JAJI MFAWIDHI MBEYA AANZA ZIARA YA UKAGUZI WA SHUGHULI ZA MAHAKAMA

Na MUKSINI NAKUVAMBA – Mahakama, Mbeya

Jaji Mfawidhi wa Mahakama Kuu, Masjala Ndogo ya Mbeya, Mhe. Fahamu Mtulya, ameanza ziara ya ukaguzi katika maeneo mbalimbali ya Masjala hiyo kwa lengo la kutathmini utendaji wa kazi ili kubaini mafanikio na changamoto katika utoaji wa huduma, mazingira ya kazi na miundombinu ya Mahakama.

Ziara hiyo iliyoanza tarehe 03 Septemba 2026 ni sehemu ya utekelezaji wa Mahakama kusogeza huduma za haki karibu na wananchi, ambapo Mhe. Mtulya anatembelea Mahakama zinazotoa huduma pamoja na maeneo ambayo kwa sasa hayatoi huduma kutokana na sababu mbalimbali, ikiwemo uchakavu wa miundombinu, ukosefu wa majengo ya kutolea huduma na maeneo ambayo tayari yametengwa na Serikali za vijiji kwa kushirikiana na wananchi kwa ajili ya uanzishwaji wa huduma za Mahakama.

Katika ziara hiyo, Mhe. Mtulya ametembelea Mahakama ya Wilaya ya Kyela pamoja na Mahakama za Mwanzo Busale, Ndobo, Ikolo na Kyela Mjini, ambapo amekagua hali ya utendaji, mazingira ya kazi na miundombinu ya Mahakama hizo.

Aidha, Mhe. Mtulya ametembelea maeneo ya Lema, Ipande, Mwaya na Kajunjumele, ambayo kwa sasa hayatoi huduma za Mahakama, huku baadhi ya maeneo hayo yakiwa na viwanja vilivyotengwa na Serikali za Vijiji kwa kushirikiana na wananchi kwa ajili ya ujenzi wa Mahakama.

Akizungumza wakati wa ziara hiyo, Mhe. Mtulya ameeleza kuwa kutembelea maeneo yenye viwanja vilivyotengwa kwa ajili ya ujenzi wa Mahakama ni muhimu katika kuhakikisha maeneo hayo yanalindwa na kutumika kwa madhumuni yaliyokusudiwa.

“Katika kutekeleza mkakati wa Mahakama wa kusogeza huduma za Mahakama karibu na wananchi, ndiyo maana sisi tumekuja kutekeleza ziara hii ili kufanikisha mkakati huo,” amesema Mhe. Mtulya.

Katika kuhakikisha maeneo yaliyotengwa kwa ajili ya ujenzi wa Mahakama yanalindwa, Mhe. Mtulya amewaelekeza viongozi wa maeneo husika kufuatilia upatikanaji wa hati za umiliki na kuweka alama za utambuzi katika kingo za viwanja hivyo ili kuvilinda dhidi ya uvamizi na matumizi yasiyokusudiwa.

Vilevile, amesisitiza umuhimu wa kutunza miundombinu ya Mahakama iliyopo na kuboresha mazingira ya kazi, ikiwa ni pamoja na usafi wa mazingira, upandaji na utunzaji wa miti na kuhakikisha majengo pamoja na maeneo ya Mahakama yanatunzwa ipasavyo.

Katika eneo la utoaji wa haki mapema ipasavyo, Mhe. Mtulya ameelekeza kuendelea kuweka mkazo katika usikilizaji na utatuzi wa mashauri ya vipaumbele, hususan mashauri ya mirathi na ndoa, ili kupunguza muda wa wananchi kusubiri haki na kuongeza ufanisi katika utoaji wa huduma za Mahakama.

Viongozi wengine walioshiriki ziara hiyo ni Naibu Msajili wa Mahakama Kuu, Masjala Ndogo ya Mbeya, Mhe. Benard Mpepo, pamoja na Mtendaji wa Mahakama Kuu, Masjala Ndogo ya Mbeya, Bw. Festo Chonya.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya (katikati) akiwa kwenye picha ya pamoja na watumishi wa Mahakama ya Mwanzo Ndobo. Viongozi wengine alioambatana nao (wanne kushoto) ni Mtendaji wa Mahakama Kuu Masjala Ndogo ya Mbeya, Bw. Festo Chonya, Naibu Msajili Mahakama Kuu Masjala Ndogo ya Mbeya Mhe. Benard Mpepo (wanne kulia) na watatu kulia ni Hakimu Mkazi Mfawidhi Mahakama ya Wilaya Kyela Mhe. Rosta Mofuga.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya akiwa katika ukaguzi wa viwanja mbalimbali vya mahakama katika ziara hiyo.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya akiwa katika ukaguzi wa viwanja mbalimbali vya mahakama katika ziara hiyo.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya akiwa katika ukaguzi wa viwanja mbalimbali vya mahakama katika ziara hiyo.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya akiwa katika ukaguzi wa viwanja mbalimbali vya mahakama katika ziara hiyo.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya, akipokelewa Mahakama na watumishi wa Mahakama ya Wilaya Kyela.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya akiwa kwenye picha ya pamoja na viongozi wa Serikali ya Kijiji cha Ipande katika uwanja wa Mahakama uliotengwa na Serikali ya Kijiji cha Ipande, (wanne kulia) ni Afisa Mtendaji wa Kata ya Ipande Bw. Lugano Mwabulanga na (watano kushoto) ni Afisa Ugani Kata ya Ipande Bw. Hamadi Mussa Kassim.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya akiwa kwenye picha ya pamoja na viongozi wa Serikali ya Kijiji cha Lema katika eneo wa lililotengwa na Serikali ya Kijiji cha Lema, wanne kulia ni Mwenyekiti wa Kijiji cha Lema Bw. Charles Emily Mwakabulufu, wanne kushoto ni Afisa Mtendaji wa Kijiji cha Lema Bi. Joice Mkumbwa Kaminyoge.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya (katikati) akiongoza kikao cha pamoja na watumishi (hawapo pichani) wa Mahakama ya Wilaya Kyela, kulia ni Mtendaji wa Mahakama Kuu Masjala Ndogo ya Mbeya, Bw. Festo Chonya na Naibu Msajili Mahakama Kuu Masjala Ndogo ya Mbeya Mhe. Benard Mpepo.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya na Viongozi wengine alioambatana nao wakiwa kwenye picha ya Pamoja na watumishi wa Mahakama ya Wilaya Kyela.

Hakimu Mkazi Mfawidhi Mahakama ya Mwanzo Kyela Mjini Mhe, Nassir Alfred Msafiri akiwasilisha taarifa, kwa Viongozi hao waliowasili katika ziara hiyo.

Jaji Mfawidhi Mahakama Kuu Masjala Ndogo ya Mbeya Mhe. Fahamu Mtulya, akipokelewa Mahakama ya Mwanzo Ndobo.

(Habari Hii Imehaririwa na Innocent Kansha - Mahakama)