‘UBORA, MAFANIKIO BAADA YA KUHITIMU MASOMO HUTEGEMEA MAADILI MEMA’

Na FAUSTINE KAPAMA-Mahakama, Lushoto

Jaji Mkuu wa Tanzania, Mhe. Prof. Ibrahim Hamis Juma amewaasa wahitimu 762 wa Chuo cha Uongozi wa Mahakama Lushoto (IJA) kuwa na maadili mema katika kazi na kuwa tayari kukabiliana na changamoto mbalimbali zitakazojitokeza ambazo jamii inategemea kuzitatua kama wasomi katika ngazi waliyofikia.

Mhe. Prof. Juma ametoa rai hiyo leo tarehe 29 Novemba, 2024 wilayani hapa katika Mahafali ya 24 ya Chuo cha Mahakama Lushoto ambayo pia yamehudhuriwa na Wajumbe wa Baraza la Ugonzi wa Chuo, Viongozi wa Mahakama na Viongozi wengine wa Serikali na Dini mbalimbali.

“Pamoja na ujuzi, maarifa na taaluma mliyopata hapa chuoni, Chuo hiki kinasifika kwa kuwajengea wanafunzi na wahitimu misingi bora ya kimaadili na hivyo kukifanya Chuo chetu kuwa na maana ya kuwepo kwake. Ninawakumbusha wahitimu kuwa, ubora wenu na mafanikio yenu baada ya kuhitimu kwa kiasi kikubwa itategemea sana maadili mema katika utendaji wa kazi,” amesema.

Jaji Mkuu amebainisha kuwa Mahafali hayo ya 24 ni kielelezo kuwa Chuo hicho kinaendeleza utamaduni wake wa kuongeza wahitimu waliojazwa maarifa, ujuzi na taaluma itakayosaidia nchi na kuwasaidia wao pia katika safari ndefu ya kielimu, kimaisha mbele yao na katika kuijenga Tanzania.

Hivyo, ni imani yake kuwa kila mhitimu wa Astashahada ya Msingi ya Sheria (Basic Technician Certificate in Law), Astashahada ya Sheria (Technician Certificate in Law), au wa Stashahada ya Sheria (Diploma in Law) ameiva na yuko tayari kuja katika elimu ya juu zaidi, au katika nafasi yoyote itakayojitokeza na yuko tayari kukabiliana na changamoto zozote na kuzitafutia ufumbuzi.

“Kila mmoja wenu atapewa kipande cha karatasi, au Cheti, kuthibitisha umehitimu Astashahada ya Msingi ya Sheria, Astashahada ya Sheria au wa Stashahada ya Sheria. Muda mfupi baada ya sherehe, kila mmoja wenu atagundua kuwa umuhimu wake utapimwa sio kwa gamba au ganda, bali ni kwa kiasi gani utatatua changamoto zitakazojitokeza ambazo jamii inategemea mhitimu wa daraja lako anaweza kuzitatua,” amesema.

Mhe. Prof. Juma amewasihi wahitimu hao kwenda kuipeperushe vema bendera ya Chuo na kuwa mabalozi wa kazi hiyo kubwa na nzuri inayoendelea IJA, kwani imejijengea heshima, ikiwemo kutoa watumishi wengi katika Mahakama kama vile Majaji, Naibu Wasajili na wengine na wale ambao wameajiriwa kwenye ofisi na taasisi mbalimbali chini.

Naye Mwenyekiti wa Baraza la Uongozi wa Chuo na Jaji wa Mahakama ya Rufani Tanzania, Mhe. Dkt. Mary Levira, akizungumza kabla ya kumkaribisha Jaji Mkuu kuhutubia kwenye mahafali hayo, amewaasa wahitimu kuwa elimu waliyopata ni mwanzo wa safari nyingine ya kupata elimu ya juu, hasa kwa kuzingatia ushindani mkubwa ulipo katika soko la ajira na ongezeko la wasomi nchini.

“Matumaini yangu kuwa wote mtaendelea au mmeshaanza masomo ya ngazi za juu, ni vizuri mkajua kwamba ni wajibu wenu kuendelea kujifunza kwani soko la ajira limegubikwa na athari za utandawazi zenye kuhitaji mbinu mpya za kuyakabili mabadiliko hayo ambayo yapo katika utandawazi,” amesema.

Amewasihi wale watakaoingia kwenye ajira kuwa mabolozi wazuri wa chuo hicho na wanaweza kulifanikisha jambo hilo kwa ujipambanua katika soko la ajira na shughuli mbalimbali watakazokuwa wanazifanya.

Naye Mkuu wa Chuo cha IJA na Jaji wa Mahakama ya Rufani, Mhe. Dkt. Paul Kihwelo amesema kuwa mahafali hayo ya 24 yanajumuisha jumla ya wahitimu 762, wakiwemo wa Astashahada ya Msingi ya Sheria 245 (134 wanawake, sawa na asilimia 55 na 111 wanaume, sawa na asilimia 45), Astashahada ya Sheria 279 (138 wa kike, sawa na asilimia 49 na 141 wa kiume, sawa na asilimia 51) na Stashada ya Sheria 238 (105 wa kike, sawa na asilimia 44 na 133 wa kiume, sawa na asilimia 56).

“Mpaka kufikia mahafali ya leo (tarehe 29 Novemba, 2024) jumla ya wahitimu 8,954 wamehitimu katika Chuo, hiki ikilinganisha na wanachuo 27,442 waliodahiliwa mpaka sasa,” amesema na kubainisha kwa mafanikio ya vijana hao ni zao la utumishi bora wa wahadhiri pamoja na watumishi waendeshaji ambao siku zote wamekuwa wanajituma kuhakikisha kuwa IJA inatoa elimu bora na sio bora elimu.

Mhe. Dkt. Kihwelo amesema pia kuwa wahitimu hao ni zao la Baraza la Uongozi wa Chuo, ambalo limekuwa likitoa maelekezo kwa menejimenti kuboresha utoaji wa huduma katika Chuo na maelekezo hayo yamekuwa yakifayiwa kazi.

Mkuu wa chuo ametumia fursa hiyo kuwapongeza kwa dhati vijana hao ambao wamefikia hatua muhimu katika maisha yao ya kuhitimu masomo yao kwa ngazi mbalimbali hapo chuoni.

Jaji Mkuu wa Tanzania, Mhe. Prof. Ibrahim Hamis Juma (juu na chini) akizungumza katika Mahafali ya 24 ya Chuo cha Uongozi wa Mahakama Lushoto leo tarehe 29 Novemba, 2024. Jumla ya wanafunzi 762 wamehitimu masomo yao katika ngazi mbalimbali.

Mwenyekiti wa Baraza la Uongozi la Chuo cha Uongozi wa Mahakama Lushoto na Jaji wa  Mahakama ya Rufani Tanzania, Mhe. Dkt. Mary Levira akizungumza katika mahafali hayo.

Mkuu wa Chuo cha Uongozi wa Mahakama Lushoto na Jaji wa Mahakama ya Rufani, Mhe. Dkt. Paul Kihwelo akizungumza wakati wa mahafali hayo.

Meza Kuu ikiongozwa na Jaji Mkuu wa Tanzania, Mhe. Prof. Ibrahim Hamis Juma (juu na chini katikati) baada ya kuwasili ukumbini kabla ya mahafali kuanza.

Sehemu ya wahitimu (juu na chini) katika mahafali hayo.

Sehemu nyingine ya wahitimu (juu na chini) katika mahafali hayo.

Sehemu ya maandamano ya Viongozi na Wahitimu kuelekea kwenye ukumbi uliotengwa kwa ajili ya mahafali hayo.