JAJI MKUU AWAALIKA MAJAJI TANZANIA, UINGEREZA KUJADILI ATHARI ZA MFUMO HAKI JINAI

Na Faustine Kapama – Mahakama, Dodoma

Jaji Mkuu wa Tanzania, Mhe. Prof. Ibrahim Hamis Juma leo tarehe 31 Januari, 2022 amefungua Kongamano la wadau wa sheria na utoaji haki nchini ambapo amewahimiza washiriki wote kujadili jinsi mfumo wa haki jinai uliopo unavyoathiri wahanga na washitakiwa wa makosa ya jinai.

Amesema kuwa Kongamano hilo linalofanyika katika ukumbi wa Takwimu jijini Dodoma ni fursa muafaka kwa Mahakama ya Jamhuri ya Muungano wa Tanzania na ile ya Uingereza kubadilishana uzoefu katika masuala mbalimbali, hususani maeneo ya mfumo wa haki jinai ambapo Mahakama zote mbili wanashiriki changamoto zinazofanana.

"Kwa mfano, hatua ya awali ya shauri la kijinai (committal proceeding) ni eneo ambalo sisi sote tunashiriki. Madhumuni ya msingi ya kuendesha mwenendo huu ni kuamua kama kuna ushahidi wa kutosha kumruhusu mtu anayetuhumiwa kutenda kosa apelekwe mbele ya Jaji kusikilizwa. Kwa nini mwenendo huu wenye nia njema ubadilike kuwa kichaka cha ucheleweshaji uliopitiliza nchini Tanzania?” amehoji Mhe. Prof. Juma.

Jaji Mkuu amesema kuwa wamekuwa wakikumbana na ucheleweshaji mkubwa wakati wa kuendesha hatua hizo za awali za mashauri ya jinai yanayosikilizwa na Mahakama Kuu, hivyo katika Kongamano hilo Mtaalamu kutoka Uingereza, Jaji Nic Madge ataweza kutoa uzoefu wake na namna nchi yake inavyofanya ili kuepuka ucheleweshaji huo.

Wawezeshaji wengine katika Kongamano hilo ni Jaji Mkuu Mstaafu wa Tanzania, Mhe. Mohamed Chande Othman, Majaji wengine wabobezi kutoka nchini Uingereza, Jaji Lain Bonomy na Nicholas Blake, Majaji wa Mahakama Kuu ya Tanzania, Mhe. Awamu Mbangwa, Mhe. Edwin Kakolaki na Mhe. Dkt. Zainab Mango pamoja na Kamishna Mstaafu wa Jeshi la Polisi Tanzania, Bw. Laurean Tibasana.

Jaji Mkuu ana imani kuwa washiriki wa Kongamano hilo watanufaika vya kutosha kutokana na mada mbalimbali zitakazowasilishwa na  Majaji na wadau wengine ambao wamebobea katika maeneno kadhaa yananyohusu haki jinai. Ametoa shukrani zake kwa Serikali ya Uingereza kwa kuendelea kutoa mchango wa kifedha kupitia mpango endelevu wa kupambana na rushwa (BSAAT).

"Kongamano la leo ni hatua muhimu katika kuimarisha ushirikiano ulioanza tangu mwaka 2017 katika Mkutano wa Chama cha Majaji na Mahakimu wa Jumuiya ya Madola (CMJA). Licha ya janga la UVIKO-19, tunatarajia kuendeleza shughuli mbalimbali, ikiwa pamoja na mafunzo, miaka mingi zaidi ijayo,” Jaji Mkuu amesema.

Awali, akizungumza katika Kongamano hilo, Mwenyekiti wa Baraza la Uongozi la Chuo cha Uongozi wa Mahakama Lushoto (IJA), Mhe. Dkt. Gerald Ndika, ambaye ni Jaji wa Mahakama ya Rufani amesema kuwa Programu hiyo iliyoandaliwa ni moja ya programu nyingi za maendeleo ya kitaaluma ambazo zimeundwa na Chuo kwa kushirikiana na washirika wake.

Mhe. Dkt. Ndika amesema kuwa Kongamano hilo ni ushuhuda wa wazi kwamba Chuo hicho kimekuwa kikijitahidi kutimiza majukumu yake chini ya Sheria ili kuboresha utoaji wa haki nchini kwa kutoa mafunzo yanayofaa kwa maafisa wa Mahakama na watumishi wengine.

Kongamano hilo limeandaliwa na Mahakama ya Tanzania kwa kushirikiana na Mahakama ya Uingereza na kuratibiwa na Taasisi ya Majaji Wastaafu nchini Uingereza iitwayo Slynn Foundation wakishirikiana na IJA kupitia ufadhili wa Programu ya Kitaifa ya Kuzijengea Uwezo Taasisi za Umma Tanzania zinazohusika na kuzuia na kupambana na Rushwa (BSAAT).

Kuandaliwa kwa Kongamano hilo ambalo litafanyika kwa siku moja ni sehemu ya jitihada za Mahakama ya Tanzania katika kuwajengea uwezo maafisa wa Mahakama na wadau wengine wa sheria ya haki nchini katika kutekeleza majukumu yao hususani utoaji wa haki jinai.

Mbali na maafisa wa Mahakama waliostaafu na walioko kazini pamoja na Mahakama ya Uingereza, washiriki wengine katika Kongamano hilo ni Naibu Katibu Mkuu wa Wizara ya Katiba na Sheria na maafisa kutoka ofisi ya Taifa ya Mashtaka, Ofisi ya Wakili Mkuu wa Serikjali, ofisi ya Mkurugenzi wa Upelelezi wa Makosa ya Jinai na mwakilishi wa Mkurugenzi wa Taasisi ya Kuzuia na Kupambana na Rushwa (TAKUKURU).

Kongamano hilo ambalo ni sehemu ya maadhimisho ya Wiki ya Sheria nchini ambayo kilele chake ni tarehe 2 Februari, 2022, pamoja na mambo mengine, limelenga kujadili uboreshaji mbalimbali uliofikiwa na Mahakama ya Tanzania katika utoaji wa haki jinai pamoja na kubadilishana uzoefu wa namna haki jinai kwa wahanga na washitakiwa unavyofanyika kati ya Mahakama ya Tanzania na Mahakama ya Uingereza.

Hii ni mara ya pili Kongamano hili linafanyika baada ya lile la kwanza ambalo lilifanyika katika Wiki ya Sheria mnamo mwezi Februari 2020 jijini Dar es Salaam.

Jaji Mkuu wa Tanzania, Mhe. Prof. Ibrahim Hamis Juma akihutubia Kongamano linalojumuisha Majaji wa Mahakama ya Tanzania na Mahakama ya Uingereza kujadili, pamoja na mambo mengine, athari za mfumo uliopo wa haki jinai. Kongamano hilo limefanyika leo tarehe 31 Januari, 2022 katika ukumbi wa Takwimu jijini Dodoma.

Balozi wa Uingereza nchini Tanzania, Bw. David Concar akisisitiza jambo alipokuwa akiongea kwenye Kongamano hilo.

Mkuu wa Chuo cha Uongozi wa Mahakama Lushoto (IJA), Mhe. Dkt. Paul Kihwelo, ambaye ni Jaji wa Mahakama ya Rufani akitoa neno la ukaribisho katika Kongamano linalowaleta pamoja Majaji kutoka Mahakama ya Tanzania na Uingereza.

Mwenyekiti wa Baraza la Uongozi la Chuo cha Uongozi wa Mahakama Lushoto (IJA), Mhe. Dkt. Gerald Ndika akitoa neno la utangulizi katika Kongamano.

Meza Kuu, ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Majaji wa Mahakama ya Rufani (juu) na Mahakama Kuu (chini) waliohudhuria Kongamano hilo.

Meza Kuu, ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na Majaji Wastaafu wa Mahakama ya Rufani na Mahakama Kuu waliohudhuria kwenye Kongamano.

Meza Kuu, ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na sehemu ya Majaji wa Mahakama Mahakama Kuu ( juu ) na Mahakama ya Rufani (chini) waliohudhuria Kongamano hilo.

Meza Kuu, ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na wawezeshaji kutoka Uingereza.

Meza Kuu, ikiongozwa na Jaji Mkuu wa Tanzania, Mhe. Prof. Ibrahim Hamis Juma (katikati waliokaa) ikiwa katika picha ya pamoja na Maafisa Wandamizi wa Mahakama ya Tanzania waliohudhuria Kongamano hilo. Kutoka kushoto ni Msajili Mkuu, Mhe. Wilbert Martin Chuma, Mtendaji Mkuu, Prof. Elisante Ole Gabriel, Msajili wa Mahakama ya Rufani, Mhe. Kevin Mhina na Msajili wa Mahakama Kuu ya Tanzania, Mhe. Shamillah Sarwatt.

Sehemu ya Majaji wa Mahakama ya Rufani (juu na chini) waliohudhuria Kongamano hilo wakifuatilia mada.

Sehemu ya Majaji wa Mahakama Kuu ya Tanzania (juu na chini) waliohudhuria Kongamano hilo wakifuatilia mada mojawapo iliyokuwa inawasilishwa na wawezeshaji

Maafisa Wandamizi wa Mahakama ya Tanzania, ambao ni Msajili Mkuu, Mhe. Wilbert Martin Chuma (kushoto) na Mtendaji Mkuu, Prof. Elisante Ole Gabriel (wa pili kutoka  kushoto) wakiwa na Majaji Wastaafu wa Mahakama ya Rufani, Mhe. Sauda Msafiri na Mhe. Januari Msoffe (kulia) wakifuatilia moja ya mada zilizokuwa zinawasilishwa kwenye Kongamano hilo.

                                 (Picha na Faustine Kapama-Mahakama)

DODOMA YAWAITA WATANZANIA SIKU YA SHERIA FEBRUARI MBILI

Na Innocent Kansha, Mahakama - Dodoma.

Serikali ya Mkoa wa Dodoma imewaalika wananchi wote kuhudhuria kwa wingi kwenye maadhimisho ya Siku ya Sheria yatakayo kufanyika siku ya Jumatano tarehe 2 Februari, 2022, ambapo mgeni rasmi anatarajiwa kuwa Rais wa Jamhuri ya Muungano wa Tanzania, Mhe. Samia Suluhu Hassan.

Akihitimisha maadhimisho wa Wiki ya Sheria yaliyoambatana na maonyesho ya shughuli mbalimbali zinazofanywa na Mahakama ya Tanzania na wadau wake wote katika mnyororo wa utoaji haki nchini katika viwanja vya Nyerere Square, Mkuu wa Wilaya ya Dodoma, Mhe. Jabir Shekimweri amewaomba wananchi kujiandaa kikamilifu kwa ajili ya siku hiyo muhimu ambayo huashiria kuanza rasmi kwa shughuli za kimahakama kote nchini.

“Niwahimize wananchi wote tujitokeze kwa wingi siku ya uzinduzi wa shughuli za Mahakama tarehe (2) Februari, 2022 siku ya (Jumatano). Tujiandae, tutakuwa na kiongozi wetu, Mhe. Rais Samia Suluhu Hassan, kama mgeni rasmi. Tuhamasishane kila mmoja na kila mdau kwenye tasnia hii ya sheria kujitokeza kwa wingi siku hiyo,” amesema Mhe. Shekimweri aliyemwakilisha Mkuu wa Mkoa wa Dodoma, Mhe. Antony Mtaka kwenye hafla hiyo fupi.

Ameupongeza Mhimili wa Mahakama chini ya Jaji Mkuu wa Tanzania, Prof. Ibrahim Hamis Juma kwa kuandaa maadhimisho hayo kwa mafanikio makubwa ambayo yalishirikisha madanda 46 yanayojumuisha saba ya Mahakama na mengine 39 yaliyobaki ya wadau wengine mbalimbali.

“Tumefuatilia tangu mwanzo kwenye uzinduzi uliofanywa na Rais wa Zanzibar na Mwenyekiti wa Baraza la Mapinduzi, Mhe, Dkt Hussein Mwinyi na pia kwa maadamano ambayo yalifana sana. Naamini maudhui kwenye hotuba nzuri aliyoitoa mgeni rasmi na Jaji Mkuu mtayabeba, kuyaenzi na kuyafanyia kazi,” amesema.

Amewapongeza washiriki wote walioandaa maelezo, vifurushi na majarida mbalimbali kwa ajili ya wananchi ili kuweza kupata rejea ya masuala kadhaa ambayo wanayafanyia kazi na zaidi ya hapo kupata muda wa kuongea na wadau kwenye mabanda yao na kuwaelimisha masuala mbalimbali na baadhi yao kutatua changamoto za wananchi.

“Mmefanya kazi kubwa na kutukuka ya kupigiwa mfano kwenye Makao Makuu ya nchi, hivyo tunategemea kuona jamii yenye ustaarabu na ustaarabu unapatikana watu wakifuata sheria, kanuni na taratibu. Kazi hiyo mmeifanya vizuri katika wiki hii ya maonesho,” Mhe. Shekimweri.

Halikadhalika, Mkuu wa Wilaya huyo amewapongeza wananchi waliojitokeza kwa wingi kwenye maonesho hayo, hivyo akawaomba kuzigantia yale yote waliyojifunza kwa sababu kupata maarifa ni kitu kingine na kuyatumia katika usahihi wake ni kitu kingine. Anaamini wananchi wakifanya hivyo migogoro mingi na malalamiko mengi yataondoka na kufa kifo cha Mende.

Mkuu wa Wilaya ya Dodoma, Mhe. Jabir Shekimweri amewaomba wananchi kujiandaa kikamilifu kwa ajili ya siku hiyo muhimu ambayo huashiria kuanza rasmi kwa shughuli za kimahakama kote nchini, alipokuwa akifunga maonyesho ya utoaji Elimu ya Wiki ya Sheria nchini, kitaifa yaliyofanyika katika Viwanja vya Nyerere Square Jijini Dodoma tarehe 29 Januari 2022.

Jaji Mstaafu wa Mahakama Kuu ya Tanzania na Mwenyekiti wa Chama cha Majiji na Mahakimu Wanawake Tanzania (TAWJA) Mhe. Joaquine De Mello akitoa neno wakati wa kufunga maonyesho ya utoaji Elimu ya Wiki ya Sheria nchini, kitaifa iliyofanyika katika Viwanja vya Nyerere Square Jijini Dodoma

Msajili wa Mahakama ya Rufani na Katibu wa Kamati ya Maandalizi ya Wiki ya Sheria nchini, Mhe. Charles Magesa akimkaribisha Mgeni rasmi wakati wa kufunga maonyesho ya utoaji Elimu ya Wiki ya Sheria nchini, kitaifa yaliyofanyika katika Viwanja vya Nyerere Square Jijini Dodoma.

Sehemu ya Viongozi waandamizi wa Mahakama, Waonyeshaji na Wananchi wakimsikiliza mgeni rasmi (hayupo pichani ) wakati wa kufunga maonyesho ya utoaji Elimu ya Wiki ya Sheria nchini, kitaifa yaliyofanyika katika Viwanja vya Nyerere Square Jijini Dodoma.

(Picha na Innocent Kansha - Mahakama.)

WATUMISHI WA MAHAKAMA YA TANZANIA WAFURAHIA UJENZI WA MAKAO MAKUU

 Na Mary Gwera, Mahakama-Dodoma

Jumla ya Watumishi 120 wa Mahakama ya Tanzania kutoka Makao Makuu Dar es Salaam wamefanya ziara ya kutembelea na kujionea Mradi wa Ujenzi wa Makao Makuu ya Mahakama unaojengwa katika eneo la Tambuka Reli jijini Dodoma ambapo wameonyesha kufurahishwa na ujenzi wa majengo hayo yanayotarajiwa kukamilika mwisho wa mwaka huu.

Akizungumza na Watumishi hao waliotembelea Mradi huo tarehe 29 Januari, 2022, Mtendaji wa Mahakama ya Rufani, Bw. Solanus Nyimbi aliwaambia Watumishi hao kujiandaa kisaikolojia kwakuwa wapo mbioni kuhamia Dodoma.

“Ifikapo mwezi wa 12 mwaka huu ninyi wote mtakuwa mmehamia katika jengo hili, kwahiyo ni vizuri mkajiandaa kisaikolojia na kufanya maandalizi mengine ya msingi, kwa mfano najua wengine wana Watoto ambao wanaenda shule, wengine wana wenza wa kuwaweka sawa kisaikolojia, lakini la msingi la Mtendaji Mkuu kuwapa fursa kuja kuona ni ili mpate picha ya sehemu mtakayokuja kufanya kazi,” alisema Bw. Nyimbi.

Aliongeza kuwa Watumishi wote wa Makao Makuu, Mahakama ya Rufani, Mahakama Kuu Masjala kuu wote wanatakiwa kuhamia katika jengo la Makao Makuu ya Mahakama-Dodoma ifikapo mwezi Desemba mwaka huu.

Akizungumza kwa niaba ya Watumishi, Afisa Utumishi wa Mahakama, Bw. Nkrumah Katagira ameshukuru Mtendaji Mkuu wa Mahakama ya Tanzania, Prof. Elisante Ole kwa kuwapa fursa ya kutembelea jengo hilo la Makao Makuu na kuongeza kuwa wamefurahi sana kupewa nafasi hiyo.

“Kwa niaba ya Watumishi wenzangu, nimshukuru sana Mtendaji wa Mahakama ya Rufani kwa niaba ya Mtendaji Mkuu, Watumishi kwakweli wamefurahi sana kwa hii safari, kwa sababu ni sehemu ya kujiandaa kisaikolojia kujua wapi tutakuja kukaa na hii imepunguza wasiwasi kwetu baada ya kuona sehemu ambayo tutakuja kufanyia kazi,” alisema Bw. Katagira.

Pamoja na kutembelea Mradi wa ujenzi wa Makao Makuu, Watumishi hao pia walitembelea Kituo Jumuishi cha Utoaji Haki-Dodoma (IJC) na kutembelea Maonesho ya Wiki ya Sheria katika Viwanja vya Nyerere ‘square’ Dodoma.

Safari hii imejumuisha Watumishi wa Kada za Wasaidizi wa Kumbukumbu, Wasaidizi wa Ofisi, Wasaidizi wa Maktaba, Makatibu Mahsusi, Walinzi, Madereva wakiongozwa na Maafisa Utumishi.

Sehemu ya Watumishi 120 wa Mahakama ya Tanzania kutoka Makao Makuu Dar es Salaam wakiwa katika eneo la Mradi wa ujenzi wa majengo ya Makao Makuu ya Mahakama ya Tanzania wakati walipofanya ziara leo tarejhe 29 Januari, 2022 eneo la Tambuka Reli jijini Dodoma.

Watumishi wakionyesha majengo yanayoendelea kujengwa katika mradi huo.

Mtendaji wa Mahakama ya Rufani, Bw. Solanus Nyimbi aliyesimama mstari wa mbele kulia mwenye shati la 'Light blue'  akiwa katika picha ya pamoja na Watumishi wa Kada za Wasaidizi wa Kumbukumbu, Wasaidizi wa Ofisi, Wasaidizi wa Maktaba, Makatibu Mahsusi, Walinzi, Madereva wakiongozwa na Maafisa Utumishi waliotembelea Mradi wa Ujenzi wa Makao Makuu ya Mahakama ya Tanzania mkoani Dodoma.

Madereva na Walinzi wa Mahakama wakiwa katika picha ya pamoja.

Makatibu Mahsusi wakiwa katika picha ya pamoja eneo la Mradi wa ujenzi wa Makao Makuu ya Mahakama walipotembelea leo tar 29.01.2022.

Wasaidizi wa Ofisi wakiwa katika picha ya pamoja eneo la Mradi wa ujenzi wa Majengo ya Makao Makuu ya Mahakama ya Tanzania walipotembelea leo tarehe 29 Januari, 2022.

Wasaidizi wa Kumbukumbu wakiwa katika picha ya pamoja.

Watumishi wakiendelea kuonyeshwa majengo ya Makao Makuu ya Mahakama yanayoendelea kujengwa.

Mtendaji wa Kituo Jumuishi cha Utoaji Haki-Dodoma, Bi. Mary Itala (kulia) akitoa maelezo kwa Watumishi hao walipotembelea kituoa hicho.

Sehemu ya Watumishi wa Mahakama kutoka Dar es Salaam wakipata maelezo kuhusu uboreshaji wa huduma mbalimbali za Mahakama zenye lengo la kurahisisha huduma ya utoaji haki kwa wananchi. Watumishi hapo walipata pia fursa ya kutembelea Maonesho ya Wiki ya Sheria katika Viwanja vya Nyerere 'Square' Dodoma.

 

(Picha na Mary Gwera, Mahakama)

JAJI MRUMA : ONGOZENI UBUNIFU ILI MAONESHO YAVUTIE WATU WENGI

 

Na Magreth Kinabo

Jaji Mfawidhi wa Mahakama Kuu Kanda ya Dar es Salaam, Mhe. Amir Mruma amewataka watumishi wa kanda hiyo kubuni mbinu zitakazoweza kuwavutia watu wengi kupata elimu ya sheria katika Maadhimisho ya Wiki ya Sheria.

Kauli hiyo imetolewa leo tarehe 29, Januari, wakati Jaji huyo wakati akifunga maadhimisho hayo ya kanda hiyo, yaliyoanza kuanzia tarehe 23 Januari kwenye viwanja vya Mahakama ya Hakimu Mkazi ya Kisutu iliyopo Jijini Dar es Salaam.

‘‘Maadhimisho haya ni ya kitaaluma, hivyo inabidi tuongeze nguvu za ubunifu ili yaweze kwavutia watu wengi, kama iliyo katika maonesho ya Biashara ya Kimataifa maarufu kwa jina la sabasaba, hivyo tubuni namna ya wadau wetu kuweza  kupata elimu ya sheria,’’ alisema Jaji Mruma.

Aliongeza kwamba ili kuongeza ushiriki wa wadau ipo haja ya kutoa cheti cha ushiriki.

Hata hivyo aliwashukuru wadau na watumishi wa Mahakama wa kanda hiyo kwa kushiriki katika maonesho hayo.

Kwa upande wake Naibu Msajili wa Mahakama Kuu Kanda ya Dares Salaam, Mhe. Victoria Nongwa alisema kupitia maadhimisho hayo, wameweza kufanya matembezi kutoka Mahakama Kuu ya Tanzania hadi kwenye viwanja vya Mahakama ya Hakimu Mkazi Kisutu, kutoa elimu ya sheria kwenye maeneo mbalimbali, zikiwemo shule za sekondari zipatazo 18 na wodi za wakina mama katika hospitali tano na kutoa msaada kwa watoto yatima.

GHARAMA VIPIMO VINA SABA LAKI MOJA: MKEMIA MKUU WA SERIKALI

Na Faustine Kapama – Mahakama, Dodoma

Mkemia Mkuu wa Serikali, Dkt. Fidelice Mafumiko amesema gharama ya uchunguzi kwa kipimo cha vina saba anachochukuliwa mtu mmoja ni shillingi 100,000 za Kitanzania na siyo vinginevyo.

Dkt. Mafumiko ametoa ufafanuzi huo leo tarehe 29 Januari, 2022 alipotembelea mabanda ya maonesho yaliyoandaliwa na Mahakama ya Tanzania yanayofanyika katika viwanja vya Nyerere Square jijini Dodoma kama sehemu ya maadhimisho ya Wiki ya Sheria.

“Mara nyingi nimekuwa nikisikia gharama za Mkemia Mkuu wa Serikali za kuchukua hivi vipimo ni shillingi millioni mbili, shillingi 500,000, shillingi 700,000, hiyo ni taarifa ambayo siyo sahihi,” amesema alipokuwa anaongea na Waandishi wa Habari kwenye viwanja hivyo.

Amebainisha kuwa Serikali ya Jamhuri ya Muungano wa Tanzania imebeba sehemu kubwa ya gharama za uchunguzi wa vina saba, hivyo kuwezesha  gharama ya uchunguzi kwa kipimo anachochukuliwa mtu mmoja kwa sasa kuwa shilling 100,000 za Kitanzania pekee.

“Kwa mfano, unataka kujua mahusiano ya baba, mama na mtoto. Pale tutachukua sampuli kutoka kwa watu watatu na gharama yake ni shilling 300,000 za Kitanzania, lakini kukiwa kuna watoto wanne, watano, gharama yake itaongezeka hivyo hivyo. Lakini, kwa kila tunayemchukua sampuli gharama yake ni shilling 100,000 za Kitanzania,” Dkt Mafumiko amesema.

Kwa mujibu wa Mkemia Mkuu wa Serikali, kuna wakati fulani waliwahi kusema kuwa kwa kuangalia vitenganishi vyake, gharama y kipimo ingeweza kuwa kati ya 700,000 hadi 800,000 kama Serikali isingebeba sehemu ya gharama hizo, lakini mpaka sasa bado ofisi yake inatoza gharama ile ile ya shillingi 100,000 za Kitanzania kwa kila wanayemchukua sampuli.

Dkt Mafumiko pia ametoa wito kwa wananchi wanapotaka kufanya kipimo kwa Mkemia Mkuu wa Serikali kinachohusiana na masuala ya kijinai kutumia mamlaka zilizopo badala ya wao wenyewe kama wateja kwenda moja kwa moja katika ofisi hiyo.

 “Kuna mamlaka zilizowekwa kwa ajili ya kumwomba Mkemia Mkuu wa Serikali vipimo. Kama ni suala la kijamii kuna maafisa ustawi wa jamii, kuna Mawakili walioandikishwa, kama ni suala lipo mahakamani kuna Mahakama na wenzetu wa Jeshi la Polisi, kama ni suala la kimatibabu kuna Madaktari, kama suala la majanga, kuna Wakuu wa Wilaya,” amesema.

Baadhi ya mabanda aliyotemebelea ni RITA, Kitengo cha Uboreshaji cha Mahakama ya Tanzania, Magereza, Polisi, Ofisi ya Taifa ya Mashtaka, Ofisi ya Wakili Mkuu, Ofisi ya Mwanasheria Mkuu wa Serikali, Taasisi ya Kuzuia na Kupambana na Rushwa (TAKUKURU) na Ofisi yake ya Mkemia Mkuu wa Serikali.

Dkt Mafumiko amempongeza Jaji Mkuu wa Tanzania, Prof. Ibrahim Hamis Juma kwa kuandaa maonesho yanayotoa fursa kwa watoa huduma na elimu mbalimbali ya kisheria kwa wananchi. Amewashukuru pia waandaaji wa maonesho hayo kwa kuipa nafasi ofisi yake kama moja ya taasisi ambazo ni wadau wakubwa wa Mahakama ya kushiriki kwenye Wiki ya Sheria.

“Nawapongeza wote ambao wanashiriki kwenye kuonesha nini taasisi zao zinafanya na uhusiano wao kwa Mahakama. Hii ni mara yangu ya tatu, lakini naona maandalizi ya mwaka huu yamekuwa mazuri sana. Kwa hiyo nawapongeza wote,” amesema.

Mkemia Mkuu wa Serikali ameeleza majukumu makubwa ya taasisi yake ni kuchunguza sampuli zinazotokana na vilelelezo mbalimbali vya masuala ya kijinai, masuala ya kijamii, kimazingira na masuala mengineyo.

Amesema mamlaka ya ofisi yake pia yamejikita kutekeleza jukumu la usimamiaji na uthibiti wa shughuli zote za kemikali zisizo za kitiba ambazo zinaingia nchini, zile zinazokwenda nje ya nchi na zile zinazosafirishwa ndani na nje ya nchi, lengo ni kulinda afya za binadamu na mazingira.

Mkemia Mkuu wa Serikali, Dkt. Fidelice Mafumiko akiupongeza uongozi wa Mahakama kwa jitihada kubwa za kuboresha mifumo ya TEHAMA inayorahisisha utoaji wa haki kwa wananchi kwa wakati, kulia ni Afisa TEHAMA wa Mahakama ya Tanzania, Bw.  Othman Kanyegezi, akimsikiliza alipotembelea banda lao leo tarehe 29 Januari, 2022 kwenye maadhimisho ya Wiki ya Sheria nchini katika Viwanja vya Nyerere Square Jijini Dodoma.

Mkemia Mkuu wa Serikali, Dkt. Fidelice Mafumiko akifafanua jambo alipokuwa anaongea na Waandishi wa Habari mara baada ya kutembelea mabanda.

Naibu Msajili wa Mahakama ya Rufani, Mhe. Charles Magesa akimkabidhi  Mkemia Mkuu wa Serikali, Dkt. Fidelice Mafumiko nakala ya Kitabu cha Mpango Mkakati wa Mahakama wa 2021/22 hadi 2024/25 ikiwa ni dira ya Mahakama ya miaka tano ijayo ya utekelezaji wa shughuli zake.

Mkemia Mkuu wa Serikali, Dkt. Fidelice Mafumiko akieleza jambo alipotembelea banda la Taasisi ya Kuzuia na Kupambana na Rushwa (TAKUKURU).

Mkemia Mkuu wa Serikali, Dkt. Fidelice Mafumiko akielezea umuhimu wa Jeshi la Polisi katika kufanikisha shughuli za kiuchunguzi katika Mamlaka ya Maabala ya Mkemia Mkuu wa Serikali wakati alipokuwa akikagua shughuli mbalimbali zinazoendelea katika maadhimisho ya Wiki ya Sheria.

Mmoja wa maafisa kutoka Ofisi ya Wakili Mkuu wa Serikali akimwelezea Mkemia Mkuu wa Serikali, Dkt. Fidelice Mafumiko shughuli mbalimbali wanazofanya kama mdau wa Mahakama.

Mkemia Mkuu wa Serikali, Dkt. Fidelice Mafumiko akielezea jambo wakati alipotembelea banda la Jeshi Uhamiaji Tanzania na kupewa maelezo mafupi ya majukumu mbalimbali yanayotekelezwa na Jeshi hilo ikiwa ni sehemu ya maadhimisho hayo.

Mkemia Mkuu wa Serikali, Dkt. Fidelice Mafumiko akipokea maelezo ya utendaji kazi kutoka kwa mmoja wa maafisa wa Ofisi ya Mwanasheria Mkuu wa Serikali.

Maaskari Magereza wakimuonyesha Mkemia Mkuu wa Serikali, Dkt. Fidelice Mafumiko baadhi ya bidhaa zinazozalishwa na Jeshi hilo kupitia ujuzi wa wafungwa alipotembelea mabanda ya Maadhimisho hayo.

(Picha Innocent Kansha - Mahakama)

JAJI KIONGOZI AAGIZA WATUMISHI KUONGEZA KASI UTOAJI HAKI

Na Tiganya Vicent – Mahakama, Dodoma

Jaji Kiongozi wa Mahakama Kuu ya Tanzania, Mhe. Mustapher Siyani amewataka Watumishi wa Mahakama nchini kuongeza kasi katika kuwatumikia wananchi ili waweze kupata haki zao kwa wakati unaostahili.

Alisema ni vema uboreshwaji wa miundombinu ya Mahakama hapa nchini ikaendana na huduma bora zinazotolewa kwa wananchi.

Mhe. Siyani ametoa kauli hiyo leo tarehe 28 Januari, 2022 wakati wa kuzindua jengo linalojumuisha Mahakama ya Wilaya na Mwanzo Bahi ambalo ujenzi wake umegharimu milioni 797.6 za Kitanzania.

Alisema uzinduzi wa Mahakama ya Wilaya ya Bahi na nyingine hapa nchini ni sehemu ya mpango wa maboresho ya miundombinu uliojikita katika kuboresha utoaji haki na kusogeza huduma karibu zaidi na wananchi.

Mhe. Siyani aliishukuru Serikali inayoongozwa na Rais wa Jamhuri ya Muungano wa Tanzania, Mhe. Samia Suluhu Hassan kwa kuendelea kutenga fedha kwa ajili ya maendeleo ya ujenzi wa miundombinu ya Mahakama.

Aidha, Jaji Kiongozi aliwaeleza watumishi wa Mahakama hiyo kuwa wamepata jengo nzuri ambalo ni kama vazi jipya kwao. Hata hivyo aliwataka kutambua kuwa wananchi wanatarajia uzuri wa jengo hilo uendane na ubora wa huduma zitakazotolewa.

“Jengo hili na mengine yaliyojengwa na yanayoendelea kujengwa kote nchini yanajengwa kwa kodi za wananchi. Kwa hiyo tambueni kuwa wananchi ndiyo wenye mamlaka na watawapima kwa ubora wa kazi zenu na kama nyinyi mnavyowahukumu wenye makosa mbele yenu,”alisema.

Kwa upande mwingine, Mhe. Siyani aliwakumbusha wananchi wanaotumia huduma za Mahakama kujua kuwa vipo vyombo maalum vilivyowekwa kisheria kwa ajili ya kuwasilisha malalamiko dhidi ya watumishi wa Mahakama na huduma wazitoazo.

Alitoa mfano kuwa malalamiko ya kimaadili dhidi ya Mahakimu wa Mahakama za Mwanzo na Wilaya yanaweza kuwasilishwa kwenye kamati za maadili za Maafisa wa Mahakama ngazi ya Wilaya na Mkoa ambazo wenyeviti wake ni Wakuu wa Wilaya na Mikoa kote nchini.

“Watumieni viongozi hawa ambao mko karibu nao kuwasilisha kero za kimaadili. Kwa malalamiko dhidi ya huduma za Mahakama, kuna madawati maalumu ya malalamiko katika kila Mahakama ya Wilaya, Mkoa na Mahakama Kuu,”alisema.

Jaji Mfawidhi wa Mahakama Kuu, Kanda ya Dodoma, Mhe. Gerson Mdemu alisema kukamilika kwa jengo hilo litawezesha kutoa huduma kwa wakazi wapatao 271,000 kwa maoteo ya sensa ya mwaka 2019.

Naye Mtendaji Mkuu wa Mahakama ya Tanzania, Prof Elisante Ole Gabriel alisema uongozi wa Mahakama utaendelea kuhakikisha jengo hilo linatunzwa ili liweze kuwahudumia wananchi  kwa kadri ya malengo na fedha inayotolewa na Serikali.

Msajili Mkuu wa Mahakama ya Tanzania, Mhe. Wilbert Chuma aliwataka wadau wa Mahakama kutoa ushirikiano ili kesi ziweze kupatiwa ufumbuzi kwa haraka na haki iweze kupatikana kwa mhusika kwa wakati.

Aliuomba Uongozi wa Wilaya ya Bahi kusaidia upatikanaji wa maeneo kwa ajili ya ujenzi wa makazi ya watumishi wa Mahakama ya Wilaya ya Bahi.

Awali, Mtendaji wa Mahakama Kuu, Kanda ya Dodoma, Bi Maria Itala alisema jumla ya shilingi milioni 797.6 za Kitanzania zimetumika katika ujenzi wa mradi huo wa jengo la Mahakama ya Wilaya ya Bahi.

Alisema ujenzi wa Mahakama hiyo umelenga kusogeza huduma za kimahakama karibuni na wananchi ikiwa sehemu ya mpango mkakati wa uboreshaji wa miundombinu ya Mahakama nchini Tanzania.

Jaji Kiongozi wa Mahakama Kuu ya Tanzania, Mhe. Mustapher Siyani (mwenye tai nyekundu) akikata utepe kuashiria uzinduzi wa jengo linalojumuisha Mahakama ya Wilaya na Mwanzo Bahi mkoani Dodoma katika hafla iliyofanyika leo tarehe 28 Januari, 2022.

Jaji Kiongozi wa Mahakama ya Kuu ya Tanzania, Mhe. Mustapher Siyani (kushoto) akifunua pazia kuashiria uzinduzi wa jengo linalojumuisha Mahakama ya Wilaya na Mwanzo Bahi mkoani Dodoma. Kulia ni Mkuu wa Wilaya ya Bahi, Bi. Mwanahamis Mkunda.

Jaji Kiongozi wa Mahakama Kuu ya Tanzania, Mhe. Mustapher Siyani akiongea na wananchi waliohudhuria uzinduzi wa jengo la Mahakama ya Wilaya na Mwanzo Bahi mkoani Dodoma.

Jaji Mfawidhi wa Mahakama Kuu ya Tanzania, Kanda ya Dodoma, Mhe. Gerson Mdeme akitoa neno la utangulizi kumkaribisha mgeni rasmi.

Mkuu wa Wilaya ya Bahi, Bi. Mwanahamis Mkunda akitoa salamu za Serikali katika hafla hiyo.

Msajili Mkuu wa Mahakama ya Tanzania, Mhe. Wilbert Martin Chuma akieleza jambo katika hafla ya uzinduzi wa jengo linalojumuisha Mahakama ya Wilaya na Mwanzo Bahi.

Mtendaji Mkuu wa Mahakama ya Tanzania, Prof. Elisante Ole Gabriel akitoa nasaha kwa watumishi wa Mahakama ya Wilaya na Mwanzo Bahi katika hafla hiyo.

Mtendaji wa Mahakama Kuu, Kanda ya Dodoma, Bi. Maria Itala akiwasilisha taarifa ya ujenzi wa jengo hilo.

Sehemu ya maafisa wa Mahakama ya Tanzania waliohudhuria uzinduzi huo.

Sehemu ya watumishi wa Mahakama na wananchi waliohuduria uzinduzi wa jengo hilo.

Meza Kuu ikiwa katika picha ya pamoja na baadhi ya viongozi waandamizi wa Mahakama ya Tanzania waliohuduria uzinduzi huo.

Meza Kuu ikiwa katika picha ya pamoja na baadhi ya watumishi wa Mahakama Dodoma waliohuduria uzinduzi huo.

                     (Picha na Innocent Kansha-Mahakama)