TANZIA; MAHAKAMA YA TANZANIA INASIKITIKA KUTANGAZA KIFO CHA MTUMISHI WAKE

Marehemu Selemani Hussein Ngawanae enzi za uhai wake.

Mahakama Kuu ya Tanzania Kanda ya Tabora, inasikitika kutangaza kifo cha Mtumishi wake Bw. Selemani Hussein Ngawanae (Pichani) aliyekuwa Dereva wa Mahakama Kuu ya Tanzania Kanda ya Tabora. 

Kwa mujibu wa taarifa zilizotolewa na Mahakama Kuu ya Tanzania Kanda ya Tabora zinaeleza kuwa Marehemu Ngawanae amekutwa na umauti alfajiri ya kuamkia Julai 28,2021 katika Hospitali ya Rufaa Kitete Manispaa ya Tabora.

Taratibu zingine za mazishi zitatolewa hapo baadae, baada ya kukamilika kwa mipango ya kifamilia.

Mahakama ya Tanzania inaungana na ndugu, jamaa na marafiki katika kipindi hiki kigumu cha kuondokewa na mpendwa wetu.

BWANA AMETOA NA BWANA AMETWAA, JINA LAKE LIHIMIDIWE, AMEN.

 

MSUMBIJI YAAHIDI KUTOA USHIRIKIANO KWA MAHAKAMA YA TANZANIA

Na Mary Gwera, Mahakama

Balozi wa Msumbiji nchini Tanzania, Bw. Ricardo Mtumbuida ameahidi kutoa ushirikiano kwa Mahakama ya Tanzania katika masuala mbalimbali ambayo Mahakama itahitaji ushiriki wake ili kuchangia katika maboresho ya Mahakama nchini.

Akizungumza na Mhe. Jaji Mkuu mapema leo Julai 26, 2021 pindi alipomtembelea ofisini kwake Mahakama ya Rufani (T) jijini Dar es Salaam, Balozi Mtumbuida alimueleza Mhe. Jaji Mkuu kuwa, lengo la kumtembelea ni pamoja na kujitambulisha na kumuhakikishia ushirikiano wakati wowote.

“Mhe. Jaji Mkuu nimefurahi kukutana na wewe leo, hivyo naomba nikuhakikishie ushirikiano wangu wakati wowote utakaponihitaji,” alisema Balozi Mtumbuida.

Naye, Jaji Mkuu wa Tanzania, Mhe. Prof. Ibrahim Hamis Juma alionyesha kufurahishwa na ujio wa Balozi huyo, ambapo nae alimuhakikishia kumpa ushirikiano katika shughuli mbalimbali kwa ustawi wa Mahakama ya Tanzania na Mahakama ya Msumbiji.

Sambamba na hilo, Mhe. Jaji Mkuu alimueleza Balozi huyo juu ya masuala mbalimbali  yanayohusu Mahakama ikiwa ni pamoja na maendeleo ya matumizi ya TEHAMA Mahakamani, mfumo wa Mahakama ya Tanzania na mengineyo.

“Mahakama ya Tanzania imepiga hatua katika nyanja mbalimbali ikiwa ni pamoja na kurahisisha utoaji wa huduma zake kwa kutumia TEHAMA, mfano katika kipindi hiki cha Ugonjwa wa Korona, baadhi ya Mashauri yamekuwa yakiendelea kusikilizwa kwa njia ya Mahakama mtandao ‘Virtual court’ kwa hiyo hii imerahisisha,” alisema Mhe. Jaji Mkuu.

Jaji Mkuu wa Tanzania, Mhe. Prof. Ibrahim Hamis Juma (kulia) akimsikiliza Balozi wa Msumbiji nchini Tanzania, Bw. Ricardo Mtumbuida wakati alipotembelewa na Balozi huyo mapema leo Julai 26, 2021.

Mhe. Jaji Mkuu akizungumza jambo na Balozi Mtumbuida (hayupo pichani).

Balozi wa Msumbiji nchini Tanzania, Bw. Ricardo Mtumbuida akizungumza jambo na Mhe. Jaji Mkuu pindi alimpomtembelea ofisini kwake Mahakama ya Rufani, Dar es Salaam.Baadhi ya Maafisa walioambatana na Balozi huyo wakiwa pamoja na Maafisa wa Mahakama wakifuatilia mazungumzo kati ya Mhe. Jaji Mkuu na Mhe. Balozi huyo ambao wote wameahidi kushirikiana.

(Picha na Mary Gwera, Mahakama)

KAMPENI YA HAKI MIRATHI WAJIBU WANGU YASHIKA KASI MANISPAA YA TEMEKE

Na Innocent Kansha – Mahakama

Mahakama ya Wilaya ya Temeke kwa kushirikiana na wadau kutoka katika Kituo cha Sheria na Haki za Binadamu (LHRC), Wakala wa Usajili, Ufilisi na Udhamini (RITA) na Chama cha Wanansheria Tanganyika (TLS) wamefanikiwa kuendesha na kutoa elimu ya Haki Mirathi Wajibu Wangu kwa Viongozi wa ngazi mbalimbali wapatao 282 wa Chama cha Mapinduzi Manispaa ya Temeke Jijini Dar es salaam

Akifungua kampeni hiyo ya siku moja kwa viongozi hao mnamo Julai 22, 2021 iliyofanyika katika ukumbi wa New Taifa Pub iliyoko Manispaa ya Temeke, Hakimu Mkazi Mfawidhi wa Mahakama ya Wilaya Temeke, Mhe. Suzan Kihawa aliwakumbusha wajumbe hao kuwa tatizo la mirathi limekuwa likiisumbua jamii  kutokana na changamoto ya watu wengi kutokuwa na elimu ya kutosha ya namna ya kusimamia utaratibu mzima hasa pale inapotokea kifo.

“Tumeamua kwa dhati kwa kushirikiana na wadau kuanzisha kampeni hii ya haki mirathi kwa Wilaya ya Temeke kwani uzoefu unaonesha kwamba ukosefu wa elimu ya masuala ya mirathi miongoni mwa wanajamii ni mkubwa ikilinganishwa na migogoro mingi tunayoipokea na kuitolea maamuzi mahakamani”, alisisitiza Mhe.Kihawa.

Hakimu Mkazi Mfawidhi huyo alisema uelewa wa mambo ya mirathi na wosia utakuwa chachu ya kuwaleta wadau wote kwa pamoja na hatimaye kupunguza migogoro katika eneo hilo muhimu. Jambo lolote likifanyika kwa wakati linaleta matunda yaliyokusudiwa na likicheleweshwa linazalisha hasara.

Mhe. Kihawa aliongeza kuwa, elimu hiyo ikipatikana kwa wakati itasaidia kutatua migogoro isiyo ya lazima kwa jamii. Aidha watu wasipokuwa na uelewa wananchelewa kufahamu haki zao, hivyo wanachelewa kuzitafuta na kupelekea kuchelewa kuzipata.

“Tunategemea baada ya mafunzo haya, mkawe mbegu njema katika mashina mnayofanya kazi, kusaidia watu kujua na kufuatilia haki zao kwa wakati hasa katika eneo la mirathi”, aliongeza Mfawidhi huyo

Mhe. Kihawa aliongeza kuwa mashauri yakifunguliwa kwa wakati ni wajibu wa Mahakama kuyasikiliza kwa wakati na wasimamizi wa Mirathi watekeleze wajibu wao wa kufunga hesabu za mirathi husika kwa wakati na hivyo kutimiza malengo ya kauli mbiu ya Haki Mirathi, Wajibu Wangu.

Naye, Hakimu Mkazi wa Mahakama ya Wilaya Temeke, Mhe. John Ngeka aliwakumbusha wajumbe wa mafunzo hayo kuwa Mirathi ni mchakato unaojumuisha kuwasilisha ombi la kuteua msimamizi wa mirathi mahakamani, uteuzi wa msimamizi wa mirathi ambaye atakuwa na majukumu ya kukusanya mali za marehemu, kulipa madeni kama yapo pia kulipwa madeni kama itathibitika marehemu alikuwa akidai na hatimaye kugawanya mali za marehemu kwa warithi.

Mhe. Ngeka aliongeza kuwa Sheria zinazosimamia mirathi hapa nchini (sheria ya Serikali, sheria ya Mila na sheria ya Kiislamu) zinatamka kuwa mtu yoyote ili mradi asiwe chini ya miaka 18, mwenye uaminifu na uadilifu anafaa kuwa msimamizi wa mirathi bila kujali kuwa ni ndugu wa marehemu au la.

Mhe. Ngeka aliendelea kusema, kwa utaratibu uliopo baraza la ukoo ndio huteua msimamizi wa mirathi ambaye baadae anathibitishwa na Mahakama, lakini iwapo baraza la ukoo likashindwa kumteua msimamizi kwa kushindwa kuafikiana katika kikao basi mtu yoyote anaweza kwenda mahakamani kuomba kuteuliwa na Mahakama kuwa msimamizi wa mirathi husika.

Wakati huo huo, Afisa Usajili kutoka Wakala wa Usajili, Ufilisi na Udhamini (RITA) Bw. Joseph Mwakatobe aliwaasa washiriki kuwa migogoro mingi inayoigumbika mirathi mingi kwenye jamii ni kutokana na marehemu kuacha mali na njia bora ya kuondokana migogoro huyo ni kuandika Wosia wenye kukidhi vigezo vyote usioweza kupingika hata mahakamani.

“Usipoandika wosia unajiondolea au kupoteza nguvu na mamlaka ya kisheria ya mali zako zote ulizochuma ili zisaidie familia yako, wosia utasaidia kutofuja mali za marehemu na hivyo warithi kunufaika bila kuingia kwenye mgogoro wa aina yoyote”, alifafanua Bw. Mwakatobe.

Hakimu Mkazi Mfawidhi wa Mahakama ya Wilaya Temeke, Mhe. Suzan Kihawa (aliyenyoosha mkono) akifungua mafunzo ya kampeni ya Haki Mirathi, Wajibu Wangu kwa Viongozi wa ngazi mbalimbali wapatao 282 wa Chama cha Mapinduzi Manispaa ya Temeke Jijini Dar es salaam Julai 22, 2021.

Baadhi ya Viongozi wa ngazi mbalimbali wapatao 282 wa Chama cha Mapinduzi Manispaa ya Temeke Jijini Dar es salaam walioshiriki mafunzo hayo ya Haki Mirathi wajibu wangu.

Hakimu Mkazi wa Mahakama ya Wilaya Temeke, Mhe. John Ngeka akiwakumbusha wajumbe wa mafunzo hayo kuwa Mirathi ni mchakato unaojumuisha kuwasilisha ombi la kuteua msimamizi wa mirathi Mahakamani.

Baadhi ya Viongozi wa ngazi mbalimbali wapatao 282 wa Chama cha Mapinduzi Manispaa ya Temeke Jijini Dar es salaam walioshiriki mafunzo hayo ya Haki Mirathi wajibu wangu.

Afisa Usajili kutoka Wakala wa Usajili, Ufilisi na Udhamini (RITA) Bw. Joseph Mwakatobe akiwaasa washiriki kuwa migogoro mingi inayoigubika mirathi kwenye jamii ni kutokana na marehemu kuacha mali na kuwaasa kuandika wosia wa mgawanyo wa mali hizo.

    Moja ya mshiriki wa mafunzo ya Haki Mirathi Wajibu Wangu akiuliza swali.

Mtaalamu Kutoka Chama cha Wanasheria Tanganyika (TLS) akijibu maswali ya washiriki walioshiriki kwenye kampeni ya Haki Mirathi Wajibu Wangu.

Moja ya mshiriki wa mafunzo ya Haki Mirathi Wajibu Wangu akiuliza swali.

 Katibu wa Chama cha Mapinduzi Wilaya ya Temeke Bw. Noel George akitoa neno wakati wa kufungua mafunzo ya Haki Mirathi Wajibu Wangu  kwa Viongozi wa ngazi mbalimbali wapatao 282 wa Chama cha Mapinduzi Manispaa ya Temeke Jijini Dar es salaam

Picha na Innocent Kansha - Mahakama

TANZIA; HAKIMU WA MAHAKAMA YA MWANZO BUGURUNI AFARIKI DUNIA

       

Marehemu Mwinyiheri Mohamed Kondo enzi za uhai wake.

Mahakama ya Tanzania inasikitika kutangaza kifo cha Mtumishi wake Mhe. Mwinyiheri Mohamed Kondo (pichani) aliyekuwa Hakimu katika Mahakama ya Mwanzo Buguruni Dar es Salaam.

Kwa mujibu wa taarifa zilizotolewa na Mahakama ya Wilaya ya Ilala zinasema kuwa marehemu Kondo alikutwa na umauti alfajiri ya kuamkia leo Julai 22, 2021 nyumbani kwake Toangoma Mikwambe jijini Dar es Salaam.

Mwili wa marehemu unatarajiwa kuzikwa kesho Julai 23, 2021 nyumbani kwake Toangoma-Mikwambe jijini Dar es Salaam.

Mahakama ya Tanzania inaungana na ndugu, jamaa na marafiki katika kipindi hiki kigumu cha kuondokewa na mpendwa wetu.

BWANA AMETOA NA BWANA AMETWAA, JINA LAKE LIHIMIDIWE.

HUDUMA ZA MAHAKAMA YA MWANZO SHANWE KATAVI ZAREJEA

Na Mayanga Someke- Mahakama Kuu Kanda ya Sumbawanga

Shughuli za utoaji huduma za Mahakama katika Mahakama ya Mwanzo Shanwe iliyopo Wilaya ya Mpanda mkoani Katavi zilizositishwa kwa muda mrefu zimerejea huku Jaji Mfawidhi wa Mahakama Kuu, Kanda ya Sumbawanga Mhe. Danstan Ndunguru akitoa rai kwa Mahakama hiyo kushirikiana na wadau ili kutoa haki kwa wakati.

Jengo la Mahakama ya Mwanzo Shanwe lilijengwa mwaka 1952 ambapo huduma za kimahakama ziliendelea kutolewa hadi mwaka 1980 zilipositishwa baada ya kukosa watumishi na hivyo huduma za Mahakama ya mwanzo zikawa zinatolewa Mahakama ya mwanzo Mpanda Mjini.

Akizungumza na wananchi pamoja na Watumishi wa Mahakama wakati wa uzinduzi rasmi wa huduma za Mahakama hiyo, Mhe. Jaji Mfawidhi huyo alisema ni muhimu kwa Watumishi wa Mahakama hiyo kushirikiana na wadau wengine ambao wanamchango mkubwa katika shughuli za kimahakama katika huduma ya utoaji haki kwa wananchi.

“Mfano tunaweza kuwa tunalalamika kesi inachelewa Mahakamani,tumegawanyika kila mmoja ana sehemu yake. Polisi ana wajibu wa kukamata, kupeleleza na kuleta ushahidi Mahakamani, Ofisi ya Mashtaka kazi yao ni kuendesha shitaka, katika mazingira hayo mmoja akizembea athari zinakuwa kwa yule mtu ambaye ana shauri na atalalamika shauri lake limecheleweshwa, hivyo kila mdau katika mfumo wa utoaji haki lazima awajibike,” alisema Mhe.Jaji Ndunguru.

Aliongeza kuwa katika kuhakikisha kwamba huduma za kimahakama zinafikika kwa urahisi lakini pia kwa wakati unaotakiwa. ‘Hatutarajii kuona mwananchi anatembea kutwa nzima kwenda Mahakamani na anafika muda wa kazi umeisha na kesi imefutwa kwasababu tu anatoka mbali kwahiyo ndo maana tunajitahidi kuhakikisha tunasogeza huduma karibu na wananchi.”

Hali kadhalika, Mhe. Jaji Ndunguru aliwashukuru Wadau wa Mahakama kwa kuchangia na kufanikisha ukarabati wa jengo hilo hali iliyowezesha shughuli za Mahakama hiyo kurejea.

Aidha, alitoa rai pia kwa Watumishi wa Mahakama hiyo kubadili mienendo na tabia zinazokiuka miiko na maadili ya kazi na Utumishi wa Umma ili waweze kutoa huduma kwa wananchi kwa ubora unaostahili.

Kwa upande wa Wananchi wa kata hiyo, Mhe Jaji Mfawidhi aliwasisitiza kutokuwa na mtazamo hasi kwa Mahakama kwani Mahakama haipo kwa ajili ya kufunga tu. 

Mahakama ya Mwanzo Shanwe ni moja kati ya Mahakama kongwe nchini na ni kati ya Mahakama za awali kujengwa katika mkoa wa Katavi. Huduma za kimahakama katika kata ya Shanwe zilianza kabla ya uhuru mwaka 1926 ikiwa ni Baraza na wakati huo Watemi ndio walikuwa wanaendesha mashauri.

Muonekano wa jengo la Mahakama ya Mwanzo Shanwe likiwa tayari kwa kurejesha huduma za Mahakama.

Jaji Mfawidhi wa Mahakama Kuu Kanda ya Sumbawanga, Mhe.Danstan Ndunguru akifuatilia taarifa fupi ya ukarabati wa jengo la Mahakama ya Mwanzo Shanwe, kushoto ni Naibu Msajili wa Mahakama Kuu Kanda ya Sumbawanga, Mhe William Mutaki na Kulia ni Hakimu Mkazi Mfawidhi wa Mahakama ya Hakimu Mkazi Katavi.

Jaji Mfawidhi wa Mahakama Kuu Kanda ya Sumbawanga, Mhe.Danstan Ndunguru akikata utepe kuashiria urejeshwaji wa huduma za Mahakama katika Mahakama ya mwanzo Shanwe-Katavi.

Watumishi wa Mahakama ya Hakimu mkazi mkazi Katavi na wilaya zake  Wakiwa kwenye picha ya pamoja na Mhe Jaji Mfawidhi na viongozi wengine wa Mahakama-Kanda ya Sumbawanga.

Picha ya pamoja na wananchi wa Kata ya Shanwe.

 

 

MASHAURI YA WATOTO YASIKILIZWE KWA WAKATI; JAJI MKUU

Na Mary Gwera, Mahakama

Jaji Mkuu wa Tanzania, Mhe. Prof. Ibrahim Hamis Juma amezindua rasmi kitabu cha Mkusanyiko wa Mashauri ya Watoto (Compendium of Child Justice Cases) huku akitoa wito kwa Majaji, Mahakimu na wadau wa ‘Haki Mtoto’ nchini kuwezesha mashauri ya Watoto kusikilizwa na kumalizwa kwa wakati.

Akizindua rasmi kitabu hicho leo Julai 19, 2021 katika Ukumbi wa Mikutano wa Mwalimu Nyerere jijini Dar es Salaam, Mhe. Jaji Mkuu alisema kuwa maamuzi yanayotolewa na Mahakama nchini yamebeba na kusheheni maelekezo, mafundisho na busara zinazohitajika katika kulinda haki za mtoto na hivyo maamuzi yanayogusa haki na maslahi ya mtoto ni lazima yapatikane kwa urahisi na yakatumiwa kama rejea na wadau wote wa haki za mtoto.

“Sisi sote tukumbuke kuwa, ‘Haki Mtoto’, kwa maana ya haki, ulinzi na ustawi wa mtoto; haipatikani Mahakamani peke yake. Bali, inapatikana katika “Mfumo Jumuishi wa Haki Mtoto” ambao ni mwavuli mpana zaidi ya mahakama, polisi au ustawi wa jamii mmoja mmoja. Tukumbuke kuwa, katika Haki Mtoto, kila mmoja wetu atimize wajibu wake,” alisisitiza.

Akitaja faida kadhaa za kitabu hicho, Mhe. Jaji Mkuu alisema kuwa kitabu hiki kinakumbusha kuwa, zipo sheria nyingi zaidi ya Sheria ya Mtoto ya 2009 [Law of the Child Act Na. 21 ya 2009], na kuwa Haki Mtoto haipatikani ndani ya Sheria moja tu bali kuna vifungu vya Katiba, Sheria mbalimbali, Kanuni, Taratibu, Mazoea na vigezo vingi ambazo kwa pamoja vinajenga mfumo wa kufahamu mapana na marefu ya Haki ya Mtoto.

“Naweza kusema kuwa mkusanyiko huu ni ‘One-Stop Centre’ kuhusu kesi za Haki mtoto na muhimu katika kazi za polisi, wapelelezi, mahakimu, majaji, maafisa ustawi wa jamii, magereza na hata kwa watunga sera wanaposhughulikia ‘HAKI MTOTO’, alieleza Mhe. Jaji Mkuu.

Kwa upande mwingine, Mhe. Jaji Prof. Juma alitoa wito kwa Waheshimiwa Majaji Wafawidhi wa kanda zote, Mahakimu Wafawidhi wa Mikoa na Mahakama za Wilaya kuhakikisha kuwa katika maeneo yenu ya kazi kuna nakala za kitabu hiki ili kusaidia kufanya rejea pale inapobidi kufanya hivyo.

Kwa upande wake Mwakilishi kutoka Shirika la Umoja wa Mataifa linaohudumia Watoto (UNICEF), Bi. Sampathi Perera alieleza kuwa uzinduzi wa kitabu hicho ni fanikio litakalowawezesha Majaji na Mahakimu kuendelea kutoa maamuzi sahihi kuhusu mashauri ya Watoto.

Sambasamba na hilo, katika hafla hiyo, Mhe. Jaji Mkuu alizindua pia Ripoti ya Tathmini ya Mafunzo kwa Wadau wa Haki za Watoto Tanzania, Mafunzo hayo yaliendeshwa na Chuo cha Uongozi wa Mahakama Lushoto kwa kushirikiana na Mahakama ya Tanzania kuanzia mwaka 2017 hadi mwaka 2020 chini ya ufadhili wa Shirika la Umoja wa Mataifa linalohudumia Watoto (UNICEF).

Ripoti hiyo imeonyesha kuwa mafunzo yaliendeshwa kwa wadau wa haki za watoto Mia Saba na Arobaini na Sita (746) katika kanda zote za Mahakama Kuu ya Tanzania ambayo kupitia mafunzo hayo.

Uzinduzi huu ni sehemu ya utekelezaji wa Mpango Mkakati wa Chuo cha Uongozi wa Mahakama (IJA) 2018/2019-2022/2023 wa kuwajengea uwezo wadau wa sekta ya sheria nchini.

Uzinduzi huo umehudhuriwa na wadau mbalimbali wa sekta ya Sheria nchini wanaohusika na haki za mtoto wakiwemo Majaji wa Mahakama ya Rufani, Majaji wa Mahakama Kuu, Mahakimu wa ngazi mbalimbali, Wawakilishi wa Taasisi za Serikali, Wawakilishi kutoka Mashirika yasiyo ya Serikali na Wawakilishi wa UNICEF.

Jaji Mkuu wa Tanzania Mhe. Prof. Ibrahim Hamis Juma (katikati) akionyesha Kitabu cha mkusanyiko wa kesi za watoto “Compendium for Juvenile cases” mara baada ya kukizindua rasmi.Wengine ni Jaji wa Mahakama ya Rufani ambaye ni Mwenyekiti wa Kamati ya Mhe. Jaji Mkuu ya Utafiti na Mafunzo-Mahakama, Mhe. Augustine Mwarija (kushoto) na kulia ni Jaji wa Mahakama ya Rufani na Mwenyekiti wa Baraza la Uongozi wa Chuo cha Uongozi wa Mahakama Lushoto, Mhe. Dkt. Gerald Ndika, uzinduzi huo umefanyika leo Julai 19, 2021 katika Ukumbi wa Mikutano wa Kimataifa wa Julius Nyerere Jijini Dar es Salaam.

Jaji Mkuu wa Tanzania, Mhe. Prof. Ibrahim Hamis Juma akikata utepe  kuashiria uzinduzi wa Ripoti ya tathmini ya mafunzo kwa Wadau wa Haki za watoto “Impact Assessment on trainings of Juvenile Justice Frontline workers” wanaoshuhudia ni Jaji wa Mahakama ya Rufani, Mhe. Augustine Mwarija (kushoto) na kulia ni Jaji wa Mahakama ya Rufani na Mwenyekiti wa Baraza la Uongozi wa Chuo cha Uongozi wa Mahakama Lushoto Mhe. Dkt. Gerald Ndika.

Wakionyesha vitabu vya ripoti hiyo mara baada ya kuzindua.

Mhe. Jaji Mkuu akimkabidhi Mwakilishi kutoka Wizara ya Katiba na Sheria Kitabu cha Mkusanyiko wa Kesi za Watoto na Ripoti ya Tathmini ya Mafunzo kwa Wadau wa Haki za Watoto mara baada ya uzinduzi.

Baadhi ya Majaji wa Mahakama ya Rufani, Majaji Wafawidhi, Mahakimu Wafawidhi wa Mahakama za Hakimu Mkazi, Viongozi wa Mahakama na wadau mbalimbali waliohudhuria hafla ya uzinduzi wa Kitabu cha mkusanyiko wa kesi za watoto na Ripoti ya Tathmini ya Mafunzo kwa Wadau wa Haki za Watoto uliofanywa na Jaji Mkuu wa Tanzania Mhe. Prof. Ibrahim Hamis Juma.

Mwakilishi wa Shirika la Umoja wa Mataifa la kuhudumia watoto (UNICEF), Bi. Sampathi Perera akielezea jinsi Tanzania ilivyopiga hatua kubwa katika kushughulikia masuala ya watoto, ameipongeza Mahakama ya Tanzania kwa uzinduzi wa kitabu hicho muhimu.

Mkuu wa Chuo cha Uongozi wa Mahakama (IJA) Lushoto ambaye pia ni Jaji wa Mahakama ya Rufani (T), Mhe. Dkt. Paul Kihwelo akitoa ufafanuzi wa namna ya uandaaji wa Kitabu cha mkusanyiko wa kesi za watoto na Ripoti ya Tathmini ya Mafunzo kwa Wadau wa Haki za Watoto ulivyotekelezwa kwa ushirikiano wa wadau.

(Picha na Innocent Kansha, Mahakama)

 

 

 

TANZIA; MTUMISHI WA MAHAKAMA KANDA YA DODOMA AFARIKI DUNIA

 TANZIA

Bi. Susana Fatina Joseph enzi za uhai wake.

Mahakama ya Tanzania inasikitika kutangaza kifo cha Mtumishi wake Bi. Susana Fatina Joseph (59) (pichani) kilichotokea tarehe 10 Julai, 2021 katika Hospitali ya Wilaya Kondoa Mkoani Dodoma.

Marehemu Susana alikuwa Msaidizi wa Kumbukumbu wa Mahakama ya Mwanzo Bereko iliyopo Wilaya ya Kondoa Mkoani Dodoma.

Kwa mujibu wa taarifa iliyotolewa na Mtendaji wa Mahakama Kuu Kanda ya Dodoma, Bi. Maria Francis Itala inasema mazishi ya mtumishi huyo yalifanyika jana Julai 11, 2021 katika Kijiji cha Mondo kilichopo Wilaya ya Kondoa Mkoa wa Dodoma.

Marehemu Susana aliajiriwa na Mahakama ya Tanzania tangu 01 Machi, 1982 akiwa Msaidizi wa Kumbukumbu cheo alichokitumikia kwa muda wake wote aliokuwa Mtumishi wa Mahakama katika vituo mbalimbali ikiwemo Mahakama ya Mwanzo Kondoa Mjini na Bereko na alitarajiwa kustaafu kazi kwa umri tarehe 07 Januari, 2022.

Mahakama ya Tanzania inaungana na ndugu, jamaa na marafiki wa mtumishi huyo katika kuomboleza msiba huu mzito wa kuondokewa na mpendwa wetu.

BWANA AMETOA, BWANA AMETWAA, JINA LAKE LIHIMIDIWE.

KUWENI WABUNIFU ILI KUENDANA NA SOKO LA AJIRA; JAJI MKUU

Na Magreth Kinabo na Mary Gwera- Mahakama

Jaji Mkuu wa Tanzania, Mhe. Prof. Ibrahim Hamis Juma  amewataka mawakili kuwa na tabia ya kujisomea vitu mbalimbali ili kuweza kubaini fursa za  ajira za kisheria zilizopo nchini ikiwa ni njia mojawapo ya kukabiliana na mabadiliko ya kiteknolojia.

Akizungumza katika sherehe ya 64 ya kuwapokea na  kuwakubali Mawakili wa Kujitegemea wapya iliyofanyika leo Julai 09, 2021 katika viwanja vya Karimjee jijini Dar es Salaam, Mhe. Jaji Mkuu alisema karne ya 21 ni ya ushindani, hivyo ni lazima wajifunze ili kuweza kuendana na mazingira hayo.

“Karne ya 21 inahitaji watu wenye ujuzi, umahiri na sifa za ziada, bila kutegemea zaidi vyeti, hivyo, ni jukumu lenu ni  kujifunza Tanzania ikoje na kuisoma Dira ya Maendeleo ya Taifa 2025’’ alisema Prof. Juma.

Aliwataka Mawakili hao wapya kutumia vyema elimu, maarifa na ujuzi waliopata kutoka katika mitaala yenye maudhui ya karne ya 20 kujisomea, kujiongezea na kupata ujuzi zaidi unaohitajika katika Karne ya 21.

 

“Katika usaili, niligundua kuwa mlikuwa na uelewa mkubwa katika maeneo ya kisheria mliyosomea vyuoni. Lakini mlikuwa na uelewa mdogo wa mwelekeo wa Tanzania na nafasi yenu katika huo mwelekeo wa Tanzania,” alieleza.

 

Hali kadhalika, Mhe. Jaji Mkuu aliwakumbusha Mawakili hao kuwa na ujuzi wa mawasiliano, kwa kuzijua vyema lugha za mawasiliano ikiwa ni pamoja na lugha ya Kiswahili na Kiingereza kwa kuwa ndio lugha ya kimataifa.

 

Alisema kuwa Sheria ya Mawakili Sura ya 341 Toleo la 2019 na Sheria iliyoanzisha Chama cha Wanasheria wa Tanganyika (Tanganyika Law Society Act, Cap 307), zilitungwa Mwaka 1954 na zote mbili zilianza kufanya kazi tarehe  Januari 1, 1955 (miaka 66 iliyopita). Sheria hizi zimebeba matarajio na maudhui, na mahitaji ya karne ya 20.

“Ni jukumu lenu wanasheria na Mawakili kuhakikisha kuwa katika utekelezaji, Sheria hizi zilingane na matarajio ya Karne ya 21 na pia ushindani wa Dunia ya Mapinduzi ya Nne ya Viwanda,” alisisitiza.

Aidha, Mhe. Jaji Prof. Juma alitaja baadhi ya changamoto ambazo Chama cha Wanasheria Tanganyika (TLS) zinakabiliana nazo ambazo ni pamoja na  Kanzidata ya wanachama wa TLS kuwa kubwa ambayo inaonyesha kuwa  wanachama wengi hawalipi ada za uanachama; Mahakama kuwalipa kiasi kidogo cha fedha Mawakili wanaokamilisha majukumu ya utetezi wa washtakiwa wa mashauri pindi kesi zinapokamilika na kadhalika. 

Hata hivyo, Mahakama kwa kushirikiana na Chama hicho wameahidi kuzifanyia kazi changamoto hizo kwa manufaa ya umma.

Sherehe hiyo ilihudhuriwa na Mhe. Jaji Kiongozi, baadhi ya Majaji wa Mahakama Kuu ya Tanzania, Naibu Mwanasheria Mkuu wa Serikali, Rais wa TLS, baadhi  ya viongozi wengine wa Serikali, baadhi ya Watumishi wa Mahakama pamoja na wageni waalikwa.

Jumla ya Mawakili wapya wa Kujitegemea 308 wamekubaliwa na kuongeza idadi ya Mawakili hao kufikia 10,436. Miongoni mwa Mawakili waliokubaliwa katika sherehe hiyo ni pamoja Mhe. Jaji Augustine Mwarija na Mahakimu nane (8).

Jaji Mkuu wa Mahakama ya Tanzania, Mhe. Prof. Ibrahim Hamis Juma akizungumza na Mawakili wapya  (hawapo pichani) mara baada ya kuwapokea na kuwakubali katika sherehe ya 64 iliyofanyika Julai 09, 2021 katika viwanja vya Karimjee jijini Dar es Salaam.

Sehemu ya Mawakili wapya 308 waliopokelewa na kukubaliwa leo wakimsikiliza Mhe. Jaji Mkuu alipokuwa akitoa hotuba yake.

Mhe. Jaji Mkuu akiwakubali Mawakili wapya kwa mujibu wa sheria.

Usikivu makini.

Meza ya upande wa Naibu Mwanasheria Mkuu wa Serikali, Ofisi ya DPP pamoja Rais wa TLS, Prof. Edward Hoseah wakipokea heshima kutoka kwa Mawakili wapya wa Kujitegemea pindi walipokuwa wakitoa heshima kwa Viongozi hao.

Msajili Mkuu wa Mahakama ya Tanzania, Mhe. Wilbert Chuma akitoa neno wakati wa sherehe hiyo.

Msajili wa Mahakama Kuu ya Tanzania, Mhe. Sharmillah Sarwatt ambaye pia alikuwa Mshereheshaji wa sherehe hiyo ya kuwapokea Mawakili wapya akitoa mwongozo.

Wakiwa na nyuso za furaha mara baada ya kutunukiwa vyeti vya kufuzu kuwa Mawakili.

Sehemu ya ndugu, jamaa na marafiki waliohudhuria katika sherehe hizo.

 

WADAU MBALIMBALI WAENDELEA KUTEMBELEA BANDA LA MAHAKAMA NA KUJIPATIA ELIMU

MAHAKAMA NA MATUKIO KATIKA PICHA KWENYE MAONESHO YA 45 YA SABASABA KATIKA VIWANJA VYA MWL. NYERERE JIJINI DAR ES SALAAM 

Baadhi ya wananchi waliojitokeza katika banda la Mahakama ya Tanzania ili kujipatia elimu na machapisho ya Mahakama katika Maonyesho ya 45 ya Sabasaba Jijini Dar es salam

 

Wananchi mwenye ulemavu akitumia ngazi maalumu kuingia kwenye Mahakama inayotembea kwa ajili ya kujifunza jinsi Mahakama hiyo inavyofanya kazi wakati wa Maonesho ya 45 ya Sabasaba Jijini Dar es salaam.

Kiongozi wa Jumuiya ya Waislam Ahmaddiya Tanzania Bw. Tahir Mahmood Chaudhry (wenye kizibao cheusi) akiwa na Viongozi wa Jumuiya hiyo alipotembelea Banda la Mahakama kufahama mambo mbalimbali yanayofanywa na Taasisi hiyo.

Kiongozi wa Jumuiya ya Waislam Ahmaddiya Tanzania Bw. Tahir Mahmood Chaudhry (wenye kizibao cheusi) akiwa na Viongozi wa Jumuiya hiyo alipotembelea Banda la Mahakama kufahama mambo mbalimbali yanayofanywa na Taasisi hiyo wakiwa kwenye picha ya pamoja.

Kiongozi wa Jumuiya ya Waislam Ahmaddiya Tanzania Bw. Tahir Mahmood Chaudhry (wenye kizibao cheusi) akiwa na Viongozi wa Jumuiya hiyo alipotembelea Banda la Mahakama kufahama mambo mbalimbali yanayofanywa na Taasisi hiyo, akisaini kitabu cha wageni alipotembelea kwenye gari maalum la Mahakama Inayotembea.

Jaji wa Mahakama Kuu ya Tanzania Divisheni ya Ardhi Mhe. Salma Maghimbi alipotembelea Banda la Mahakama ya Tanzania kujionea utendaji kazi wa watumishi katika maonesho ya Sabasaba Jijini Dar es salaam.

Jaji wa Mahakama Kuu ya Tanzania Mhe. Mwanabaraka Mnyukwa  (mwenye ushungi wa bluu) alipotembelea Banda la Mahakama ya Tanzania kujionea utendaji kazi wa watumishi akipewa ufafanuzi wa jambo katika banda la Mahakama ya Haki ya Afrika Mashariki katika maonesho ya Sabasaba Jijini Dar es salaam.

Wananchi waliojitokeza katika banda la Mahakama Kuu ya Tanzania Divisheni ya Ardhi kujifunza mambo yanayohusu sheria zinazosimamia migogoro ya ardhi.

Wananchi waliojitokeza katika banda la miaka 100 ya Mahakama Kuu ya Tanzania  kujifunza historia ya Mahakama ya Tanzania.

Wananchi waliojitokeza katika banda la Chama cha Wanasheria Tanganika (TLS) wakipewa huduma za Kisheria na Mawakili kutoka Chama hicho.

Baadhi ya wananchi waliotembelea banda la Mahakama kitengo cha Mirathi na Wosia kupata elimu wakati wa maonesho ya 45 ya Biashara Sabasaba.

Naibu Msajili wa Mahakama Kuu ya Tanzania Kituo cha Usuluhishi Mhe. Hamza Wanjah akitoa ufafanuzi wa jambo kwa wananchi waliojitokeza kupata elimu juu ya utatuzi wa migogoro ya ardhi.

Jaji wa Mahakama Kuu ya Tanzania Kanda ya Dar es salaam Mhe. Joaquine De -Mello akisaini kitabu cha wageni mara alipotembelea Banda la Mahakama ya Tanzania Divisheni ya Biashara.

Picha na Kitengo cha Habari, Elimu na Mawasiliano - Mahakama.