JAJI MFAWIDHI IRINGA AFANYA UKAGUZI WA MAHAKAMA ZA MWANZO

·        Asisitiza kufanya kazi kwa uadilifu, weledi na uwajibikaji

·        Apongeza wananchi kusaidia kukarabati jengo la Mahakama

Na LUSAKO MWANG’ONDA, Mahakama- Iringa

Jaji Mfawidhi wa Mahakama Kuu ya Tanzania, Masjala Ndogo ya Iringa, Mhe. Dunstan Ndunguru amefanya ziara ya ukaguzi wa Mahakama za Mwanzo katika Wilaya ya Iringa ambazo ni Mlolo, Ifunda na Kiponzero na kuwataka watumishi wa Mahakama hizo kufanya kazi kwa Uadilifu, Weledi na Uwajibikaji.

Katika ziara hiyo iliyofanyika hivi karibuni, Mhe. Ndunguru alipokea taarifa za utendaji kazi wa Mahakama hizo za Mwanzo, zilizofafanua baadhi ya mafanikio na changamoto katika utendaji kazi mathalani uchakavu wa majengo ya Mahakama, upungufu wa watumishi na sehemu ya majengo ya kutolea huduma kukosa umeme.

Mhe. Ndunguru aliwapongeza watumishi wa Mahakama hizo kwa jitihada wanazozifanya katika kupunguza mlundikano wa mashauri mahakamani na pia utekelezaji wa Mpango Mkakati waliojiwekea wa kupunguza Mahabusu gerezani na kuwezesha idadi ya mahabusu kupungua kwenye Magereza yaliyo katika Mkoa wa Iringa.

Vilevile, Jaji Ndunguru aliwasisitiza Mahakimu wa Mahakama hizo kushughulikia mashauri ya mirathi kwa weledi na uadilifu na pia kuhakikisha wanufaika wa mirathi hiyo wanalipwa stahiki zao kwa wakati na kuwahimiza wanufaika hao kufunga mashauri hayo baada ya kukamilika kwa taratibu husika.

“Moja ya vipaumbele vya Mahakama Kuu ya Tanzania, Masjala Ndogo ya Iringa ni kuhakikisha wanufaika wa mirathi wanalipwa na kwamba wasipolipwa kwa wakati inaleta taswira kwamba Mahakama ina miliki fedha nyingi ambazo kimsingi ni za warithi wa marehemu,” alieleza Jaji Mfawidhi huyo.

Akizungumza katika vikao alivyofanya na watumishi wa Mahakama hizo, Mhe. Ndunguru aliwasisitiza watumishi hao kufanya kazi kwa bidii, ushirikiano na upendo hasa wakiongozwa na salamu ya Mahakama ambayo ni nguzo ya utendaji kazi mahakamani ya, ‘Uadilifu, Weledi na Uwajibikaji’ ili kuendelea kujenga imani kwa wananchi katika utoaji haki.

Aidha, Mhe. Ndunguru alitumia ziara hiyo kukutana na kuushukuru Uongozi wa Kata ya Kiponzelo kwa jitihada zao za kuisaidia nguvu kazi Mahakama katika kukarabati jengo la Mahakama ya Mwanzo ya Kiponzelo na kuwezesha kuanza kwa shughuli za Mahakama ambazo kwa kipindi kirefu zilikuwa zimesimama kutokana na uchakavu wa jengo hilo.

Jaji Mfawidhi wa Mahakama Kuu ya Tanzania Masjala Ndogo ya Iringa, Mhe. Dustan B. Ndunguru akisaini kitabu cha wageni baada ya kuwasili katika Mahakama ya Mwanzo Mlolo kwa ajili ya kufanya ukaguzi hivi karibuni.

Jaji Mfawidhi wa Mahakama Kuu ya Tanzania Masjala Ndogo ya Iringa, Mhe. Dustan B. Ndunguru (kushoto) akipokelewa katika Mahakama ya Mwanzo ya Mlolo alipotembelea hivi karibuni kwa ajili ya ukaguzi.

     

Jaji Mfawidhi wa Mahakama Kuu ya Tanzania Masjala Ndogo ya Iringa, Mhe. Dustan Ndunguru akisaini kitabu cha wageni baada ya kuwasili katika Mahakama ya Mwanzo ya Ifunda kwa ajili ya kufanya ukaguzi.

 Jaji Mfawidhi wa Mahakama Kuu ya Tanzania Kanda ya Iringa Mhe. Dustan Ndunguru akiagana na baadhi ya Viongozi wa Kata ya Kiponzelo baada ya kukagua maendeleo ya ukarabati wa jengo la Mahakama ya Mwanzo Kiponzelo.

(Habari hii imehaririwa na MARY GWERA, Mahakama-Dodoma)