WATUMISHI MANYARA WAFANYA ZIARA YA UTALII KATIKA HIFADHI YA ZIWA MANYARA

Na CHRISTOPHER MSAGATI –Mahakama, Manyara

Jaji Mfawidhi wa Mahakama Kuu ya Tanzania, Kanda ya Manyara Mhe. John Rugalema Kahyoza, amewaongoza watumishi wa Mahakama Kuu Kanda hiyo, kufanya ziara ya utalii iliyofanyika jana tarehe 16 Novemba, 2024 katika Hifadhi ya Ziwa Manyara (Lake Manyara National Park) mkoani wa Arusha.

Akizungumza na watumishi kwa nyakati tofauti wakati wa maandalizi na hitimisho la ziara hiyo, Mhe. Kahyoza alieleleza lengo la ziara hiyo ni kuwawezesha watumishi kuwa na uelewa na vivutio vya utalii vilivyomo nchini ili waweze kuvitangaza kwa watu wengine.

“Kanda yetu ya Manyara ina bahati ya kuzungukwa na Hifadhi za Taifa, mapori ya akiba pamoja na mbuga za wanyama, hivyo sisi tuna wajibu wa kuvitambua vivutio hivyo kwa usahihi kwa sababu tumekuwa na desturi ya kuona wageni wanaotoka mbali ndiyo wanaofika kutembelea maeneo hayo wakati sisi wenyeji tupo karibu na hatuna uelewa wa vivutio vinavyotuzunguka. Kwa sababu hiyo tukivielewa vizuri tutakuwa mabalozi wazuri wa kuvitangaza kwa watu wengine wa ndani na nje ya taifa letu” alisema Mhe. Kahyoza.

Aidha, ziara hiyo iliyotanguliwa na Kikao cha Majaji na Mahakimu Nchini Tanzania (JMAT) Tawi la Manyara kilichofanyika tarehe 15 Novemba 2024 katika eneo la Mto wa Mbu mkoani Arusha. Mwenyekiti wa JMAT Tawi la Manyara Jaji wa Mahakama Kuu Kanda ya Manyara Mhe. Devotha Kamuzora alisema kuwa ziara hiyo ya Utalii pia ni sehemu ya kuburudika baada ya kufanya kazi nyingi kwa muda mrefu.

“Mara nyingi tunafanya kazi hizi za kusikiliza mashauri kwa muda mrefu na huwa muda wa kupumzika au kuburudika unakuwa mfupi sana, watumishi wengi hupatwa na msongo wa Mawazo na matatizo mengine kwa sababu ya kukosa muda wa kupata burudani kama hizi, ninaamini baada ya ziara hii ya Utalii tuliyoifanya leo, kila mmoja atarejea kituoni kwake akiwa amepata mtazamo mpya kiakili na hata kisaikolojia” alisema Mhe. Kamuzora.

Katika hatua nyingine Hakimu Mkazi Mfawidhi wa Mahakama ya Hakimu Mkazi Manyara Mhe. Mariam Bakari Lusewa aliushukuru uongozi wa Hifadhi ya Ziwa Manyara kwa mapokezi mazuri na kuwatembeza katika maeneo muhimu ndani ya hifadhi hiyo.

“Kimsingi kazi zetu zina uhusiano mkubwa sana, wakati nyinyi mnalinda hifadhi hizi, kazi yetu mojawapo kama Mahakama ni kusikiliza mashauri yanayohusu uhalifu wowote unaotokea katika hifadhi hizi. Kwa sababu hiyo ziara hii itazidi kuboresha mahusiano yetu na tunawashukuru sana kwa mapokezi mazuri mliyotupa,” alisema Mhe. Lusewa.

Ziara hiyo ilijuimuisha viongozi waandamizi wa Kanda hiyo wakiwemo Majaji Mhe. Frank Muyora Mirindo, Mhe. Nenelwa Mwihambi. Pamoja na Mahakimu wa Mahakama ya Hakimu Mkazi Manyara na Mahakama za Wilaya na za Mwanzo zilizopo katika Wilaya za Babati, Hanang, Kiteto, Mbulu na Simanjiro.

Aidha, katika ziara hiyo, pamoja na kuwaona  Wanyama wa aina mbalimbali, watumishi walifurahishwa kuona chemchem za maji ya moto yanayotoka ardhini lakini kubwa zaidi ilikuwa ni kutembea  katika Daraja linalonesanesa ambalo limefungwa na kamba juu ya miti ambapo watumishi wengi walionekana kupita kwa mashaka na hofu na msisimko japo wengi walifurahi sana kupita mpaka mwisho bila kuanguka.

Watumishi wa Mahakama Kuu ya Tanzania Kanda ya Manyara wakiwa wamejipanga kwenye picha ya pamoja wakijiweka tayari kwa ajili ya safari ya kuelekea katika Hifadhi ya Ziwa Manyara.

Sehemu ya Watumishi wa Mahakama Kuu ya Tanzania, Kanda ya Manyara wakisikiliza kwa makini maelezo ya Viongozi wa Hifadhi ya Ziwa Manyara, wa kwanza kushoto ni Jaji Mfawidhi wa Mahakama Kuu ya Tanzania, Kanda ya Manyara Mhe John Kahyoza akifuatiwa na Jaji wa Mahakama Kuu Kanda ya Manyara Mhe. Frank Mirindo.

Jaji wa Mahakama Kuu Kanda ya Manyara Mhe. Frank Mirindo akipita kwenye daraja lililosukwa kwa kamba wakati wa ziara hiyo.

Sehemu ya Watumishi wa Mahakama Kuu ya Tanzania Kanda ya Manyara wakiwa katika Daraja la Kamba lililofungwa juu ya miti katika eneo la Hifadhi ya Ziwa Manyara.

Jaji wa Mahakama Kuu Kanda ya Manyara Mhe. Devotha Kamuzora (kushoto) akiwa na baadhi ya Waheshimuwa Mahakimu Wakazi kutoka Kanda hiyo Mhe. Neema Lazaro (katikati) na Mhe. Kuruthumu Mkundawantu (kulia) katika eneo la Hifadhi ya Ziwa Manyara.

(Habari Hii Imehaririwa na Innocent Kansha-Mahakama)