WANAWAKE MAHAKAMA KUU MOSHI WATEMBELEA KITUO CHA WAZEE WASIOJIWEZA NJORO

Na Paul Pascal, Mahakama Moshi

Viongozi na watumishi wanawake wa Mahakama Kuu Kanda ya Moshi wakiongozwa na Jaji Mfawidhi wa Kanda hiyo, Mhe. Dkt. Lilian Mongella waliadhimisha Siku ya Wanawake Duniani kwa kutembelea Kituo cha wazee wasiojiweza kilichopo Kata ya Njoro Manispaa ya Moshi mkoani Kilimanjaro.

Zoezi hilo lililofanyika tarehe 08 Machi, 2024 liliongozwa na Jaji Dkt. Lilian Mongella kwa kutembelea Kituo hicho cha wazee wasiojiweza Njoro chenye jumla ya wazee 18 ambapo 12 kati yao ni wanaume na 6 ni wanawake.

Akizungumza katika Kituo hicho, Jaji Mongella alisema, “sisi kama wanawake tunao wajibu wa kuwajali wazee wetu kwani wazee ni hazina ya Taifa letu niwasisitize na kuwaasa wanawake wenzangu tuwe na utamaduni wa kile kidogo tunachokipata kuwakumbuka wazee wetu haswa wazee wasiojiweza kama tunalivyofanya leo.”

Alisema kama wanawake wana wajibu wa kuwatunza wazee katika jamii na kuwasihi kujiwekea utaratibu endelevu wa kuwajulia hali, kuwapatia mahitaji muhimu kadri wanavyojaaliwa ili nao waone furaha ya kuwa katika ulimwengu huu.

Naye, Jaji wa Mahakama Kuu Kanda ya Moshi, Mhe. Safina Simfukwe alipongeza uratibu uliofanyika wa kufanikisha jambo hilo na kusema kuwa, wamechagua fungu lililo jema.

“Napongeza uratibu wa zoezi hili, kwakweli tumechagua fungu lililo bora kwa kuwapa faraja wazee wetu kwa hiki tulichojaaliwa, niushukuru Uongozi wa Kituo hiki kwa juhudi zao za kuwahudumia wazee hawa wasiojiweza pia niombe zoezi hili liwe endelevu,” alisema Mhe. Simfukwe.

Kwa upande wake, Naibu Msajili Mahakama Kuu Kanda ya Moshi, Mhe. Sekela Mwaiseje alisema kuwajali na kuwatunza wazee ni ibada na kusema kuwa wao wamefanya hivyo,  ameomba jambo wanapaswa kulienzi na kulitekeleza mara kwa mara kila wanapojaaliwa chochote. 

Naye, Mtendaji Mahakama Kuu Kanda ya Moshi, Bi. Maria Itala alibainisha kuwa, katika siku hiyo, walifanikiwa kuwapatia wazee wa Kituo cha Njoro vifaa vya matumizi ya kila siku pamoja na nafaka kwa ajili ya vyakula vyao vyote hivyo vikiwa vimepatikana kupitia michango ya wanawake wa Mahakama Kuu Kanda ya Moshi. 

Jaji Mfawidhi Mahakama Kuu Kanda ya Moshi, Mhe. Dkt. Lilian Mongella (aliyesimama) akizungumza na wazee wa Kituo cha Njoro (kulia) mara baada ya yeye pamoja na Watumishi wanawake wa Kanda hiyo kuwasili katika Kituo hicho tarehe 08 Machi, 2024 kwa ajili ya kutoa msaada wa mahitaji mbalimbali kwa wazee hao katika Maadhimisho ya Siku ya Wanawake Duniani.

Sehemu ya wazee wa Kituo cha Njoro wakisikiliza salaam za Watumishi wanawake kutoka Mahakama Kanda Moshi walipowatembelea Siku ya Wanawake Duniani.

Baadhi ya Watumishi wanawake wa Mahakama Kanda ya Moshi wakiwa wamebeba vitu mbalimbali walivyowasilisha kwa Wazee wa Kituo cha Njoro wakati walipowatembelea kwa ajili ya kutoa msaada.

Naibu Msajili Mahakama Kuu Kanda ya Moshi, Mhe. Sekela Mwaiseje  (aliyesimama wa nne kulia) akizungumza jambo wakati wa kutoa msaada kwa Wazee wa Kituo cha Njoro wakati walipowatembelea kwa ajili ya kutoa msaada tarehe 08 Machi, 2024 ambayo ilikuwa Siku ya Wanawake Duniani.

Hakimu Mkazi Mfawidhi Mahakama ya Hakimu Mkazi Moshi, Mhe. Opportuna Kipeta (kushoto) akimkabidhi vitu kadhaa mmoja wa wazee wa Kituo cha Njoro wakati walipofika katika Kituo hicho kwa lengo la kutoa msaada.

 Mtendaji Mahakama Kuu Kanda ya Moshi, Bi. Maria Itala akiwa amebeba baadhi ya mahitajiwaliyowasilisha katika Kituo cha Wazee Njoro kilichopo Manispaa ya Moshi mkoani Kilimanjaro.

(Habari hii imehaririwa na Mary Gwera, Mahakama-Dodoma)