SPIKA WA BUNGE AZINDUA MFUMO WA UNUKUZI NA TAFSIRI WA MAHAKAMA

Na Mary Gwera, Mahakama-Dodoma

Spika wa Bunge la Jamhuri ya Muungano wa Tanzania ambaye pia ni Rais wa Umoja wa Mabunge Duniani (IPU), Mhe. Dkt. Tulia Ackson amezindua rasmi Mfumo wa Unukuzi na Tafsiri (TTS) wa Mahakama ya Tanzania unaolenga kurahisisha zaidi huduma ya upatikanaji haki kwa wananchi.

Mhe. Dkt. Tulia amezindua Mfumo huo leo tarehe 27 Januari, 2024 wakati wa hafla ya uzinduzi wa Wiki ya Sheria inayofanyika kitaifa katika Viwanja vya Nyerere ‘Square’ jijini Dodoma.

“Naipongeza Mahakama ya Tanzania kwa hatua kubwa ya kuleta Mfumo huu, ambao naamini utarahisisha upatikanaji wa haki kwa wananchi,” amesema Spika wa Bunge. 

Kadhalika, Mhe. Dkt. Tulia ametoa rai kwa Wadau wengine wa Mahakama kuendana na kasi ya Mhimili huo ili kutokwamisha mchakato mzima wa utoaji haki.

‘‘Naamini kazi kubwa sasa, hasa wadau wa Mahakama ni utengenezaji wa mfumo hasa wa kitehama, utakaowasaidia wadau hawa kufungamanisha na kuboresha Mfumo Jumuishi wa Haki Jinai unaosomana, ili kubadilishana taarifa kuanzia hatua ya upelelezi, ufunguaji wa mashauri, msaada wa kisheria, uendeshaji wa mashtaka, kusikiliza mashauri na utoaji uamuzi,” amesisitiza Spika wa Bunge. 

Ameongeza kwa kueleza kuwa kila Mdau anao wajibu wa kufanya uwekezaji kwenye eneo la miundombinu ya TEHAMA na usimikaji wa mifumo ya kidijitali, kuajiri Wataalamu wa TEHAMA na kuwaendeleza kwa mafunzo ili waweze kusimamia na kutoa msaada wa kiufundi. 

Kadhalika amesema ni muhimu Wadau kuwapa Wataalam vifaa vya kisasa vya TEHAMA ili waweze kutekeleza majukumu yao kwa ufanisi pamoja na kuongeza ushirikiano na Wadau wa Haki ili kuharakisha huduma ya Utoaji Haki.

Akizungumza wakati akimkaribisha Spika wa Bunge kuzzindua Mfumo huo, Jaji Mkuu wa Tanzania, Mhe. Prof. Ibrahim Hamis Juma amesema Mahakama ya Tanzania imewekeza nguvu katika matumizi ya TEHAMA ambapo ametaja Mifumo mbalimbali inayolenga kurahisisha huduma ya utoaji haki kwa wananchi mojawapo ikiwa ni Mfumo Mpya wa Kielektroniki wa Kuratibu Mashauri (e-CMS).

"Ikumbukwe kwamba wananchi kwa kitambo kirefu wamekuwa wakilalamika kuhusu kuchelewa kupatikana kwa mienendo ya mashauri yao na pia kuwepo kwa mapungufu katika mienendo ya mashauri yao na pia kuwepo kwa mapungufu katika mienendo ya mashauri, ili kuondokana na kadhia hiyo, Mahakama ya Tanzania kwa kushirikiana na Kampuni ya ALMAWAVE ya Italia imejenga Mfumo unaotumia akili mnemba (Artificial Intelligence) kufundisha lugha ya Kiswahili na Kiingereza cha Kisheria mapungufu hayo," amesema Mhe. Prof. Juma.

Amebainisha faida za Mfumo huo kuwa ni pamoja na kuwapunguzia kazi Majaji na Mahakimu kazi kubwa waliyokuwa wanaifanya ya kuandika kwa mkono mienendo ya mashauri na hivyo kuwawezesha wananchi kupata haki kwa wakati.

Akitoa maelezo mafupi kuhusu mfumo TTS, Mtendaji Mkuu Mahakama ya Tanzania, Prof. Elisante Ole Gabriel amesema kwa sasa Mfumo huo tayari umefungwa katika Mahakama 11 na mpango uliopo ni kufunga katika Mahakama zote nchini.

“Tunaishukuru Serikali kwa kuiwezesha Mahakama ya Tanzania kuja na Mfumo huu, ambao tulijifunza na kupata utaalam kutoka nchini Italia,” amesema Prof. Ole Gabriel.

Mtendaji Mkuu amezialika Taasisi mbalimbali za Serikali zitakazoona zinahitaji kutumia Mfumo huo kuja Mahakama kujifunza jinsi unavyofanya kazi.

Amesema mpaka sasa tayari Wataalam kutoka Bunge la Tanzania na Mahakama ya Zanzibar wameshatembelea Mahakama kwa ajili ya kujifunza kuhusu Mfumo huo. 

Maonesho ya Wiki ya Sheria yanaendelea Nchi nzima hadi tarehe 30 Januari, 2024 na Kilele cha Siku ya Sheria kinatarajiwa kuwa tarehe 01 Februari, 2024 ambapo kwa upande wa Dodoma ambapo maadhimisho haya yanafanyika kitaifa Mgeni Rasmi anatarajiwa kuwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Spika wa Bunge la Jamhuri ya Muungano wa Tanzania, Mhe. Dkt. Tulia Ackson (katikati) akibonyeza kitufe kwenye kompyuta mpakato kuashiria uzinduzi rasmi wa Mfumo Mpya wa Unukuzi na Tafsiri (TTS) wa Mahakama ya Tanzania leo tarehe 27 Januari, 2024 katika Viwanja vya Nyerere 'Square' jijini Dodoma.

 Spika wa Bunge la Jamhuri ya Muungano wa Tanzania, Mhe. Dkt. Tulia Ackson akizungumza na Majaji, Watumishi wa Mahakama pamoja na Wadau wengine (hawapo katika picha) wakati wa uzinduzi wa Wiki ya Sheria uliofanyika kwa matembezi maalum leo tarehe 27 Januari, 2024.

Jaji Mkuu wa Tanzania, Mhe. Prof. Ibrahim hamis Juma akitoa hotuba yake wakati wa sherehe za uzinduzi wa Wiki ya Sheria, 2024 katika Viwanja vya Nyerere 'Square' jijini Dodoma.

Mtendaji Mkuu Mahakama ya Tanzania, Prof. Elisante Ole Gabriel akizungumza wakati wa sherehe za uzinduzi wa Wiki ya Sheria leo tarehe 27 Januari, 2024.

Meza Kuu ikiongozwa na Spika wa Bunge la Jamhuri ya Muungano wa Tanzania, Mhe. Dkt. Tulia Ackson wakiwa katika hafla ya uzinduzi wa Wiki ya Sheria. Wa tatu kushoto ni Jaji Mkuu wa Tanzania, Mhe. Prof. Ibrahim Hamis Juma, wa tatu kulia ni Jaji Mkuu wa Zanzibar, Mhe. Khamis Ramadhan Abdalla, wa pili kushoto ni Jaji wa Mahakama ya Rufani (T), Mhe. Augustine Mwarija, wa pili kulia ni Mwanasheria Mkuu wa Serikali, Mhe. Dkt. Eliezer Mbuki Feleshi, wa kwanza kushoto ni Jaji Kiongozi Mahakama Kuu ya Tanzania, Mhe. Mustapher Siyani na wa kwanza kulia ni Mkuu wa Mkoa wa Dodoma, Mhe. Rosemary Senyamule.

Naibu Makatibu wa Tume ya Utumishi wa Mahakama wakiwa katika hafla ya uzinduzi wa Wiki ya Sheria leo tarehe 27 Januari, 2024 katika Viwanja vya Nyerere 'Square' jijini Dodoma.

Sehemu ya Wadau na wananchi wakiwa katika hafla ya uzinduzi wa Wiki ya Sheria, 2024.

 Sehemu ya Wadau na wananchi wakiwa katika hafla ya uzinduzi wa Wiki ya Sheria, 2024.

Sehemu ya watumishi na wananchi wa Mahakama wakiwa katika hafla ya uzinduzi wa Wiki ya Sheria leo tarehe 27 Januari, 2024.

Wakifuatilia yaliyokuwa yakijiri katika hafla ya uzinduzi wa Wiki ya Sheria leo tarehe 27 Januari, 2024.