SHANGWE ZATAWALA MAPOKEZI YA JAJI MPYA MAHAKAMA KUU KANDA YA MANYARA

Na Christopher Msagati- Mahakama Manyara

Jaji Mfawidhi wa Mahakama Kuu ya Tanzania Kanda ya Manyara, Mhe. John Rugalema Kahyoza tarehe 18 Oktoba, 2024 aliwaongoza Watumishi wa Kanda hiyo katika viwanja vya Mahakama Kuu kumpokea Jaji wa Mahakama Kuu ya Tanzania, Mhe. Nenelwa Joyce Mwihambi, ambaye amepangiwa kazi katika Kituo hicho.

Akizungumza mara baada ya kumpokea Jaji Mwihambi, Mhe. Kahyoza amemueleza kuwa, Mahakama Kuu Kanda ya Manyara itampatia ushirikiano wa kutosha katika majukumu yake mapya na kumsaidia katika kutimiza malengo ya Mahakama ya kumaliza mashauri ndani ya muda mfupi.

“Mahakama Kuu Kanda ya Manyara imejiwekea malengo ya kumaliza mashauri ndani ya miezi sita na tunajitahidi kufanya hivyo ili wananchi wapate unafuu wa kupata haki zao kwa wakati”. Alisema Mhe. Kahyoza.

Kwa upande wake Mhe. Mwihambi ameushukuru uongozi wa Mahakama Kanda ya Manyara ukiongozwa na Jaji Mfawidhi kwa mapokezi mazuri waliyoyafanya katika kituo chake kipya cha kazi na kuongeza kwamba, anaamini kuwa atajifunza mambo mengi atakapokuwa Mahakama Kuu Manyara kwa kuwa ni kituo chake cha kwanza kufanya kazi kama Jaji.

“Manyara kwangu itakuwa ni shule ya kujifunza vizuri shughuli hizi za ujaji kwa kuwa ndiyo kituo changu cha kwanza kuhudumu mara baada ya kuteuliwa kuwa Jaji,” amesema Jaji Mwihambi.

Mhe. Mwihambi ni Jaji mpya wa Mahakama Kuu ya Tanzania aliyeteuliwa hivi karibuni na Rais wa Jamhuri ya Muungano wa Tanzania, Mhe. Dkt. Samia Suluhu Hassan. Aidha kabla ya uteuzi huo Mhe. Mwihambi alikuwa Katibu wa Bunge la Jamhuri ya Muungano wa Tanzania.

Ujio wa Jaji huyo utaongeza nguvu katika usikilizwaji wa mashauri katika Kanda hiyo, hata hivyo Kanda hiyo itakuwa na jumla ya Majaji wanne ambao wamejipanga kuhakikisha mashauri yanayosajiliwa yanasikilizwa na kuamuliwa kwa haraka ili kuendana Dira ya Mahakama ya utoaji wa haki sawa kwa wote na kwa wakati.

Jaji Mfawidhi wa Mahakama Kuu ya Tanzania, Kanda ya Manyara Mhe. John Kahyoza (Mwenye tai nyekundu) akimtambulisha Mhe. Nenelwa Mwihambi kwa Watumishi wa Mahakama Kuu Kanda ya Manyara.

Mhe. jaji Nenelwa Mwihambi akiwa katika ofisi yake mpya mara baada ya kukaribishwa.

Jaji Mfawidhi Mahakama Kuu, Kanda ya Manyara Mhe. John Kahyoza (mwenye tai nyekundu) akiwa kwenye picha ya pamoja na Jaji wa Mahakama Kuu Kanda Manyara Mhe. Nenelwa Mwihambi (wa nne kutoka kushoto), wa pili kushoto ni Jaji wa Mahakama Kuu, Kanda ya Manyara Mhe. Frank Mirindo, wa tano kutoka kushoto ni ambaye ni Naibu Msajili wa Mahakama Kuu Kanda ya Manyara Mhe Bernard Mpepo. Wengine waliosimama mstari wa nyuma ni watumishi wa Mahakama Kanda Kuu Kanda ya Manyara.

(Habari Hii Imehaririwa na Innocent Kansha- Mahakama)