MAHAKIMU WANOLEWA JUU YA SHERIA YA ULINZI WA TAARIFA BINAFSI

Na YUSUFU AHMADI –IJA, Lushoto

Mahakimu Wakazi wafawidhi 29 wa Mahakama za Hakimu Mkazi nchini wamepatiwa mafunzo ya uelewa na utekelezaji wa Sheria ya Ulinzi wa Taarifa Binafsi ya mwaka 2022 (Personal Data Protection Act of 2022) kwa lengo la kuwajengea uwezo Maafisa hao kuhusu Sheria hiyo na umuhimu wa kulinda haki za faragha za watu binafsi.

Mafunzo hayo yamefunguliwa na Jaji Mfawidhi wa Mahakama Kuu ya Tanzania kanda ya Tabora Mhe. Dkt. Adam Mambi kwa niaba ya Jaji Kiongozi wa Mahakama hiyo ya Tanzania Mhe. Dkt. Mustapher Siyani, tarehe 13/11/2024 katika Hoteli ya Four Points by Sheraton jijini Dar es Salaam. Mafunzo ambayo yameandaliwa na Chuo cha Uongozi wa Mahakama Lushoto (IJA) kwa  ufadhili wa Tume ya Ulinzi wa Taarifa Binafsi  pamoja na Jamiiforums.

Katika hotuba yake Mhe. Dkt. Mambi amesema kuwa mapinduzi ya kidigitali yaliyoletwa na TEHAMA, akili Mnemba na Teknolojia zingine zinazoibuka, yamebadilisha jinsi taarifa zinavyokusanywa, kuchakatwa na kusambazwa, hivyo ni muhimu taarifa za watu binafsi, zikalindwa na kuhakikisha kuwa zinashughulikiwa kwa uadilifu na heshima.

Pia amesema kuwa ujio wa Sheria hiyo ya ulinzi wa taarifa binafsi unafanya sasa ulinzi wa taarifa hizo kuwa wakisheria na sio wa kimaadili pekee jambo ambalo litasaidia kuepusha madhara mbalimbali kwa watu binafsi, taasisi, biashara na jamii kwa ujumla.

Vilevile, Mhe. Dkt. Mambi amewasihi washiriki hao kuielewa vema Sheria hiyo ili waweze kuitekeleza kwa ufanisi ili kuhakikisha jamii inakuwa na uhakika kuwa taarifa zao binafsi ziko salama.

Naye Mkurugenzi Mtendaji wa Tume hiyo, Dkt. Emmanuel Mkilia amewaambia Mahakimu hao pamoja na maafisa wengine wa Mahakama kwamba nao wana jukumu muhimu katika ulinzi wa taarifa binafsi kwa kuwa sheria hiyo inaitambua Mahakama kama mdau muhimu kwenye utekelezaji wa sheria hiyo.

Awali akitoa maelezo kuhusu IJA, Mkurugenzi wa Mafunzo ya Kimahakama na Elimu Endelevu Mhe. Dkt. Patricia Kisinda ameishukuru Tume hiyo ya ulinzi wa Taarifa binafsi kwa kufadhili mafunzo hayo pamoja na dhamira yao ya kutoa mafunzo kwa Maafisa hao wa Mahakama akisema kuwa yatasaidia kuimarisha ufanisi na uelewa wao juu ya Sheria hiyo pamoja na utekelezaji wake.

Mafunzo hayo ya siku mbili hadi tarehe 14/11/2024 yameanza kwa Mahakimu hao na baadaye yatafanyika pia kwa makundi mengine ya Majaji na Mahakimu wa ngazi zingine.

Sheria hiyo ya ulinzi wa taarifa binafsi maarufu PDPA ilitungwa na Serikali mwaka 2022 kwa minajili ya kuweka mwongozo wa jinsi taarifa binafsi zinapaswa kulindwa ili zisitumike vibaya.

Aidha mwezi uliyopita, IJA iliendesha mafunzo kwa njia ya mtandao yaliyohusu uelewa wa sheria hiyo ambayo yaliwakutanisha wadau mbalimbali wa sheria.

Jaji Mfawidhi wa Mahakama Kuu ya Tanzania Kanda ya Tabora Mhe. Dkt. Adam Mambi akiwa katika picha ya pamoja na Washiriki wa mafunzo hayo ambao ni Mahakimu Wakazi Wafawidhi. Kushoto ni  Mkurugenzi Mtendaji wa Tume ya Ulinzi wa Taarifa Binafsi (PDPC), Dkt. Emmanuel Mkilia na kulia ni Mkurugenzi wa Mafunzo ya Kimahakama na Elimu Endelevu IJA Mhe. Dkt. Patricia Kisinda

Jaji Mfawidhi wa Mahakama Kuu ya Tanzania Kanda ya Tabora Mhe. Dkt. Adam Mambi akihutubia kabla ya kufungua mafunzo ya uelewa na utekelezaji wa Sheria ya Ulinzi wa Taarifa Binafsi ya mwaka 2022 (Personal Data Protection Act of 2022) Mahakimu Wakazi wafawidhi 29 wa Mahakama za Hakimu Mkazi nchini kwa lengo la kuwajengea uwezo Maafisa hao kuhusu Sheria hiyo na umuhimu wa kulinda haki za faragha za watu binafsi. Mhe. Dkt. Mambi amefungua mafunzo hayo kwa niaba ya Jaji Kiongozi wa Mahakama hiyo ya Tanzania Mhe. Dkt. Mustapher Siyani, leo tarehe 13/11/2024 katika Hoteli ya Four Points by Sheraton jijini Dar es Salaam.

Mkurugenzi Mtendaji wa Tume ya Ulinzi wa Taarifa Binafsi (PDPC), Dkt. Emmanuel Mkilia akizungumza wakati wa mafunzo hayo.

Mkurugenzi wa Mafunzo ya Kimahakama na Elimu Endelevu IJA Mhe. Dkt. Patricia Kisinda akitoa neno la awali katika mafunzo hayo.

Jaji Mfawidhi wa Mahakama Kuu ya Tanzania kanda ya Tabora Mhe. Dkt. Adam Mambi akiwa katika picha ya pamoja na Watendaji kutoka Jamiiforums  Tume ya Ulinzi wa Taarifa binafsi (PDPC). 

 Jaji Mfawidhi wa Mahakama Kuu ya Tanzania kanda ya Tabora Mhe. Dkt. Adam Mambi (katikati) akiwa katika picha ya pamoja na Watendaji kutoka Jamiiforums pamoja na kutoka Tume ya Ulinzi wa Taarifa Binafsi (PDPC).