JUDICIARY OF TANZANIA: JAJI MKUU NA MAAGIZO MUHIMU CHUO CHA UONGOZI WA MAHAKAMA LUSHOTO ·

Ataka mwelekeo mpya ufundishaji, kuongeza mapato

Na FAUSTINE KAPAMA-Mahakama, Lushoto

Jaji Mkuu wa Tanzania, Mhe. Prof. Ibrahim Hamis Juma ameliagiza Baraza la Uongozi la Chuo cha Uongozi wa Mahakama Lushoto (IJA) kujitathmini na kubadili mwelekeo wa ufundishaji ili kupanua wigo na vyanzo vya mapato.

Mhe. Prof. Juma ametoa rai hiyo leo tarehe 29 Novemba, 2024 wilayani hapa katika Mahafali ya 24 ya Chuo cha Mahakama Lushoto ambayo pia yamehudhuriwa na Wajumbe wa Baraza la Ugonzi wa Chuo, Viongozi wa Mahakama na Viongozi wengine wa Serikali na Dini mbalimbali.

“Sheria iliyounda Chuo inaruhusu kufundisha, kutafiti na huduma za ushauri, ni vyema mkatafuta wadau wengine nje ya Mahakama kwa ajili ya kuwapa huduma kwa kuwafuata na pia kuwaleta Lushoto. Fanyeni tathmini ya uhalisia wa gharama zenu ili kujiridhisha kuhusu faida,” amesema.

Jaji Mkuu ametumia nafasi hiyo kuupongeza uongozi wa Chuo kwa kuhakikisha kuwa, mafunzo yanayotolewa IJA yanazingatia mabadiliko makubwa katika matumizi ya teknolojia, hususan Artificial Intelligence (Akili Mnemba).

Mhe. Prof. Juma amefarijika pia kusikia kwamba maandalizi ya jukwaa la kujifunzia ki-elektroniki (e-Learning Platform) yamekamilika na kuwa ujenzi wa studio ya kisasa umekamilika kwa asilimia 95, huku mafunzo ya kuandaa, kutengeneza na kutumia maudhui ya kwenye mtandao kwa ajili ya kufundishia na kujifunzia pia yakiwa yamefanyika.

“Hili ni jambo la faraja kwangu kwani uwepo wa jukwaa hilo la kufundishia kwa njia ya kidigitali ni ukombozi mkubwa kwa Chuo na Mahakama katika utoaji mafunzo kwa watumishi wa Mahakama na wadau kwa ujumla,” amesema.

Kufuatia uwepo wa faida nyingi za kujengwa kwa jukwaa hilo, Jaji Mkuu amekitaka Chuo kuwa imaginative, innovative ili kuvuna faida nyingi zaidi.

“Kwa mfano, sioni kinachoweza kuizuia Chuo kisitumie mfumo huu kutoa mafunzo kwa vitendo juu ya matumizi ya Kanuni inayoratibu ufunguaji wa mashauri kwa njia ya mtandao. Chuo cha Uongozi wa Mahakama kinaweza kutumia e-Learning Platform kutoa mafunzo kwa vitendo kuhusu matumizi ya mifumo ya video conference,” amesema.

Aidha, Jaji Mkuu amesema kuwa Chuo cha Uongozi wa Mahakama kina nafasi muhimu ya kushirikiana na Jeshi la Polisi na Mahakama ya Tanzania kutumia jukwaa hilo kuwafundisha Polisi namna kutekeleza Kanuni zilizotungwa zinazowawezesha kurekodi kwa njia ya video mahojiano baina yao na watuhumiwa, hivyo kupunguza malalamiko ya kubambikiwa kesi za jinai.

“Tayari zipo kanuni zinazowataka polisi waache kutegemea maelezo ya onyo wanayoaandika na badala yake warekodi kwa njia ya sauti na video mahojiano hayo,” amesema.

Vile vile, Mhe. Prof. Juma amewakumbusha Wahadhiri na watumishi wote wa Chuo cha Uongozi wa Mahakama Lushoto kuwa dirisha la kuhama kutoka matumizi ya analojia hadi matumizi ya kidijitali linazidi kuwa dogo na kwamba Sera ya TEHAMA ya Mahakama ya Tanzania ni kufikia huduma zote zitolewe kwa njia za kidijitali.

“Watumishi wote wa Chuo cha Uongozi wa Mahakama, wakiwemo Wahadhiri na Wanafunzi, hawana nafasi ya kubaki katika mifumo ya analojia wakati Mahakama ya Tanzania, Bunge na Serikali ya Tanzania wanaimba lugha ya Tanzania ya kidijitali. Huu sio wakati tena wa Wahadhiri wa Chuo cha Lushoto kutoa mafunzo kwa njia za analojia,” amesema.

Kuonyesha kuwa mwelekeo sasa hivi ni Tanzania ya Kidijitali, Waziri Mkuu, Mhe. Kassim Majaliwa, hivi karibuni alitangaza kuwa Baraza la Mawaziri linahamia katika matumizi ya mfumo wa kielektroniki (e-Cabinet) na kwamba matumizi ya eCabinet yataboresha utendaji kazi na kuleta ufanisi zaidi katika kuwahudumia wananchi.

Hivyo, Jaji Mkuu amemwomba Mwenyekiti wa Baraza la Uongozi wa Chuo na Baraza lake, kutunga Sera ambayo itawataka Wahadhiri na watumishi IJA, ndani ya muda mfupi kadri inavyowezekana, watumie mifumo ya kidijitali kufundisha, kusoma na kutoa huduma.

Amesema kuwa kukamilika kwa jukwaa kujifunzia la ki-elektroniki ni dalili ya wazi kuwa mifumo ya kidijitali ndio jibu la kurahisisha utoaji wa mafunzo na elimu kwa wanachuo watakao kuwa huoni na wale watakaopta mafunzo yao wakiwa nje ya Lushoto.

Hivyo, Mhe. Prof. Juma ametoa wito pia kwa Uongozi wa Chuo kutumia faida ya maboresho kwa kuongeza thamani ya mafunzo yanayotolewa na Chuo, kwa kushirikiana na vyuo vingine ndani na nje ya Tanzania ili kuweza kutoa mafunzo ya aina mbalimbali kwa kutumia jukwaa kujifunzia la kielektoniki.

Jaji Mkuu wa Tanzania, Mhe. Prof. Ibrahim Hamis Juma akisisitiza jambo alipokuwa anazungumza kwenye Mahafali ya 24 ya Chuo cha Uongozi wa Mahakama Lushoto leo tarehe 29 Novemba, 2024.

Jaji Mkuu wa Tanzania, Mhe. Prof. Ibrahim Hamis Juma (katikati) akiwa katika picha ya pamoja na meza kuu.

Meza Kuu inayoongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Wajumbe wa Baraza la Uongozi la Chuo cha Uongozi wa Mahakama Lushoto.

Meza Kuu inayoongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Viongozi wa Mahakama.

Meza Kuu inayoongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Wahadhili wa Chuo cha Uongozi wa Mahakama Lushoto.

Meza Kuu inayoongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Wahitimu Chuo cha Uongozi wa Mahakama Lushoto (juu na picha mbili chini).