JMAT, MAHAKAMA MANYARA YATOA POLE KWA WAATHIRIKA WA MAFURIKO HANANG

Na. Christopher Msagati – Mahakama, Manyara

Jaji Mfawidhi wa Mahakama Kuu ya Tanzania, Kanda ya Manyara, Mhe. John Kahyoza jana tarehe 3 Januari, 2024 amewaongoza wajumbe wa Chama cha Majaji na Mahakimu Nchini (JMAT) na sehemu ya  watumishi wa Mahakama Kuu Kanda ya Manyara katika ziara ya kutoa mkono wa pole kwa waathirika wa mafuriko yaliyotokea wilayani Hanang katika maeneo ya Katesh na Gendabi mnamo tarehe 3 Desemba, 2023.

Ziara hiyo iliyoandaliwa na Chama cha Majaji na Mahakimu Tanzania (JMAT) na watumishi wa Mahakama Kuu Kanda ya Manyara kwa pamoja waliamua kwa hiari kuchanga fedha ambazo ziliweza kununua mabati na misumari kwa ajili ya kusaidia kujenga nyumba za waathirika wa mafuriko hayo.

Katika kukabidhi vifaa hivyo Mhe. Kahyoza ambaye pia ni Rais wa JMAT alisema kuwa, Mahakama miongoni mwa taasisi ambazo tunatoa huduma kwa watanzania, hivyo Mahakama imeguswa sana na tukio hili ambalo limewapata wananchi wa maeneo hayo.

“Tumeona kuwa siyo jambo jema kukaa kimya pasipo kutoa msaada miongoni mwa jamii iliyoathirika na maafa haya. Huduma tunayotoa haiishii tu kwenye kutoa haki bali hata kwenye masuala ya kijamii kama haya yanapojitokeza”, aliongeza Rais wa JMAT.

Aidha, Mkuu wa Wilaya ya Hanang Bi. Janeth Mayanja alimshukuru Mhe. Kahyoza na watumishi wa Mahakama Kuu Kanda ya Manyara pamoja na JMAT kwa ujumla kwa kuguswa kwao na tukio lililowapata wananchi wa Hanang.

“Tunawashukuru sana Mahakama kwa kutukumbuka katika suala hili, kwa kweli tumefarijika sana na tunawaahidi kuwa vitu hivi mlivyotupatia vitawasaidia walengwa wote kwa usahihi”, alisema Mkuu wa Wilaya.

Katika hatua nyingine, ujumbe huo kutoka Mahakama Kuu Kanda ya Manyara ikiongozwa na Mhe. Kahyoza iliweza kutembelea katika eneo la Gendabi na kujionea madhara yaliyojitokeza baada ya kutokea kwa mafuriko hayo ambayo yalisababisha vifo kwa baadhi ya wananchi pamoja na uharibifu mkubwa wa mali na mindombinu.

Jaji Mfawidhi wa Mahakama Kuu ya Tanzania, Kanda ya Manyara na Rais wa Chama cha Majaji na Mahakimu Tanzania (JMAT) Mhe. John Kahyoza (wa pili kushoto) akikabidhi msaada wa mabati kwa Katibu Tawala wa Wilaya ya Hanang Bw. Mwalimu Athumani (wa kwanza kushoto) jana tarehe 3 Januari, 2024

Rais wa Chama cha Majaji na Mahakimu Tanzania (JMAT) na Jaji Mfawidhi wa Mahakama Kuu, Kanda ya Manyara Mhe. John Kahyoza (wa nne kutoka kulia) akiwa kwenye picha ya pamoja na Mkuu wa Wilaya ya Hanang Bi. Janeth Mayanja (wa tano kutoka kushoto) na baadhi ya Watumishi wa Mahakama Kuu Kanda ya Manyara katika ziara ya kutoa pole kwa wananchi wa Wilaya ya Hanang waliokumbwa na mafuriko.

Rais wa Chama cha Majaji na Mahakimu Tanzania (JMAT) na Jaji Mfawidhi wa Mahakama Kuu Kanda ya Manyara Mhe. John Kahyoza (wa tatu kushoto) akiangalia madhara yaliyojitokeza katika eneo la Gendabi mara baada ya kukumbwa na mafuriko.

Ujumbe kutoka Mahakama Kuu Kanda ya Manyara wakiwa katika picha ya pamoja katika eneo la Gendabi wilayani Hanang lililoathirika na mafuriko.

(Habari Hii Imehaririwa na Innocent Kansha - Mahakama)