MAHAKAMA SPORTS YAANZA KWA KISHINDO SHIMIWI, 2026

•  Yagawa dozi ya bao mbilimbili kwa mechi za ufunguzi
• Jaji Mongella awahimiza kuendeleza moto huohuo

NA PAUL PASCAL, Mahakama-Moshi

Timu ya Mahamaka Sports Club inayoshiriki mashindano ya Shirikisho la Michezo ya Wizara na Idara za Serikali Tanzania (SHIMIWI) kwa mwaka, 2026 imefanikiwa kuyaanza vema mashindano hayo kwa ushindi mnono katika michezo yake iliyocheza tarehe 23 na 24 Septemba, 2026.

Michezo hiyo inaendelea kufanyika mkoani Kilimanjaro katika Viwanja vya Chuo Kikuu cha Ushirika Moshi na katika viwanja Viwanja vya Moshi Club.

Michezo iliyochezwa ni Mpira wa Miguu kwa Wanaume ambapo Timu ya Mahakama iliweza kuibuka na ushindi wa magoli Mawili dhidi ya goli moja la kufutia machozi kutoka Timu ya Mpira ya TAKUKURU huku Timu ya Kamba Wanaume wakiwaburuza ipasavyo kwa pointi mbili kwa nunge Timu ya Katibu Tawala Mkoa wa Lindi sambamba na kipigo hicho kwa Mkoa wa Lindi Timu ya Mahakama Kamba kwa wanawake waliwafurusha pasi na huruma kwa pointi mbili timu ya wanawake kutoka Ofisi ya Katibu Tawala Mkoa wa Kilimanjaro.

Hali kama hiyo imeendelea leo tarehe 24 Septemba, 2026 ambapo Timu ya Mahakama Mpira wa Pete kwa Wanawake imeshinda kwa jumla ya pointi 43 dhidi ya pointi 03 za Timu ya Taasisi ya Jiolojia na Utafiti wa Madini Tanzania (GST).

Baada ya kukamilika kwa ratiba hiyo ya mwanzo kwa michezo ya awali, Viongozi na Wachezaji wote wa Timu ya Mahakama Sports Club wamefika katika Ofisi ya Jaji Mfawidhi Mahakama Kuu Masjala Ndogo Moshi leo tarehe 24 Septemba, 2026 kwa ajili ya kuzungumza machache na kutiana moyo kwa michezo inayofuatia.

Akizungumza kwa niaba ya Viongozi na Wachezaji, Mwenyekiti wa Mahakama Sports Club, Mhe. Martin Mushi amemueleza Jaji Mfawidhi, Mhe. Dkt. Lillian Mongella kuwa, wao kama watumishi wa Mahakama ya Tanzania wamefika Kilimanjaro ili kuweza kuwakikilisha na kuitetea Mahakama kwa nguvu zote katika mashindano hayo.

“Mhe Jaji Mfawidhi Timu yetu ya Mahakama Sports Club imekuja na jumla ya Wachezaji 82 ambao watashiriki michezo ya Mpira wa Miguu, Mpira wa Pete, Kuvuta Kamba Wanaume na Wanawake, Riadha Wanaume na Wanawake, Kuendesha Baiskeli Wanaume na Wanawake pamoja na michezo yote ya ndani iliyoandaliwa na SHIMIWI kwa mwaka huu,” amesema Mhe. Mushi.

Mhe. Mushi aliongeza kwa kumueleza Jaji Mfawidhi kuwa, “tunapenda kukujulisha kuwa, mpaka sasa Timu yetu ya Mahakama Sports Clubs haijapoteza mchezo wowote na tunakuahidi na tunaahidi kwa Uongozi wa Mahakama ya Tanzania kuwa hatutowaangusha.”

Kwa upande wake Jaji Mfawidhi wa Mahakama Kuu ya Tanzania Masjala Ndogo Moshi, Mhe. Dkt Lillian Mongella aliwapongeza Viongozi na Wanamichezo wote na kuwaahidi kushirikiana nao katika mashindano hayo ili lengo la Timu ya Mahakama liweze kutimia.

“Nianze kwa kupongeza juhudi mlizoonesha kwa ushindi mnono tulioupata mpaka sasa niwasihi juhudi hizo ziendelee mpaka tutakapochukua makombe mengi kadri inavyowezekana, niwahakikishie ushirikiano katika kufikia malengo hayo ya timu yetu naamini tukiunganisha nguvu zetu tunakwenda kuipeperusha vema bendera yetu ya Mahakama,” alisema Jaji Mongella.

Mashindano ya SHIMIWI yanafanyikia Mkoani Kilimanjaro kuanzia tarehe 21 Septemba 2026 na yatafikia tamati tarehe 07 Oktoba, 2026 yakihusisha Timu za michezo mbalimbali zipatazo 64.

Viongozi wa Mahakama Sports wakisaini Kitabu cha wageni wakiongozwa na Mwenyekiti wa Timu hiyo, Mhe Martin Mushi (mwenye kitabu) mara baada ya kuwasiii katika Ofisi ya Jaji Mfawidhi wa Mahakama Kuu Masjala Ndogo Moshi, Mhe. Dkt. Lillian Mongella (aliyeketi mbele) leo tarehe 24 Septemba, 2026.

Jaji Mfawidhi Mahakama Kuu Kanda ya Moshi, Mhe. Dkt. Lillian Mongella (aliyesimama kushoto) akizungumza na Wachezaji wa Mahakama Sports Club leo tarehe 24 Septemba, 2026.

Jaji Mfawidhi Mahakama Kuu Kanda ya Moshi, Mhe. Dkt. Lillian Mongella (katikati) akiwa katika picha ya pamoja  Wachezaji wa Mchezo wa Kamba Wanawake kutoka Timu ya Mahakama Sports (MSC).

Jaji Mfawidhi Mahakama Kuu Kanda ya Moshi, Mhe. Dkt. Lillian Mongella akiwa katika picha ya pamoja  Wachezaji wa Mchezo wa Mpira wa Miguu Wanaume  kutoka Timu ya Mahakama Sports (MSC).

Jaji Mfawidhi Mahakama Kuu Kanda ya Moshi, Mhe. Dkt. Lillian Mongella (katikati) akiwa katika picha ya pamoja  Wachezaji wa Mchezo wa Mpira wa Pete (MSC).

Jaji Mfawidhi Mahakama Kuu Kanda ya Moshi, Mhe. Dkt. Lillian Mongella akiwa katika picha ya pamoja  Wachezaji wa Mchezo wa Riadha Wanawake MSC leo tarehe 24 Septemba, 2026.

(Habari hii imehaririwa na MARY GWERA, Mahakama-Dodoma)