MAHAKAMA YATANZANIA KINARA KWENYE MATUMIZI YA TEHAMA

Na FAUSTINE KAPAMA-Mahakama, Dodoma

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, amepongeza juhudi zinazoendelea kuchukuliwa na Wataalam wa Mahakama ya Tanzania katika kuboresha mifumo ya Teknolojia ya Habari na Mawasiliano (TEHAMA) kwenye usikilizaji wa mashauri nchini.

Mhe. Dkt. Siyani ametoa pongezi hizo leo tarehe 8 Oktoba, 2026, kwa Kurugenzi ya TEHAMA na ile ya Usimamizi wa Mashauri, baada ya kupokea wasilisho la maboresho yaliyofanyika kwenye mifumo miwili ambayo inaenda kuboresha usajili na usikilizaji wa mashauri katika Mahakama za Mwanzo.

“Nawapongeza sana kwa kuendelea kuifanya Mahakama yaTanzania kuwa kinara kwenye matumizi ya TEHAMA katika shughuli za utoaji huduma za kimahakama. Taasisi nyingi za Serikali zinaiga kutoka mahakamani,” amesema.

Jaji Kiongozi ameeleza kuwa kuna mambo makubwa ambayo hayazungumzwi yaliyofanywa na Mahakama ya Tanzania kwenye eneo hilo, ambayo yanaonekana siyo ya kawaida kwenye mamlaka nyingine nje ya nchi.

Amesisisitiza kuwa maboresho hayo yanayofanyika ni safari inayoendelea na wapo kwenye mwelekeo mzuri. Amesema kuwa hayo ni mapinduzi makubwa, ukilinganisha na nchi nyingine.

“Tunayo mambo tunayoyafanya makubwa sana ambayo sisi tukiyatazama tunayaona ya kawaida. Mtu atajua tofauti kama akitoka nje ya nchi na kutazama wengine wanavyofanya. Sisi tumepiga hatua kubwa sana. Huwezi kuona thamani ya hiki tunachofanya mpaka uwaone wengine wanavyo hangaika,” Mhe. Dkt. Siyani amesema.

Jaji Kiongozi amewahimiza Watalaam hao kubaini changamoto ambazo zinaweza kujitokeza na kuzifanyia kazi haraka na pia kuwaandaa watumiaji kabla ya mifumo hiyo kuanza kutumika.

Kwa upande wake, Msajili Mkuu wa Mahakama  ya Tanzania, Mhe. Eva Nkya, naye amewapongeza wataalam hao, kwani mifumo hiyo inaendelea kuimarika zaidi ukilinganisha na jinsi alivyouona hapo mwanzo.

Akasisitiza umuhimu wa kuendelea kufanya maboresho zaidi kwenye maeneo yatakayobainika kuwa na changamoto kwa watumiaji ili uweze kuleta manufaa yanayokusudiwa.

Mkurugenzi wa TEHAMA, Bw. Kalege Enock, pamoja na timu yake wamewasilisha maboresho ambayo yamefanyika kwenye Mfumo wa kusajili mashauri katika Mahakama za Mwanzo, ambao uaitwa Primary Court App.

Ameeleza kuwa Mfumo huo ni “mobile application” ambayo mashauri yanaingizwa kwenye mfumo kwa kutumia simu au kompyuta.

Maboresho mengine yaliyowasilishwa yanahusu Mfumo unaoratibu majalada ya mashauri yaliyomalizika, ambao unaitwa “Primary Court File Management System.” Kazi ya Mfumo huu ni kuchukua kumbukumbu zilizoingizwa kwenye Primary App.

Mifumo hii itawarahisishia wadau watakaokuwa wanataka kukata rufaa kutoka Mahakama ya Mwanzo, kwani hawatahitajika kuchukua nakala ngumu ya jalada. Pia uwekaji namba wa shauri pamoja na makusanyo ya maduhuli yatafanywa na mfumo wenyewe.

Viongozi wengine waliohudhuria uwasilishaji wa mifumo hiyo ni Msajili wa Mahakama Kuu ya Tanzania, Mhe. Chiganga Tengwa, Mtendaji wa Mahakama Kuu (Masjala), Bw. Leonard Magacha, Naibu Msajili Mwandamizi wa Mahakama Kuu, Mhe. Sundi Fimbo na Naibu Wasajili wengine.

Jaji Kiongozi wa Mahakama Kuu ya Tanzania, Mhe. Dkt. Mustapher Mohamed Siyani, akisisitiza jambo baada ya kupokea wasilisho la maboresho yaliyofanyika kwenye mifumo miwili ya TEHAMA ambayo inaenda kuboresha usajili na usikilizaji wa mashauri katika Mahakama za Mwanzo.

Msajili Mkuu wa Mahakama ya Tanzania, Mhe. Eva Nkya, akieleza jambo wakati wa uwasilishaji wa maboresho ya mifumo hiyo.

Mtendaji wa Mahakama Kuu (Masjala), Bw. Leonard Magacha, akizungumza kwenye uwasilishaji huo.

Mkurugenzi wa TEHAMA wa Mahakama ya Tanzania, Bw. Enock Kalege, akifafanua jambo wakati wa kuwasilisha maboresho ya mifumo hiyo.

Sehemu ya Viongozi na Watumishi wa Mahakama ya Tanzania (juu na picha mbili chini) wakifuatilia uwsilishaji wa maboresho ya mifumo hiyo.

Afisa TEHAMA, Bw. Johnson Mpepwa, akiwasilisha maboresho ya mifumo hiyo 

kama picha chini inavyoonekana.