumishi FC kwa ushindi wa bao 1 – 0 dhidi ya Mahakama FC, nasi tunaendelea kujipanga, tutawafuata Ushetu,’’ alisema.

Naye Katibu wa Watumishi FC, Mwl. Hamad Sule aliushukuru Uongozi wa Mahakama Kuu Kanda ya Shinyanga kwa kukubali timu hizo kushiriki mechi hiyo ya kirafiki ambayo kwa namna nyingine imezidi kuimarisha mahusiano baina ya Watumishi wa Mahakama na Watumishi wa Halmashauri.

“Niwapongeze sana, timu iko vizuri sana, katika historia ya timu yetu hatujawahi kumfunga mtu bao chini ya tatu, hivyo nyinyi mko vizuri, niwapongeze sana. Michezo ni afya, michezo ni furaha, michezo inaimarisha mahusiano baina miongoni mwa watumishi wa umma,’’ alisema.

Mahakama FC inaendelea na mazoezi yake kuelekea Bonanza la michezo litakalofanyika Bukoba, litakalojumuisha Kanda tano za Mahakama Kuu ambazo ni Bukoba (Mwenyeji), Mwanza, Shinyanga, Musoma na Tabora.

Kikosi cha timu ya mpira wa miguu (Mahakama FC) cha Mahakama Kuu Kanda ya Shinyanga katika picha ya pamoja.

Kikosi cha timu ya mpira wa miguu (Watumishi FC) cha Halmashauri ya Ushetu, Kahama katika picha ya pamoja.

Timu za Mahakama FC ya Shinyanga na Watumishi FC ya Ushetu katika picha ya pamoja.

Mshambuliaji wa Mahakama FC Hamza Mrutu akiwa katika jukumu la kuhakikisha mashambulizi dhidi ya watumishi FC ni ya moto.

Kocha wa Mahakama FC, Bw. Abdulmuuminu Mbaraka akiongea na wachezaji wa Mahakama FC (hawapo katika picha) wakati wa mapumziko. 

(Habari hii imehaririwa na FAUSTINE KAPAMA-Mahakama)