MAHAKAMA YA TANZANIA YASHIRIKI MKUTANO WA KIMATAIFA AFRIKA YA KUSINI

Na. James Kapele – Gauteng Johannesburg

Mahakama ya Tanzania inashiriki Mkutano wa 27 wa Baraza la Nyaraka la Kimataifa la Kanda ya Mashariki na Kusini mwa Bara la Afrika (Eastern and Southern Africa Regional Branch of International Council on Archives -ESARBICA) ambalo linawaleta pamoja wataalamu wa kumbukumbu na nyaraka jijini hapa, Afrika ya Kusini.

Mkutano huo ulifungungiliwa na Naibu Waziri wa Michezo, Sanaa na Utamaduni wa Afrika ya Kusini, Mhe, Nocawe Mafu ambaye, pamoja na mambo mengine, amewataka washiriki na wanachama kujadili kwa mapana maudhui ya mkutanao huo“Archives, Records and Memory in Digital spaces and global chaos.”  

Alisema kuwa washiriki wanapaswa kuja na mapendekezo mahsusi yatakayochochea maboresho chanya katika utunzaji na uhifadhi wa nyaraka kwa ustawi wa vizazi vijavyo.

Aidha, Mhe. Mafu alisisitiza washiriki katika yale watakayojadili kukumbuka sehemu muhimu ya kutunza historia kwa vizazi vijavyo katika eneo la utunzaji kumbukumbu na nyaraka, hasa kwa kuzingatia kukuwa kwa TEHAMA.

“Katika kipindi hiki mapinduzi ya viwanda na maendeleo makubwa ya TEHAMA lazima yaende sambamba na mbinu mbadala za utunzaji, uhifadhi na utumiaji wa nyaraka na kumbukumbuku zetu katika mifumo ya kidigitali (digital spaces) kwa manufaa ya vizazi vijavyo,” alisema Naibu Waziri.

Awali, akimkaribisha mgeni rasmi, Mkurugenzi Mtendaji wa Kituo cha Nyaraka Afrika ya Kusini, Bi. Dr. Cynthia Khumalo, amesema Afrika ya Kusini ni moja kati ya nchi wanachama katika jukwaa hilo la ESARBICA na waliteuliwa na Bodi kuandaa Mkutano huo wa 27, huku jumla ya washiriki 600 wakiwa wanatarajiwa kushiriki.

Akizungumza baada ya ufunguzi wa Mkutano huo, Mkurugenzi wa Nyaraka wa Mahakama ya Tanzania, Bw. Malimo Manyambula ameishukuru Mahakama ya Tanzania kwa kuona umuhimu wa kushiriki katika Mkutano huo.

Alisema kuwa Mkutano huo ndiyo jukwaa kubwa Barani Afrika ambalo nchi wanachama wanakutana kubadilishana uzoefu na kujifunza mbinu mbalimbali za kuboresha na kuimarisha mifumo ya utunzaji wa kubukumbu na nyaraka za Mahakama.

Kwa upande wao, watumishi wa Mahakama walioshiriki katika Mkutano huo wameishukuru Mahakama kwa kuona umuhimu wa wao kushiriki katika jukwaa hilo la wahifadhi na watunza kumbukumbu vijana.

Mkutano huo umetanguliwa na semina ya siku mbili kwa watunza kumbukumbu na nyaraka kwa vijana (Young records and archives management professionals) kujadiliana masuala mbalimbali ya utumiaji na utunzaji kumbukumbu na nyaraka.

Majadiliano hayo yaliyohusisha ukusanyaji na utunzaji wa kumbukumbu kupitia simulizi (Oral history) na matumizi ya Teknolojia ya Habari na Mawasilano (TEHAMA) ikiwemo mifumo ya kidigitali.

Tanzania ni mwanachama wa Baraza hilo lililoanzishwa mwaka 1969 kwa lengo la kushirikiana katika masuala ya utumiaji na utunzaji wa kumbukumbu na nyaraka, likijumuisha jumla ya nchi wanachama 20 ambalo Makao Makuu yake yako nchini Botswana.

Washiriki wengine kutoka Tanzania ni Mkurugenzi wa Idara ya Kumbukumbu na Nyaraka za Taifa, Bw. Firmin Msiyangi na watumishi wengine kutoka katika idara hiyo ambayo ndiyo taasisi simamizi ya utunzaji wa kumbukumbu na nyaraka katika utumishi wa umma kwa Tanzania. 

Sehemu ya watumishi wa Mahakama wanaoshiriki katika Mkutano huo. Aliyesimama wa pili kushoto ni Mkurugenzi wa Kumbukumbu na Nyaraka za Mahakama, Bw.Malimo Manyambula.

Mkurugenzi Mtendaji wa Kituo cha Nyaraka Afrika ya Kusini, Bi. Dr. Cynthia Khumalo akitoa salamu za ufunguzi na kumkaribisha mgeni rasmi katika Mkutano huo.

Naibu Waziri wa Michezo Sanaa na Utamaduni, Mhe. Nocawe Mafu akitoa hotuba ya ufunguzi wa Mkutano wa 27 wa ESARBICA kwa washiriki wanaohudhuria Mkutano huo.

Sehemu ya washiriki katika Mkutano huo kutoka Mahakama ya Tanzania pamoja na watumishi kutoka Idara ya Kumbukumbu na Nyaraka za Taifa. Aliyesimama katikati ni Mkurugenzi wa Idara ya Kumbukumbu na Nyaraka za Taifa, Bw. Firmin Msiyangi.

 (Habari hii imehaririwa na FAUSTINE KAPAMA-Mahakama)