MKANDARASI AKABIDHIWA ENEO LA UJENZI MAHAKAMA YA WILAYA NACHINGWEA

Na. Hilary Lorry – Mahakama, Lindi

Mkandarasi kutoka kampuni ya Uhandisi ya Kiure Limited Bi. Irene Lugenge amekabidhiwa eneo kwa ajili ya kuanza ujenzi wa Mradi wa Mahakama ya Wilaya ya Nachingwea iliyopo katika halmashauri ya Nachingwea wilaya ya Nachingwea Mkoa wa Lindi.

Mhandisi Mshauri kutoka kampuni ya OGM Consultant Bw. Emmanuel Fovo alieleza Ujenzi wa mradi wa Mahakama ya Wilaya ya Nachingwea ni wa miezi tisa (9) na unatarajiwa kuanza rasmi tarehe 20 Disemba 2023 na kukamilika 20 Agosti 2024 kama mkataba unavyoeleza.

Bw. Fovo alimtaka mkandarasi kuzingatia vipengele vyote vilivyopo kwenye mkataba ili kuepuka changamoto zisizo za lazima na kumshauri endapo atakutana na changamoto ni vyema akafanya mawasiliano na pande zote  zinahusika na mradi huu ili isitokee tofauti yoyote na kuepuka ucheleweshwaji wa kukamilika kwa mradi.

Naye, Mhandisi wa Mahakama ya Tanzania Bw. Kelvin Juvinal alimtaka mkandarasi kuzingatia sheria zote za usalama wakati wote wa ujenzi wa mradi na kumtaka kuwa na vifaa vya huduma ya kwanza kwenye eneo la mradi. Vilevile aliwataka mkandarasi na Mhandisi Mshauri kufanya kazi kama timu moja ili kuhakikisha jengo linakamilika kwa wakati na kwa ubora unaotakiwa.

Wakizungumza kwa nyakati tofauti  Mtendaji wa Mahakama ya Hakimu Mkazi Lindi Bi.Quip Mbeyela na Hakimu mkazi Mfawidhi Mahakama ya Wilaya ya Nachingwea Mhe.Sikitu Mwalusamba waliahidi kutoa ushirikiano wa karibu na kufanya mawasiliano na pande zote zinahusika na ujenzi huo kwa lengo la kuhakikisha ujenzi wa mradi huo unakamilika bila mkwamo wowote.

Aidha watumishi wa Mahakama ya Wilaya ya Nachingwea wamefurahia sana kupokea mradi huo wa ujenzi kwani utawaondolea adha ya kutumia majengo ya zamani na yenye miundo mbinu chakavu ambayo hayaendani na kasi ya sasa ya Mahakama ya kuhamia katika matumizi ya Teknologia ya Habari na mawasiliano (TEHAMA).

Makabidhiano hayo yameshuhudiwa na mhandisi Emmanuel Fovo, Mhandisi Kelvin L.Juvinal na wenzake wawili kutoka Mahakama ya Tanzania Makao Makuu, Mtendaji wa Mahakama ya Hakimu Mkazi Lindi Bi.Quip Godfrey Mbyela, pamoja na Hakimu Mkazi mwandamizi Mahakama ya Wilaya ya Nachingwea Mhe. Sikitu Mwalusamba.

Mkandarasi kutoka kampuni ya Uhandisi ya Kiure Bi. Irene Lugenge (wenye tisheti nyekundu) akioneshwa mipaka ya eneo la ujenzi wa jengo la mahakama ya wilaya Nachingwea

Mkandarasi kutoka kampuni ya Uhandisi ya Kiure Bi. Irene Lugenge (wenye tisheti nyekundu) akionesha michoro na ramani ya muonekano wa jengo hilo.

Makabidhiano ya mkataba kwaajili ya ujenzi wa Mahakama ya Wilaya ya Nachingwea kati ya mkandarasi kutoka kampuni ya Uhandisi ya Kiure BI. Irene Lugege (wa pili kushoto) na Mtendaji wa Mahakama ya Hakimu Mkazi Lindi Bi. Quip Mbeyela.(wa pili kulia)

Mkandarasi kutoka kampuni ya Uhandisi ya Kiure Bi. Irene Lugenge (anayeonesha ramani) akioneshwa mipaka ya eneo la ujenzi wa jengo la mahakama ya wilaya Nachingwea

Mkandarasi kutoka kampuni ya Uhandisi ya Kiure Bi. Irene Lugenge (anayeonesha ramani) akioneshwa mipaka ya eneo la ujenzi wa jengo la mahakama ya wilaya Nachingwea

Mkandarasi kutoka kampuni ya Uhandisi ya Kiure Bi. Irene Lugenge (aliyenyoosha mkono) akioneshwa mipaka ya eneo la ujenzi wa jengo la mahakama ya wilaya Nachingwea

(Habari Hii Imehaririwa na Innocent Kansha - Mahakama)