JAJI MKUU ASHIRIKI MISA MAALUM YA KUUAGA MWILI WA MAREHEMU JAJI KIPENKA

Na SALUM TAWANI-Mahakama, Dar es Salaam

Jaji Mkuu wa Tanzania, Mhe. Prof. Ibrahim Hamis Juma jana tarehe 5 Novemba, 2024 aliungana na Viongozi mbalimbali wa Kidini na Serikali katika Misa maalum ya kuuaga mwili wa marehemu, Jaji Mstaafu wa Mahakama ya Rufani Tanzania, Mhe. Kipenka Msemembo Mussa katika Kanisa la Kiinjili la Kilutheri Tanzania (KKKT) Wazo Hili jijini Dar es salaam kwa ajili ya kutoa salamu za mwisho kwa Marehemu.

Mhe. Prof. Juma  aliwapa salamu za pole wanafamilia kwa niaba ya Mahakama ya Tanzania kwa kusema kuwa, anawasilisha salamu zake za faraja kwa Mama, Mke wa marehemu, watoto, ndugu na jamaa wote kwa kufikwa na msiba huo mzito ambao ni mkubwa kwetu  sote.

Mhe. Prof. Juma alisema kuwa, alipokea salama za rambirambi kutoka kwa Rais wa Jamhuri ya Muungano wa Tanzania Mhe. Dkt. Samia Suluhu Hassan ambaye amewatakia salama za faraja. Naye Spika wa Bunge la Jamhuri ya Muungano wa Tanzania Mhe. Dkt. Tulia Ackson alituma salamu zake za faraja kwa wanafamilia.

“Nimepokea salaam nyingi kutoka kwa Wahe. Majaji wa Mahakama ya Rufani ambao walipata nafasi ya kufanya kazi na Mhe.Mussa Kipenka na pengine salam zao zinatoa taswira hasa Jaji Kipenka aliishi namna gani na Wahe. Majaji wenzake na aliishi namna gani na watumishi wengine wa Mahakama na nina amini aliishi wa watumishi wengine Serikalini kwa upendo na mshikamano.” Aliongeza Jaji Mkuu.

“Jaji Mstaafu wa Mahakama ya Rufani Mhe. Edward Rutakangwa ambaye alifanya kazi kwa muda mrefu na marehemu anasema ni huzuni nzito iliyojaa mioyoni mwetu baada ya kupata taarifa ya kifo cha Mhe. Mussa  Kipenka aliongeza kuwa kifo chake ni pigo kubwa kwa wale wote  wanaomfahamu kwa karibu na kufanya kazi naye alikuwa ni mtu mwema ni Jaji aliyezingatia viwango vya juu katika kutenda haki, alikuwa na uwezo mkubwa wa kujituma na alikuwa haogopi kufanya kazi yoyote ambayo alipewa,” alisema Mhe. Prof. Juma.

“Mimi katika salamu zangu nawataka wanafamilia, ndugu na jamaa watambue hiyo ndiyo picha tubaki nayo milele, kwamba marehemu alikuwa ni mtu ambaye alitumikia Taifa lake kwa kutukuka sana kwa zaidi ya miaka 42. Na pia alifanya kazi zake kwa bidii kubwa pamoja na wasifu ambao tumesomewa leo kutokana na vituo vingi vya kazi nyingi ambazo amefanya, tukiamua kuorodhesha mambo mema aliyofanya katika kila kituo chake cha kazi sidhani kama tutapata muda wa kutosha kuelezea. Kwa sababu hizo na nyingine nyingi niwaomba Mke, Mama na watoto wa marehemu mrudi nyumbani mkiwa na furaha kwamba Mhe. Kipenka ameacha historia na heshima kubwa kwa Taifa Lake. Bwana ametoa Bwana ametwaa jina lake lihimidiwe Amina,” alisema Jaji Mkuu.

Mapema jana Jaji Mkuu Mhe. Prof. Juma alifika msibani nyumbani kwa Marehemu, Jaji Mstaafu wa Mahakama ya Rufani Tanzania, Mhe. Kipenka Msemembo Mussa maeneo ya Madale jijini Dar es Salaam kwa ajili ya kutoa salamu za pole na baadae kuelekea katika Kanisa la K.K.T Wazo Hili kwa ajili ya kutoa salamu za mwisho kwa Marehemu.

Naye, Mkuu wa Mkoa wa Dar es Salaam Mhe. Albert Chalamila alitoa salamu za pole kwa Mahakama ya Tanzania na familia kwa jumla, alisema kuwa, Mhe. Jaji Kipenka amefanya kazi kubwa sana ndiyo maana leo tunamuenzi hapa kifo kinaonyesha mwisho wa nguvu za mwanadamu pia inaonyesha mipaka ya muda wa mwadamu.

“Naomba kusisitiza kwa kusema, huwa tunatumia pesa nyingi sana katika kuandaa mazishi na baada ya mazishi watoto na familia ya Marehemu hatuijali tena. Ninaomba sana ule urafiki wetu tuliokuwa nao na Marehemu tuendelee nao na tungalie namna tutakavyoweza kuisaidia familia ya Mhe. Kipenka ili iweze kufikia malengo yake.” Aliongeza Mhe. Chalamila.

Kwa upande wake, Mtoto wa Marehemu Bw. Anorld Kipenka Mussa kwa niaba ya familia aliishukuru sana Mahakama ya Tanzania chini ya Uongozi wa Mhe. Prof. Ibrahim Hamis Juma kwa kuwa pamoja na familia tangu kipindi cha ugojwa mpaka katika kipindi hiki cha kuandaa mazishi ya mpendwa wao.

Mwili wa Marehemu utasafirishwa kwenda kijijni kwao Kinampanda mkaoni Singida kwa ajili ya mazishi siku ya tarehe 6 Novemba, 2024. Marehemu Kipenka alifikwa na umauti tarehe 2 Novemba, 2024 katika Hospitali ya Taifa Muhimbili (Mloganzila) alipokuwa amelazwa kwa matibabu.

  Jaji Mkuu wa Tanzania Mhe. Prof. Ibrahim Hamis Juma (wa pili kushoto aliyeweka mkono kwenye sanduku) pamoja na Wahe. Majaji wengine wa Mahakama ya Rufani ya Tanzania wakisimdikiza  sanduku lililobeba Mwili wa Marehemu  Mhe. Kipenka Msemembo Mussa ambaye alikuwa  Jaji Mstaafu wa Mahakama ya Rufani, wa kwanza kushoto ni Mkuu wa Mkoa wa Dar es Salaam Mhe. Albert Chalamila.

   Jaji  Mkuu wa Tanzania, Mhe. Prof. Ibrahim Hamis Juma akitoa salam za pole kwa niaba ya Mahakama ya Tanzania katika msiba wa Marehemu, Jaji Mstaafu wa Mahakama ya Rufani, Mhe. Kipenka Msemembo Mussa.

 Wanafamilia wa Marehemu  Mhe. Kipenka Msemembo Mussa ambaye alikuwa  Jaji Mstaafu wa Mahakama ya Rufani wakiwa katika Kanisa la K.K.T Wazo Hili jijini Dar es salaam kutoa heshima zao za mwisho kwa mpendwa wao.

Jaji  Mkuu wa Tanzania, Mhe. Prof. Ibrahim Hamis  Juma akimfariji Bi. Rehema Kipenka Mussa ambaye ni Mke  wa Marehemu wa Jaji Mstaafu wa Mahakama ya Rufani, Mhe. Kipenka Msemembo  Mussa.

Jaji  Mkuu wa Tanzania, Mhe. Prof. Ibrahim Hamis  Juma (wa kwanza kushoto) akijadiliana jambo na Mkuu wa Mkoa wa Dar es Salaam Mhe. Albert Chalamila katika msiba wa  aliyekuwa Jaji Mstaafu wa Mahakama ya Rufani Mhe. Kipenka Msemembo  Mussa.

Picha hii inaonyesha sanduku lililobeba Mwili wa Marehemu  Mhe. Kipenka Msemembo Mussa ambaye alikuwa  Jaji Mstaafu wa Mahakama ya Rufani ya Tanzania.

Jaji  Mkuu  Mstaafu wa Mahakama ya Tanzania, Mhe. Barnabas A. Samata  akitia saini kwenye kitabu cha maombolezo katika msiba wa Marehemu, Jaji Mstaafu wa Mahakama ya Rufani, Mhe. Kipenka Mussa.

Jaji  Mkuu wa Tanzania, Mhe. Prof. Ibrahim Hamis Juma akitia saini kwenye kitabu cha maombolezo katika msiba wa Marehemu, Jaji Mstaafu wa Mahakama ya Rufani, Mhe. Kipenka Msemembo Mussa.

(Habari Hii Imehaririwa na Innocent Kansha-Mahakama)