TANZIA; MTUMISHI WA MAHAKAMA AFARIKI DUNIA

 TANZIA

Mahakama ya Tanzania inasikitika kutangaza kifo cha Mtumishi wake Mhe. Maximillian Alphonce Malewo aliyekuwa Naibu Msajili akihudumu katika Mahakama ya Hakimu Mkazi Kisutu jijini Dar es salaam.  Marehemu Mhe. Malewo alikuwa pia ni Hakimu Mwenye Mamlaka ya Nyongeza ya Kusikiliza Mashauri ya Mahakama Kuu.

Kwa mujibu wa taarifa iliyotolewa na Ofisi ya Msajili Mkuu wa Mahakama ya Tanzania, marehemu Mhe. Malewo alikutwa na umauti mnamo tarehe 17 Desemba, 2024 majira ya saa moja usiku wakati alipokuwa amelazwa akipatiwa huduma ya matibabu katika Hospitali ya Taifa Muhimbili iliyopo Mloganzila mkoani Dar es Salaam baada ya kuugua na kulazwa. Marehemu anatarajiwa kuagwa tarehe 20 Disemba, 2024 Misugusugu Kibaha Mkoani Pwani na atazikwa tarehe 21 Disemba, 2024  Himo Kilanja- Kilimanjaro.

 Aidha, marehemu Mhe. Maximillian Alphonce Malewo alizaliwa mnamo tarehe 28 Julai, 1975. Aliajiriwa na Mahakama ya Tanzania tarehe 03 Januari, 2002 kama Hakimu Mkazi Daraja la III na kupangiwa Kituo cha Kazi Mahakama ya Hakimu Mkazi Musoma alihudumu katika wadhifa huo hadi mwaka 2006. Mnamo mwaka 2006 hadi 2009 aliteuliwa kuwa Hakimu Mkazi Mfawidhi Mahakama ya Wilaya Mbinga. Mwaka 2009 aliteuliwa kuwa Naibu Msajili  na kupangiwa Mahakama  ya Rufani alipohudumu hadi 2015.

Vilevile, Akiwa anaendelea na wadhifa wake wa Naibu Msajili, mwaka 2015 hadi 2016 alipangiwa kuhudumu Mahakama Kuu Divisheni ya Kazi. Mwaka 2016 hadi 2021 alipangiwa kuhudumu Mahakama Kuu Kanda ya Songea. Mwaka 2021 alipangiwa kuhudumu Mahakama Kuu Kanda ya Iringa na mnamo Julai, 2024 alipangiwa kuhudumu Mahakama ya Hakimu Mkazi Kisutu, mpaka mauti yalipomfika.

Mahakama ya Tanzania inaungana na ndugu, jamaa na marafiki kuomboleza msiba huu wa kuondokewa na mpendwa wetu.

BWANA ALITOA NA BWANA AMETWAA JINA LA BWANA LIHIMIDIWE.

 

Marehemu Maximillian Alphonce Malewo enzi za uhai wake.