MAHAKAMA, WADAU WAKUTANA KUTATHMINI, KUPATA MREJESHO KUHUSU MATUMIZI YA MFUMO WA KIELETRONIKI

Na LIGHTNESS KABAJU-Mahakama, Divisheni ya Kazi

Mahakakama Kuu ya Tanzania, Kanda ya Dar es Salaam, jana tarehe 25 Oktoba, 2024 imefanya kikao na kuwakutanisha wadau mbalimbali ili kutathmini na kupata mrejesho wa matumizi ya mfumo mpya wa kielectroniki wa usimamizi na uendeshaji wa mashauri.

Mkutano huo ambao ulifunguliwa na Jaji Mfawidhi, Mhe. Salma Maghimbi ulijumuisha wadau kutoka Ofisi ya Wakili Mkuu wa Serikali, Ofisi  ya Taifa ya Mashtaka, Chama cha Mawakili Tanganyika, Jeshi la Magereza na baadhi ya Naibu Wasajili, Mahakimu na wataalamu wa Mahakama.

Akizungumza katika mkutano huo, Mhe. Maghimbi alieleza kwamba Mahakama ya Tanzania inatekeleza kwa vitendo nguzo ya tatu ya ushirikishwaji wa wadau   ili kuwa na uelewa wa pamoja katika jukumu muhimu la utoaji haki kwa wananchi.

Jaji Mfawidhi aliainisha mafanikio yaliyotokana na matumizi ya mfumo huo tangu kuanzishwa kwake tarehe 6 Novemba, 2023 kama nyenzo muhimu katika uendeshaji wa mashauri ndani ya Mahakama ya Tanzania.

Alieleza pia kuwa mfumo huo unachagiza utoaji haki kwa wakati, utunzaji bora wa nyaraka za kimahakama, upatikanaji wa nyaraka kwa haraka, kupunguza mlundikano wa mashauri, kupunguza gharama za uendeshaji wa mashauri na kupunguza tuhuma za mazingira ya rushwa mahakamani.  

Mhe. Maghimbi alitumia nafasi hiyo kuwaasa wadau waliohudhuria kikao hicho kufanya kazi kwa uadilifu na pia kuwa tayari katika kutumia mifumo ya Teknolojia ya Habari na Mawasiliano (TEHAMA) na kutoa maoni ili  kuzidi kuboresha mfumo huo.

Katika Kikao hicho, Afisa TEHAMA wa Mahakama, Bw. Tumaini Malima  alipata wasaa wa kuwapitisha wadau katika mfumo huo ambapo alionesha  maboresho yaliyofanyika tangu ulipoanza kutumika.

Pia alianisha matazamio ya mbele ambayo yanaendelea kufanyiwa kazi zaidi katika uboreshwaji wa mfumo huo ili kutatua changamoto zinazoweza kujitokeza.

Kadhalika, wadau walipata nafasi ya kutoa mrejesho wao na kuipongeza Mahakama ya Tanzania kwa kazi nzuri inayofanya katika utoaji haki wa wakati lakini pia kwa maboresho yanayozidi kutolewa siku hadi siku ili kutoa urahisi kwa wadau na wananchi katika matumizi ya mfumo huo.

Jaji Mfawidhi wa Mahakama Kuu ya Tanzania, Kanda ya Dar es Salaam, Mhe. Salma Maghimbi (juu na chini) akizungumza wakati anafungua mutano wa wadau mbalimbali ili kutathmini na kupata mrejesho wa matumizi ya mfumo mpya wa kielectroniki wa usimamizi na uendeshaji wa mashauri.

Jaji Mfawidhi wa Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati waliokaa) akiwa katika picha ya pamoja na watumishi wa Mahakama waliohuduria mkutano huo. Wengine waliokaa kutoka kushoto ni Mkurugenzi wa Menejimenti  ya Mashauri, Mhe. Desdery Kamugisha, Jaji wa Mahakama Kuu, Mhe. Anold Kirekiano, Naibu Msajili Mfawidhi Kanda ya Dar es Salaam, Mhe. Mary Moyo na Afisa TEHAMA, Bi. Amina Said.

Jaji Mfawidhi wa Mahakama Kuu ya Tanzania, Kanda ya Dar es Salaam, Mhe. Salma Maghimbi (katikati waliokaa juu na chini) akiwa katika picha ya pamoja na Mahakimu waliohudhuria mkutano huo.

Habari hii imehaririwa na FAUSTINE KAPAMA-Mahakama, Dar es Salaam