MAHAKAMA PWANI YAKOLEZA UTEKELEZAJI NGUZO YA TATU MPANGO MKAKATI

Na Eunice Lugiana-Mahakama, Kibaha

Wito umetolewa kwa wananchi kusema ukweli pindi wanapofikishwa mahakamani kwa tuhuma za makosa ya jinai, hatua itakayosaidia kupunguziwa adhabu.

Wito huu ulitolewa Hakimu Mkazi Mkuu Mfawidhi wa Mahakama ya Hakimu Mkazi Pwani, Mhe. Joyce Mkhoi alipokua akitoa elimu kwa wananchi waliohudhuria mahakamani hapo.

Mhe. Mkhoi alisema pengine mtu akiwa ametenda kosa katika mazingira tatanishi anapaswa kusema kweli wakati wa kujitetea ili Mahakama ione kama alifanya hivyo kwa kukusudia au bila kukusudia.

“Mfano, mtu ameokota bastola na akakamatwa nayo, inabidi aseme ukweli pindi ukifika wakati wa kujitetea ili Mahakama iweze kuona nia yake ya dhati na kufikiria kupunguza adhabu kwa mhusika,” Mhe. Mkhoi alisema.

Akiendelea kutoa elimu kuhusu makosa ya uhujumu uchumi, Hakimu Mfawidhi alieleza sheria ya uhujumu uchumi imekuwa ikifanyiwa marekebisho mara kwa mara kutokana na makosa hayo kuongezeka, hivyo kuongezeka pia adhabu.

Alisema adhabu ya hapo awali ilikua kulipa faini au kifungo, hivyo watu wengi waliweza kulipa faini na kuendelea kufanya uharifu tena.

“Kwa sasa adhabu ni kifungo kisichopungua miaka 20 na kisizozidi miaka 30. Lengo la kuongeza adhabu ni kuwafanya watu wajifunze na kutofanya makosa haya wakihofia adhabu kali,” alisema.

Mhe. Mkhoi amewaomba wananchi kuhudhuria mahakamani hapo ilikupata elimu itakayowasaidia kuepuka kutenda makosa pasipo kujua kama ni kosa. Aliwakumbusha kuwa kutokujua sheria sio kinga ya kutokuadhibiwa.

Elimu kwa wananchi hutolewa kila siku ya Jumatatu katika Mahakama ya Hakimu Mkazi, hatua inayolenga kutekeleza nguzo ya tatu ya Mpango Mkakati wa Mahakama katika kuongeza imani na kukuza uelewa wao kuhusu shughuli za Mahakama.

Baadhi ya wananchi waliofika katika Mahakama ya Hakimu Mkazi Pwani wakifuiatilia utoaji wa elimu.

 

Hakimu Mkazi Mkuu Mfawidhi wa Mahakama ya Hakimu Mkazi Pwani, Mhe. Joyce Mkhoi akitoa elimu katika kutekeleza Mpango Mkakati wa Mahakama.

 

Jengo la Mahakama ya Hakimu Mkazi Pwani na Mahakama ya Wilaya Kibaha mahali ambapo Mpango Mkakati wa Mahakama unatekelezwa.

(Habari hii imehaririwa na FAUSTINE KAPAMA-Mahakama)