MAFUNZO ELEKEZI NI MUHIMU KWA UENDESHAJI WA KAZI YA UTOAJI HAKI; JAJI KIHWELO

Na MARY GWERA, Mahakama-Dodoma

Jaji wa Mahakama ya Rufani Tanzania na Mkuu wa Chuo cha Uongozi wa Mahakama Lushoto (IJA), Mhe. Dkt. Paul Faustine Kihwelo amesema Mafunzo Elekezi kwa Naibu Wasajili wa Mahakama ni muhimu kwa mustakabali wa uendeshaji wa Mahakama na utoaji wa haki nchini.

Mhe. Dkt. Kihwelo ameeleza hayo leo tarehe 31 Agosti, 2026 wakati akitoa neno la utangulizi wakati wa hafla ya Ufunguzi wa Mafunzo hayo iliyofanyika kwenye Ukumbi wa Mikutano Makao Makuu ya Mahakama ya Tanzania jijini Dodoma.

“"Mhe. Jaji Mkuu, kama nilivyosema awali, mafunzo haya yameandaliwa ikiwa ni sehemu ya utekelezaji wa Mpango Mkakati. Na moja ya eneo muhimu sana ni kujengea uwezo watumishi wa Mahakama ili waweze kutekeleza majukumu yao kwa weledi. Na mafunzo elekezi haya yanakusudia kulifikia huko,” amesema Jaji Kihwelo.

Mkuu huyo cha Chuo cha IJA amesema kuwa, mafunzo hayo ni sehemu ya utekelezaji wa Mpango Mkakati wa Mahakama na Sera ya Mafunzo ya Mahakama ya mwaka 2019, lakini pia ni sehemu ya Sera ya Mafunzo ya Taifa ambayo inataka Viongozi wote katika ngazi mbalimbali pamoja na watumishi waweze kupata mafunzo elekezi kabla ya kuanza kutumikia nyadhifa mpya.

Aidha, Mhe. Dkt. Kihwelo amemshukuru Jaji Mkuu, Mhe. Masaju kwa kukubali kuwa Mgeni Rasmi na kuona umuhimu wa kufanyika kwa mafunzo hayo na kuweza kuja kufungua mafunzo hayo yeye mwenyewe bila kutuma Mwakilishi. kutumikia nafasi hizo."

Kadhalika, Jaji Kihwelo amewapongeza Naibu Wasajili hao ambao wamepata nafasi hizo kwa imani ambayo Uongozi wa Mahakama umeonesha kwao. Hivyo, amewatakia kila la heri katika utumishi wao wakitumikia nafasi hiyo ya muhimu sana ambapo amesisitiza kuwa siku zote anaamini kuwa, injini ya Mahakama ni Wasajili pamoja na Watendaji.

Kuhusu ratiba ya mafunzo hayo kwa Naibu Wasajili, Mhe. Dkt. Kihwelo amesema kwamba, ratiba hiyo imeandaliwa kwa umakini sana. Lakini pia uteuzi au uchaguzi wa Wawezeshaji umefanyika kwa umakini ili kuhakikisha kwamba Wasajili hao watapitishwa kwa muda muda mdogo wa siku tano, lakini kile watakachokipata ni kikubwa.

“Wawezeshaji wengi ni wabobezi kama nilivyosema, walio wengi kwa kweli wamekuwa na uzoefu wa kufanya kazi katika maeneo yao. Kwa hiyo naamini waheshimiwa watapata fursa nzuri sana,” ameeleza Jaji Kihwelo.

Ameongeza kuwa, ratiba hiyo imejikita kwenye kutatua au kwenye maeneo ambayo ni changamoto za Mahakama kwa sasa na baadaye.

“Mara nyingi tukisema mafunzo lazima yajikite kwenye kuhakikisha tuna tunatibu changamoto zilizopo na changamoto za baadaye. Ndio maana kwa mara ya kwanza, kwa kweli, naona kuna mafunzo kabisa maalum kwa ajili ya Waendeshaji wa Masjala ya Mahakama ya Rufani katika Masjala ndogo za Mahakama ya Rufani katika ngazi tofauti,” amesema Jaji Kihwelo.

Katika hatua nyingine, Mhe. Dkt. Kihwelo amewapongeza washiriki hao kushiriki mafunzo kwa mara ya kwanza katika ukumbi mpya wa Mahakama uliopo ndani ya jengo la Makao Makuu ya Mahakama ya Tanzania na kuchukua fursa hiyo kumpongeza Jaji Mkuu na Menejimenti ya Mahakama ya Tanzania kwa ujumla.

Jaji wa Mahakama ya Rufani Tanzania na Mkuu wa Chuo cha Uongozi wa Mahakama Lushoto (IJA), Mhe. Dkt. Paul Faustine Kihwelo  akitoa neno la utangulizi leo tarehe 31 Agosti, 2026 wakati wa hafla ya Ufunguzi wa Mafunzo hayo iliyofanyika kwenye Ukumbi wa Mikutano Makao Makuu ya Mahakama ya Tanzania jijini Dodoma.

Sehemu ya Naibu Wasajili wapya pamoja, Viongozi na Watumishi wengine wa Mahakama waliohudhuria Hafla ya Ufunguzi wa Mafunzo Elekezi kwa Naibu Wasajili wa Mahakama Kuu ya Tanzania leo tarehe 31 Agosti, 2026 kwenye ukumbi wa mikutano wa Makao Makuu ya Mahakama ya Tanzania jijini Dodoma.