JUDICIARY OF TANZANIA: KIKAO CHA MAHAKAMA YA RUFANI MBEYA KUSIKILIZA MASHAURI 23

Na Daniel Sichula- Mahakama, Mbeya

Naibu Msajili wa Mahakama ya Rufani ya Tanzania, Mhe. Dyness Lyimo ametoa taarifa ya mashauri yanayotarajiwa kuendeshwa na Jopo la Majaji wa Mahakama ya Rufani kwenye kikao maalum cha kuwajulisha wadau wa Mahakama kuwa vikao vya Mahakama hiyo vilivyopangwa kusikiliza mashauri Mahakama Kuu, Kanda ya Mbeya vitaanza kuendeshwa kuanzia tarehe 25 Novemba, 2024 hadi tarehe 13 Desemba, 2024 vikijumuisha mashauri 23 kati ya mashauri hayo ya jinai ni 12, masahuri ya madai tisa (9) na mashauri ya maombi ya madai ni mawili (2).

Akiendesha kikao hicho maalum Jaji wa Mahakama ya Rufani ya Tanzania Mhe. Lugano Mwandambo ambaye pia ni Mwenyekiti wa Jopo la Majaji watatu wa Mahakama ya Rufani watakao sikiliza mashauri hayo wakiwemo Mhe. Licia Kairo na Mhe. Abdulhakim Issa alisema kuwa, ni rai yake kwa wadau wote kutoa ushirikiano wa kutosha katika kipindi chote cha uendeshaji wa vikao hivyo vya usikilizaji wa mashauri hayo. Mathalani kuwafikisha wafungwa mapema mahakamani na kwa walioko mbali kufika kwa wakati.

“Lengo la kikao hichi ni kufanikisha usikilizwaji wa mashauri yaliyopo mbele yetu ya rufaani na kutoa haki kwa wadaawa kwa wakati ili kupunguza mlundikano wa wafungwa na kuondoa malaamiko ya wadau,”. alisema Mhe. Mwandambo.

Aidha, Mhe. Mwandambo aliwakumbusha Mawakili wa Serikali na wa Kujitegemea kusoma vizuri nyaraka za kumbukumbu za mashauri hayo na wakati huo huo kuwasaidia wateja wao wakiwa mahakamani ili kuisaidia Mahakama kuendesha mashauri hayo kwa ufanisi mkubwa na kutoa maamuzi stahiki na ya haki kwa wadaawa.

Vilevile, Mhe. Mwandambo aliwashauri Mawakili wote walioshiriki kikao hicho kujenga utamaduni wa kwenda mahakamani mara kwa mara kusikiliza na kujifunza namna uendashaji wa mashauri ya aina hiyo ili kuzijua taratibu za uendeshaji wa mashauri na kuijua Mahakama zaidi kwani kufanya hivyo kutawajengea uwezo na kuongeza weledi kitaaluma.

Awali akisoma taarifa ya Magereza mbele ya Jopo la Majaji hao wa Rufani Inspekta wa Magereza kutoka Gereza la Ruanda jijini Mbeya Frank Kakamba alisema, Gereza ya Ruanda Mbeya lina idadi ya Wafungwa na Mahabusu wapatao 942. Wafungwa wanaosubiri mashauri yao ya rufaani kusikilizwa kupitia vikao hivyo ni wafungwa 12 na wafungwa sita (6) tayari wapo gerezani na wafungwa wengine sita (6) wanaandaliwa kutoka magereza yaliyopo nje ya jiji la Mbeya, aliahidi kuwa wafungwa hao watafikishwa gerezani hapo kabla ya mashauri yao kuanza kusikilizwa.

Naye, Naibu Msajili wa Mahakama Kuu Kanda ya Mbeya Mhe. Aziza Temu, awashukuru Majaji wa Mahakama ya Rufani na kuwahakikishia kwamba maandalizi yote ya vikao hivyo yamekamilika na kuahidi kuendelea kutoa ushirikiano wakati wote wa uendeshaji wa vikao hivyo pale utakapo hitajika.

Wakati huo huo, Mtendaji wa Mahakama Kuu, Kanda ya Mbeya Bi. Mavis Miti alisema uwepo wa vikao hivyo vya kusikiliza mashauri ya rufaani kunapunguza malalamiko ya wafungwa walioko gerezani kwa kusikiliza rufaani zao pia kuna saidia kupunguza wafungwa gerezani.

Naibu Msajili wa Mahakama ya Rufani ya Tanzania, Mhe. Dyness Lyimo (aliyesimama) ametoa taarifa ya mashauri yanayotarajiwa kuendeshwa na Jopo la Majaji wa Mahakama ya Rufani na kushoto ni Jaji wa Mahakama ya Rufani ya Tanzania Mhe. Lugano Mwandambo ambaye pia ni Mwenyekiti wa Jopo la Majaji watatu wa Mahakama ya Rufani.

Sehemu ya Jopo la Majaji watatu wa Mahakama ya Rufani watakao sikiliza mashauri hayo wakiwemo Mhe. Licia Kairo na Mhe. Abdulhakim Issa wakiwa kwenye kikao hicho.

Jaji wa Mahakama Kuu ya Tanzania Kanda ya Mbeya Mhe. Mussa Pomo akifafanua jambo wakati wa kikao hicho, kulia ni Naibu Msajili wa Mahakama Kuu Kanda ya Mbeya Mhe. Aziza Temu.