TMJA SUMBAWANGA YAPELEKA MSAADA GEREZA LA KILIMO LA MOLLO

Na SHARIFU MOKIWA - Mahakama, Sumbawanga

Chama cha Mahakimu na Majaji Tanzania (TMJA), Tawi la Rukwa kimepeleka misaada kwa wafungwa katika Gereza la Kilimo la Mollo manispaa ya Sumbawanga ikiwa ni sehemu ya kufanya matendo ya huruma kwa kuwapatia mahitaji muhimu wakati wakiendelea kutumikia vifungo vyao.      

Akizungumza wakati wa zoezi hilo lililofanyika hivi karibuni, Mwenyekiti wa TMJA Tawi la Rukwa Mhe. Nickson Temu amesema kuwa, jamii inapaswa kuwakumbuka na kuwajali wafungwa ikiwa ni pamoja na kuwapelekea mahitaji muhimu kwa matumizi yao wakiwa gerezani akisisitiza kuwa wafungwa nao ni sehemu ya jamii.

“Tunapaswa kuwafariji kwa kuja na vitu mbalimbali, sisi sote ni binadamu, gereza halina mwenyewe, misaada iliyotolewa ni pamoja na sabuni, dawa za meno, mafuta ya kujipaka, miswaki na zawadi nyingine mbalimbali,” alisema Mhe. Temu.

Amesema kuwa kuwafikia wafungwa kwa kuwapatia mahitaji mbalimbali ni moja ya njia ya kuonesha upendo, ubinadamu na kuwafariji katika kipindi ambacho wapo gerezani. Zoezi hili ni sehemu ya shughuli za TMJA zinazolenga kushirikiana na jamii, kuonesha utu na kuwapa faraja wenye uhitaji.

Wanachama walioshiriki katika zoezi hilo ni Jaji Mfawidhi wa Mahakama Kuu, Masjala Ndogo Sumbawanga, Mhe. Frederick Kapela Manyanda, ambaye pia ni Mlezi wa TMJA Tawi la Rukwa, Naibu Msajili wa Mahakama Kuu Masjala Ndogo Sumbawanga, Mhe. Pamela Mazengo, Naibu Msajili Mahakama ya Hakimu Mkazi Sumbawanga Mhe. Kisasila Saguda, Hakimu Mkazi Mfawidhi wa Mahakama ya Wilaya Sumbawanga Mhe. Lilian Ndelwa, Katibu wa TMJA Tawi la Rukwa Mhe. Shija Mdadila na wanachama wengine wa TMJA.

Picha ya pamoja ikiwaonesha sehemu ya Wanachama wa TMJA tawi la Rukwa wakikabidhi Msaada kwa Mkuu wa Gereza la Mollo Sumbawanga SSP Sebastiani Mganga ikiwa ni sehemu ya kufanya matendo ya huruma kwa kuwapatia mahitaji muhimu wakati wakiendelea kutumikia vifungo vyao.

Mwenyekiti wa TMJA Tawi la Rukwa, Mhe. Nickson Temu (kushoto) akipongezwa kwa kushikwa mkono kama ishara ya shukrani kutoka kwa Afisa Mkaguzi wa Magereza.

Mwenyekiti wa TMJA Tawi la Rukwa, Mhe. Nickson Temu kizungumza na maafisa Magereza mara baada ya kuwasili Gereza la Mollo ikiwa ni pamoja na kuwapelekea wafungwa mahitaji muhimu kwa matumizi yao wakiwa gerezani.

(Habari Hii Imehaririwa na Innocent Kansha - Mahakama)