WANAFUNZI SHULE YA MSINGI MWAGALA NA NDOTO YA KUWA MAJAJI

Emmanuel Oguda-Mahakama, Shinyanga 

Wanafunzi wa Darasa la Saba Shule ya Msingi Mwagala iliyopo Manispaa ya Shinyanga wamepata nafasi ya kujifunza muundo wa Mahakama ya Tanzania na utendaji kazi wa Mhimili huo wenye jukumu la kutoa haki nchini, hivyo kuwa na ndoto ya kuwa Majaji na Mahakimu watakapohitimu masomo yao.

Wanafunzi hao wanaotarajia kufanya mtihani wa kuhitimu elimu ya Msingi mwezi Septemba mwaka huu, wakiongozwa na Mwalimu wa Somo la Uraia na Maadili, Mwl. Peter Daniel, walifika katika jengo la Mahakama Kuu Shinyanga hivi karibuni na kukutana na Jaji wa Mahakama Kuu ya Tanzania, Kanda ya Shinyanga Mhe. Seif Kulita.

Mhe. Kulita aliwafundisha muundo wa Mahakama na jinsi unavyofanya kazi kuanzia Mahakama ya Rufani hadi Mahakama ya Mwanzo. Jaji Kulita alieleza kuwa Mahakama ya Tanzania inalo jukumu la kutoa haki nchini na maamuzi yanayotolewa hayaingiliwi na mtu yoyote kwa sababu ndiyo chombo pekee kilichopewa mamlaka hayo kikatiba.

Wanafunzi hao walifurahi kupata maelezo hayo na kuonyesha shauku ya kuwa Majaji na Mahakimu hapo baadaye watakapomaliza masomo yao na kuahidi kusoma kwa bidii kufikia ndoto hiyo ili na wao siku moja waje kutekeleza jukumu la kutoa haki.

Awali, akifundisha juu ya Mpango Mkakati wa Miaka Mitano wa Mahakama ya Tanzania (2020/2021–2024/2025), Hakimu Mkazi, Mhe. Dushi Peter aliwaeleza wanafunzi hao namna Mahakama ya Tanzania inavyoendelea kuboresha huduma kwa wananchi pamoja na kuimarisha utendaji kazi wa kila siku ili kuendana na dhana nzima ya utoaji haki kwa wananchi na kwa wakati.

Alieleza mafanikio ambayo Mahakama ya Tanzania imeyapata hadi sasa, ikiwemo uimarishwaji wa mifumo ya Teknolojia ya Habari na Mawasiliano (TEHAMA), ujenzi wa Vituo Jumuishi vya Utoaji Haki nchini na Mahakama za Wilaya na Mahakama za Mwanzo.

Aidha, alieleza kuhusu kuimarika kwa huduma za kimahakama, ikiwemo utoaji nakala za hukumu kwa wananchi siku ambayo shauri lake litamalizika Mahakamani.

Wanafunzi hao walionyesha kufurahi zaidi walipotembelea Mahakama ya wazi, kujibu maswali mbalimbali ya kimahakama na kuahidi wako tayari kuukabili vyema mtihani wa Somo la Uraia na Maadili hapo Septemba, 2023.

 

Jaji wa Mahakama Kuu ya Tanzania, Kanda ya Shinyanga, Mhe. Seif Kulita akifafanua jambo kwa wanafunzi wa Shule ya Msingi Mwagala waliofika Mahakama Kuu kujifunza muundo wa Mahakama ya Tanzania.

Msaidizi wa Sheria wa Jaji, Mhe. Dushi Peter akitoa mada kuhusu Mpango Mkakati wa Mahakama ya Tanzania kwa wanafunzi hao.

Mwalimu wa Somo la Uraia na Maadili Shule ya Msingi Mwagala Peter Daniel akifafanua jambo wakati wa mafunzo ya wanafunzi wa Shule ya Msingi Mwagala.

 

Wanafunzi wa Shule ya Msingi Mwagala wakiwa wamenyoosha mikono juu kuashiria kuwa na ndoto ya kuwa Majaji baada ya kuulizwa iwapo wanandoto hiyo.

 

Mwanafunzi Moris Zacharia akitoa shukrani kwa Jaji wa Mahakama Kuu ya Tanzania, Kanda ya Shinyanga, Mhe. Seif Kulita (hayupo katika picha) baada ya kupata elimu ya muundo wa Mahakama ya Tanzania.

 

Jaji wa Mahakama Kuu ya Tanzania, Kanda ya Shinyanga, Mhe. Seif Kulita akiwa katika mpicha ya pamoja na wanafunzi wa Shule ya Msingi Mwagala walipofika mofisini kwake kujifunza Muundo wa Mahakama ya Tanzania.

 

Picha ya pamoja ya wanafunzi wa Shule ya Msingi Mwagala walipotembelea Mahakama Kuu ya Tanzania, Kanda ya Shinyanga.

(Habari hii imehaririwa na FAUSTINE KAPAMA-Mahakama)