ZIMAMOTO SONGEA YATOA MAFUNZO YA USALAMA DHIDI YA MAJANGA YA MOTO

Na NOEL SYLIVESTER Mahakama Kuu Masjala Ndogo Songea,

Jeshi la Zimamoto na Uokoaji mkoani Songea jana tarehe 16 Oktoba, 2026 lilitoa mafunzo kwa watumishi wa Mahakama ili kuwaongezea uelewa na uwezo wa kukabiliana na majanga, kuokoa maisha na kulinda mali.

Mafunzo hayo ya usalama dhidi ya majanga ya moto na mbinu za uokoaji yalifanyika katika maeneo ya Mahakama Kuu Masjala Ndogo Songea, yakihusisha nadharia pamoja na vitendo.

Mkufunzi kutoka Jeshi hilo, Afande Roden Mlimbila, aliwapatia washiriki elimu kuhusu masuala ya usalama dhidi ya moto, hatua za kuchukua wakati wa kutokea janga la moto, pamoja na mbinu za kutumia vifaa vya kuzimia moto na taratibu za uokoaji.

Kupitia mafunzo ya vitendo, washiriki walipata fursa ya kujifunza kwa vitendo namna ya kutumia vifaa vya kuzimia moto na kuzingatia hatua muhimu za kiusalama wakati wa kukabiliana na majanga, ili kupunguza madhara yanayoweza kujitokeza katika mazingira ya kazi na maeneo mengine.

Akizungumza kwa niaba ya Mahakama Kuu Songea, Afisa Tawala, Bi. Khadija Ngayonga, alilishukuru Jeshi la Zimamoto na Uokoaji kwa kutoa mafunzo hayo, akieleza kuwa elimu hiyo ni muhimu katika kuimarisha usalama wa watumishi, wananchi wanaofika mahakamani pamoja na mali za Taasisi hiyo.

Mafunzo hayo ni sehemu ya juhudi za kuimarisha utayari wa watumishi wa Mahakama katika kukabiliana na dharura, kwa kuzingatia umuhimu wa kuchukua tahadhari, kufuata maelekezo ya wataalamu na kuhakikisha mazingira ya utoaji wa huduma za kimahakama yanakuwa salama.

Picha ya pamoja ya watumishi wa Mahakama Kuu Songea wakiongozwa na Afisa Tawala, Bi Khadija Ngayonga (wa pili kutoka kushoto aliyevaa ushungi) na  Wakufunzi wa Jeshi la Zimamoto na Uokoaji (waliovaa sare).

Mkufunzi kutoka Jeshi la Zimamoto na Uokoaji, Afande Roden Mlimbila wakati wa kutoa mafunzo.

Wakufunzi kutoka Jeshi la Zimamoto na Uokoaji wakifundisha kwa vitendo.

Mtumishi wa Mahakama akielekezwa na Mkufunzi namna ya kushika na  kutumia mtungi wa gesi ya kuzimia moto.

Mtumishi wa Mahakama akizima moto kwa kutumia mtungi maalumu wa kuzimia moto kwenye mafunzo ya vitendo.

Habari hii imhaririwa na FAUSTINE KAPAMA-Mahakama, Dodoma.