MENEJIMENTI MAHAKAMA PWANI YAKUTANA

Na Eunice Lugiana-Mahakama, Kibaha

Menejimenti ya Mahakama Mkoa wa Pwani imetakiwa kuhakikisha kuwa kila Kiongozi anafanya kazi katika mazingira yanayoridhisha kwakuwa wao ndio wasimamiaji wakubwa wa rasilimali watu, fedha, majengo na vyote vinavyohusika.

Kauli hiyo ilitolewa hivi karibuni na Hakimu Mkazi Mfawidhi wa Mahakama ya Hakimu Mkazi Kibaha Pwani, Mhe. Joyce Mkhoi katika kikao cha robo ya pili ya mwaka cha menejimenti.

Mhe. Mkhoi amewataka viongozi hao kuwasimamia vizuri walio chini yao kwa kuhakikisha wanatekeleza majukumu yao kwa kufuata misingi na kanuni za kazi wanazozifanya na pia kutekeleza majukumu hayo kwa uadilifu na weledi.

Aidha, Hakimu Mfawidhi aliwaasa wajumbe kujitahidi katika Mahakama zao kusikiliza mashauri kwa njia ya mtandao ili huduma hiyo iweze kuzoeleka na kuwahudumia wateja bila kujali umbali walipo. Aliwataka kwenda kidijitali ili kuendana na mabadiliko yanayoendelea katika Mahakama ya Tanzania.

Mhe. Mkhoi aliwahimiza kuhakikisha ukaguzi wa Mahakama za Mwanzo unafanyika kwa kila robo ya mwaka ili kujua changamoto na mapungufu na kuyatolea taarifa yale ambayo hayatatuliki katika ngazi zilizopo kama kutekeleza sera za Mkoa kwa Mahakama hizo hutokuwa na kesi zilizozidi miezi mitatu.

Kadhalika, aliwakumbusha wajumbe hao kusimamia na kukagua mfumo wa uingizaji wa mashauri kwa Mahakama za Mwanzo. Akisisitiza jambo hilo, Mhe. Mkhoi alisema “Isiwepo Mahakama ambayo haiingizi taarifa hizo katika mfumo husika kwa usahihi.”

Kikao hicho cha menejimenti kinahusisha Mahakimu Wakazi Wafawidhi wa Mahakama za Wilaya, Mtendaji wa Mahakama Mkoa pamoja na Maafisa Utumishi na Maafisa Tawala.

Wajumbe wa menejimenti Mahakama Mkoa wa Pwani wakiwa katika picha ya pamoja baada ya kikao.

(Habari hii imehaririwa na FAUSTINE KAPAMA-Mahakama)